26:1 บัดนี้ อากริปปาจั่งเว้ากับเปาโลว่า “เซิญเลย เฮาอนุญาตให้เจ้าให้การข้อหาเองได้” แล้วเปาโลจั่งเด่มือออกมา เว้าแก้คดีว่า

26:2 “ท่านกษัตริย์อากริปปาเจ้าข้า ผู้ข้าฮู้สึกดีใจที่มีโอกาสแก้คดีต่อหน้าท่านในมื้อนี้ ในข้อคดีทั้งเมิ้ดฮั้นที่พวกยิวกล่าวหาใส่ผู้ข้า

26:3 แม่นย้อนว่า ท่านซำนาญมีความฮู้หลายในขนบธรรมเนียม กับข้อโต้แย้งต่างๆ ของพวกยิว จั่งซั้นขอท่านได้โปรดกรุณาอุตส่าห์ฟังผู้ข้าด้วยความอดทนแหน่

26:4 พวกซาวยิวทั้งหลายได้ฮู้เถิงการใซ้ซีวิตของผู้ข้าตั้งแต่เป็นเด็กน้อยมา คือตำอิดมาฮั้น พวกเขาฮู้กันว่าผู้ข้าได้ใซ้ซีวิตอยู่กับซนซาติของผู้ข้าในเมืองเยรูซาเล็มแบบใด

26:5 คือพวกเขาฮู้จักผู้ข้าดีตั้งแต่ตำอิดมา แล้วคั่นเขายอมยืนยันเป็นพยานเขากะเป็นได้ ที่ว่า ผู้ข้าได้ดำเนินซีวิตตามคณะฟาริสี ซึ่งเป็นนิกายที่ถืออย่างเคร่งครัดที่สุดตามศาสนาของพวกเฮา

26:6 บัดนี้ ผู้ข้าได้ยืนอยู่นี้ ถืกการพิจารณาพิพากษาเนื่องจากว่าผู้ข้ามีความหวังในคำมั่นสัญญาฮั้น ที่พระเจ้าได้โปรดให้ไว้กับพวกพ่อตระกูลของพวกผู้ข้าฮั้นล่ะ

26:7 ซึ่งเป็นคำมั่นสัญญาที่ให้ไว้กับเผ่าสิบสองตระกูลของพวกผู้ข้า ที่ได้อุตส่าห์ปรนนิบัติพระเจ้าทั้งกลางเว็นกลางคืน ด้วยมีความหวังว่าสิได้ฮับพรเป็นสุขตามคำมั่นสัญญาฮั้น แล้วย้อนผู้ข้าเห็นแก่ความหวังนี้เอง ท่านกษัตริย์อากริปปา เอ้ย ผู้ข้าจั่งถืกพวกยิวฟ้องร้องใส่

26:8 ผู้ข้าขอถามว่า เป็นหยังท่านจั่งคึดว่า เป็นเรื่องเหลือเซื่อที่พระเจ้าสามารถให้คนตายเป็นขึ้นมาได้

26:9 คือแม้นแต่ผู้ข้าเอง เคยคึดว่าผู้ข้าต้องเฮ็ดหลายแนวที่สิต่อต้านพระนามของพระเยซู ซาวนาซาเร็ธฮั้น

26:10 ผู้ข้าได้เฮ็ดแนวฮั้นในเมืองเยรูซาเล็ม คือได้ฮับมอบอำนาจจากพวกผู้นำเครื่องถวายที่สิจับเอาคนดีๆ หลายคนที่เป็นผู้บริสุทธิ์ของพระเจ้า คุมขังไว้ในคุก แล้วผู้ข้าได้เห็นดีนำเถิงการลงโทษให้เขาตาย

26:11 ผู้ข้าได้ทำโทษเขาหลายเทื่อ ในศาลาธรรมเมิ้ดคู่หม่อง กับได้บังคับเขาให้ลบหลู่หมิ่นประมาทนำ แล้วที่ว่าผู้ข้าเคยเคียดแค้นเขาอย่างฮ้ายแฮงที่สุด จนเคยตามล่าข่มเหงเขาฮอดเมืองในประเทศอื่นๆ นำ

26:12 แล้วตอนพวมเฮ็ดอยู่ฮั้น มีมื้อหนึ่งที่ผู้ข้าพวมไปเมืองดามัสกัส โดยได้ฮับมอบหมายอำนาจจากคณะหัวหน้าผู้นำเครื่องถวาย

26:13 แล้วในเวลาเที่ยง ข้าแต่กษัตริย์ เอ้ย ตอนพวมเดินทางอยู่ ได้มีแสงจ้า หลายกว่าแสงตะเว็น ส่องลงมาจากฟ้าสวรรค์ อ้อมโตผู้ข้าไว้ พร้อมทั้งหมู่คนที่ได้ไปนำกัน

26:14 แล้วบัดพวกผู้ข้าฮั้น พอล้มลงดิน ผู้ข้าได้ยินเสียงที่มีอำนาจเว้ากับผู้ข้าเป็นภาษาฮีบรูว่า ‘เซาโลๆ เอ้ย เป็นหยังเจ้าจั่งข่มเหงเฮา ที่เจ้าถีบใส่แส้แหลมฮั้น เจ้ากะยากแท้เนาะ’

26:15 ผู้ข้าจั่งถามว่า ‘พระผู้เป็นเจ้า เจ้าข้า ท่านเป็นผู้ใด’ เพิ่นจั่งตอบว่า ‘เฮาคือเยซูผู้ที่เจ้าข่มเหง

26:16 บัดนี้ ให้เจ้าลุกขึ้นยืนเด้อ ที่เฮาได้สำแดงให้เจ้าหนิ กะย้อนว่า เฮาสิตั้งเจ้าไว้ให้เป็นผู้ฮับใซ้ ให้ยืนยันเป็นพยานเถิงเหตุการณ์ที่เจ้าได้เห็นนี้ กับเถิงเหตุการณ์แนวที่เฮาสิสำแดงให้แก่เจ้าในอนาคตนำ

26:17 เฮาสิกอบกู้เจ้าให้วิดพ้นจากมือของคนซนซาติยิว กับวิดพ้นจากคนต่างซาติที่เฮาสิใซ้เจ้าไปหาฮั้น

26:18 กะเพื่อสิเปิดตาใจของเขา กับเพื่อเขาสิหันออกจากความมืดมาสู่ความสว่าง กับจากอำนาจของมารซาตานหันมาหาพระเจ้า เพื่อเขาสิได้ฮับการให้อภัยความผิดบาปของเขา จั่งได้ฮับมรดกพร้อมกับผู้บริสุทธิ์ทั้งหลายซึ่งถืกแยกตั้งไว้โดยความเซื่อวางใจในเฮา’

26:19 บัดเป็นจั่งซั้นแล้ว ข้าแต่กษัตริย์อากริปปา เอ้ย ผู้ข้าบ่ได้ขัดขืนเลย แต่ได้เซื่อฟังนิมิตฮั้นที่มาจากสวรรค์

26:20 ผู้ข้ากะเลยตั้งต้นออกไปประกาศให้กับคนยิวอยู่เมืองดามัสกัสก่อน กับในเมืองเยรูซาเล็ม แล้วกะทั่วแคว้นยูเดีย พร้อมได้ประกาศให้ซาวต่างซาตินำ ว่าเขาควรสิกลับใจใหม่ หันมาหาพระเจ้า ใซ้ซีวิตในทางที่สมกับว่าได้กลับใจใหม่แล้ว

26:21 ย้อนเหตุนี้ล่ะพวกยิวจั่งจับผู้ข้าอยู่พระวิหาร กับพยายามหาซ่องทางที่สิฆ่าผู้ข้า

26:22 แล้วเนื่องจากว่าพระเจ้าได้โปรดซ่อยเมตตาผู้ข้ามาตลอดจนฮอดคู่มื้อนี้ ผู้ข้าจั่งยืนตั้งได้ เป็นพยานต่อหน้าต่อตาทั้งผู้ใหญ่กับผู้น้อย เว้าแต่ในเรื่องที่พวกผู้เป็นปากเป็นเสียงของพระเจ้า กับแนวที่โมเสสได้พยากรณ์ไว้ว่าสิมีมาฮั้น

26:23 ที่ว่าพระคริสต์สิต้องทนทุกข์ทรมาน แล้วเพิ่นสิเป็นผู้ตำอิดที่สิเป็นขึ้นมาจากตาย แล้วเพิ่นจั่งประกาศเรื่องแสงสว่างให้ซนซาติอิสราเอลก่อน แล้วให้คนต่างชาตินำ”

26:24 แล้วบัดเปาโลพวมเว้าแก้คดีจั่งซั้น ผู้ว่าเฟสทัสจั่งฮ้องเสียงดังขึ้นมาว่า “เปาโล เอ้ย เจ้าได้เฮียนวิชาหลายเกิน จนฮอดบ้าไปแล้ว”

26:25 แต่เปาโลตอบว่า “ท่านเฟสทัสเจ้าข้า ผู้ข้าบ่ได้บ้าจักหน่อยเลย แต่คำที่ผู้ข้าเว้าหนิประกอบ ด้วยความสัตย์จริง กับด้วยสติปัญญา อย่างมีเหตุมีผล

26:26 คือท่านกษัตริย์อากริปปา ได้ฮู้ข้อความแนวหมู่นี้ดีแล้ว ผู้ข้าจั่งกล้าเว้าอย่างเปิดเผย ย้อนผู้ข้าแน่ใจว่า บ่มีจักแนวในเหตุการณ์หมู่ฮั้นได้พลาดพ้นจากสายตาของท่านกษัตริย์เลย ย้อนว่าเหตุการณ์แนวหมู่ฮั้นบ่ได้เฮ็ดในที่ลี้ลับดอก

26:27 ข้าแต่กษัตริย์อากริปปา เอ้ย ท่านเซื่อผู้เป็นปากเป็นเสียงของพระเจ้าบ่ ผู้ข้าฮู้ว่าท่านเซื่อ”

26:28 แล้วบัดนี้ อากริปปาจั่งเปิดใจตอบเปาโลว่า “คำซักซวนของเจ้าหนิ เกือบสิจูงใจเฮามาเป็นคริสเตียนแล้ว”

26:29 แล้วเปาโลจั่งเว้าว่า “ผู้ข้ามีความปรารถนาดีต่อพระเจ้าว่า บ่ปรารถนาให้แต่ท่านฮับเซื่อแต่ผู้เดียว แต่ปรารถนาให้เมิ้ดคู่คนที่ฟังผู้ข้าในมื้อนี้ให้เป็นคือจั่งผู้ข้าหนิ เว้นแต่เครื่องจองจำนี้ที่ล่ามผู้ข้าไว้”

26:30 บัดพอเปาโลเว้าแนวฮั้นแล้ว กษัตริย์อากริปปากะลุกขึ้น กับผู้ว่าราชการเมือง กับพระนางเบอร์นิส กับเมิ้ดคู่คนที่นั่งอยู่นำกันฮั่น

26:31 บัดออกไปนอกแล้ว ได้ปรึกษาหารือกันว่า “คนนี้บ่ได้เฮ็ดผิดอีหยังที่สมควรสิถืกลงโทษฮอดตายดอก หรือแม้นแต่ถืกจองจำกะบ่ควร”

26:32 แล้วกษัตริย์อากริปปาเว้ากับเฟสทัสเถิงเปาโลว่า “คั่นคนนี้บ่ได้อุทธรณ์เถิงจักรพรรดิซีซาร์ เขาอาจสิถืกปล่อยไปแล้วปานหนิ”