25:1 บัดเฟสทัส เข้าฮับตำแหน่งเป็นผู้ว่าราชการได้สามมื้อแล้ว จั่งเดินทางออกจากเมืองซีซารียาขึ้นไปเมืองเยรูซาเล็ม

25:2 บัดนี้ ผู้นำเครื่องถวายผู้สูงสุด กับคนยิวผู้สำคัญๆ อยู่เมืองเยรูซาเล็ม ได้ฉวยโอกาสมาฟ้องเปาโลต่อเฟสทัส กับได้วิงวอนท่าน

25:3 ขอความกรุณานำเฟสทัส อยากให้ท่านส่งเปาโลมาเมืองเยรูซาเล็ม คือเขาคึดสิวางกับดักไว้ว่าสิคอยท่าฆ่าลาวอยู่กลางทาง

25:4 แต่เฟสทัสได้บอกพวกเขาว่า เปาโลควรสิถืกคุมไว้ในเมืองซีซารียาฮั้น แล้วอีกจักหน่อยลาวเองกะสิเมือเมืองฮั้นนำ

25:5 จั่งซั้น เฟสทัสเลยแนะนำเขาว่า “คั่นเปาโลมีความผิดอีหยังคือจั่งที่พวกเจ้าว่า คนหนึ่งคนใดในพวกเจ้าที่สะดวกกะให้เขาลงไปพร้อมกับเฮาแล้วยื่นคำฟ้องเอาเถอะ”

25:6 แล้วบัดเฟสทัสพักอยู่ฮั่นอีกสิบกว่ามื้อ กะได้ลงไปเมืองซีซารียา แล้วบัดฮอดมื้อใหม่มา ท่านจั่งนั่งบัลลังก์พิพากษา สั่งให้พาเปาโลเข้ามา

25:7 บัดเปาโลเข้ามาแล้ว พวกยิวที่ลงมาจากเมืองเยรูซาเล็มกะพากันยืนอ้อมไว้ จั่งเว้าตู่ใส่ลาวแนวที่ฮ้ายแฮงหลายข้อ แต่บ่มีหลักฐานหรือแนวพิสูจน์ได้เลย

25:8 เปาโลจั่งแก้คดีเอาเองว่า “ข้อยบ่มีข้อคดีความผิดแนวฮั้นดอก บ่ว่าเป็นต่อกฎหมายของคนยิวเฮา หรือต่อพระวิหาร หรือต่อจักรพรรดิซีซาร์ บ่มีจักแนวเลย”

25:9 แต่เฟสทัสฮั้นพร้อมที่สิเอาใจพวกยิวจั่งถามเปาโลว่า “เจ้าสิยอมขึ้นไปยังเมืองเยรูซาเล็มให้เฮาซำระความเรื่องนี่อยู่ฮั่นบ่”

25:10 แล้วเปาโลตอบว่า “ส่วนข้อยหนิ ข้อยได้ยืนอยู่ศาลตัดสินของซีซาร์แล้ว ที่สิพิจารณาคดีอยู่เมืองซีซารียานี่กะดีแล้ว ฝ่ายคนยิวฮั้นข้อยบ่ได้เฮ็ดผิดอีหยังต่อเขาจักแนวเลย ตามที่ท่านฮู้ดีอยู่แล้ว

25:11 คือ คั่นข้อยได้เฮ็ดผิดอีหลี หรือได้เฮ็ดหยังที่ควรสิเป็นโทษเถิงตาย ข้อยกะยอมตายบ่ขัดขืนอีหยังเลย แต่คั่นเรื่องที่เขาพวกนี้ฟ้องฮ้องข้อยฮั้นเป็นความเท็จ กะบ่มีผู้ใดมีสิทธิ์อำนาจที่สิมอบข้อยไว้ให้เขาเลย แต่บัดนี้ข้อยขอร้องอุทธรณ์เถิงซีซาร์”

25:12 บัดนี้ เฟสทัส พอได้หารือกันกับคณะที่ปรึกษาแล้วจั่งตอบเปาโลว่า “เจ้าได้อุทธรณ์เถิงซีซาร์บ้อ จั่งซั้น เจ้ากะสิต้องไปเข้าเฝ้าซีซาร์”

25:13 แล้วอยู่มาอีกหลายมื้อ กษัตริย์อากริปปา กับพระนางเบอร์นิส ได้มาเมืองซีซารียา เพื่อเยี่ยมทักทายกันกับเฟสทัสฮั้น

25:14 ตอนท่านอากริปปากับนางเบอร์นิสอยู่ฮั่นหลายมื้อแล้ว ผู้ว่าเฟสทัสกะเว้าเรื่องเปาโลกับคดีต่างๆ ฮั้นให้กษัตริย์ฟัง บอกว่า “มีซายคนหนึ่งเป็นจำเลยที่อดีตผู้ว่าเฟลิกส์ได้ขังถิ้มไว้

25:15 ในเรื่องผู้นี้ บัดผู้ข้าได้ไปเมืองเยรูซาเล็ม คณะหัวหน้าผู้นำเครื่องถวาย กับพวกผู้หลักผู้ใหญ่ของพวกยิวอยู่ฮั้น มาฟ้องขอให้ผู้ข้าตัดสินลงโทษเขา

25:16 ผู้ข้าจั่งตอบพวกเขาว่า ‘บ่แม่นระเบียบการของศาลโรมที่สิมอบผู้ต้องหาให้สู่การลงโทษก่อนผู้ฟ้องคดีกับผู้ต้องหามาพ้อหน้ากัน จั่งให้ผู้ต้องหามีโอกาสแก้คดีในข้อหาฮั้น’

25:17 จั่งซั้น บัดพวกเขาผู้ฟ้องคดีได้มาฮอด ผู้ข้าบ่ได้คอยถ้า แต่บัดมื้อใหม่มาผู้ข้าได้ขึ้นนั่งบัลลังก์ตัดสิน แล้วสั่งให้นำผู้ต้องหาเข้ามา

25:18 บัดพวกผู้ฟ้องคดีฮั้นยืนขึ้น เขาบ่ได้เว้ากล่าวหาผู้ต้องหา ตามคดีแนวที่ผู้ข้าคาดคึด

25:19 เป็นแค่ปัญหาเถียงกันตามเรื่องศาสนาของพวกเขาเอง กับเรื่องคนหนึ่งที่ซื่อ เยซู ที่ตายแล้ว แต่เปาโลผู้เป็นผู้ต้องหาฮั้นยืนยันว่าเพิ่นยังเป็นอยู่

25:20 แล้วย้อนว่าผู้ข้ายังบ่ทันแน่ใจว่าสิออกการพิจารณาแบบใดดี ผู้ข้าจั่งถามเปาโลฮั้นว่า สิยอมขึ้นไปเมืองเยรูซาเล็มให้ซำระความอยู่ฮั่นหรือบ่

25:21 แต่บัดเปาโลได้ขอไว้นี้ก่อน แล้วจั่งอุทธรณ์ให้ซีซาร์ออกัสตัสพิจารณาตัดสินเอาเอง ผู้ข้าจั่งสั่งให้เอาเขาไว้จนกว่ามีโอกาสส่งไปเถิงท่านซีซาร์”

25:22 บัดนี้ อากริปปา เลยเว้ากับเฟสทัสว่า “เฮาเองอยากสิฟังคนผู้ฮั้นนำ” เฟสทัสจั่งเว้าว่า “มื้ออื่นท่านกะสิได้ฟังเขาแล้ว”

25:23 บัดมื้ออื่นมา อากริปปา กับเบอร์นิส ได้มาด้วยสง่าผ่าเผยหลาย จั่งเข้าไปประทับในห้องพิจารณาตัดสิน พร้อมกับพวกนายพัน กับพวกคนสำคัญของเมือง แล้วเฟสทัสจั่งสั่งให้นำเปาโลเข้ามา

25:24 แล้วเฟสทัสได้เว้าว่า “ท่านกษัตริย์อากริปปา พร้อมกับพวกท่านทั้งหลายในที่ประซุมอยู่ที่นี่ พวกท่านเห็นซายคนนี้ เป็นคนที่พวกยิวทั้งในเมืองเยรูซาเล็มกับอยู่นี่นำ ได้ร้องขอต่อผู้ข้า ว่า ผู้นี้บ่ควรสิมีซีวิตอยู่ต่อไป

25:25 แต่บัดผู้ข้าเห็นว่า ผู้ต้องหานี้บ่ได้เฮ็ดผิดแนวหนึ่งแนวใดที่สมควรสิตาย กับย้อนโตเขาเองได้อุทธรณ์เถิง ออกัสตัส ผู้ข้าได้ตกลงใจว่าสิส่งผู้ต้องหาไปเลย ตามคำอุทธรณ์ของเขา

25:26 คือ ผู้ข้าบ่มีรายงานแน่ซัดเรื่องคนนี้ ที่สิถวายท่านจักรพรรดิ์ของผู้ข้า จั่งซั้นผู้ข้าเลยนำเขาออกมาต่อหน้าพวกท่าน แล้วโดยเฉพาะอย่างยิ่งต่อท่าน กษัตริย์อากริปปา หวังว่าบัดท่านสอบสวนผู้ต้องหาผู้นี้แล้ว ผู้ข้าคือสิมีข้อมูลเพียงพอที่สิถวายรายงานต่อจักรพรรดิ์ของผู้ข้า

25:27 ย้อนผู้ข้าเห็นว่า มันบ่คือที่สิส่งผู้ต้องหาไปเปล่าๆ โดยบ่ได้ส่งข้อหาไปนำ”