24:1 แล้วอยู่มาอีกห้ามื้อ อานาเนีย ผู้นำเครื่องถวายผู้สูงสุด จั่งลงไปกับพวกผู้หลักผู้ใหญ่ของเมือง พร้อมทั้งนักกฎหมายผู้หนึ่งที่เป็นนักเว้าซื่อ เทอร์ทูลลัส พวกนี้ได้อธิบายคำฟ้องร้องต่อเปาโลให้ท่านผู้ว่าฟัง

24:2 แล้วบัดเปาโลถืกเอิ้นเข้ามา เทอร์ทูลลัสจั่งตั้งต้นเริ่มฟ้องใส่ลาวว่า “ท่านเฟลิกส์ผู้มีเกียรติ ด้วยท่านเอง พวกผู้ข้าได้มีความสงบสุข กับความเจริญหลาย ย้อนท่านผู้ว่าได้นำมาให้ซนซาติของพวกผู้ข้าโดยการคุ้มครองอันดีงามของท่าน

24:3 ผู้ข้าทั้งหลายน้อมฮับคู่อย่างอยู่คู่หม่องโดยความกตัญญูเป็นอย่างยิ่งอยู่เสมอ

24:4 แต่เพื่อบ่ให้รบกวนท่านหลายกว่านี้อีก ผู้ข้าขอความกรุณาโปรดฟังผู้ข้าจักหน่อยหนึ่ง

24:5 คือผู้ข้าทั้งหลายเห็นว่า ซายคนนี้เป็นคนอันธพาลที่ยุยงพวกซนซาติยิวให้เกิดการวุ่นวายฮอดทั่วโลก แล้วกะเป็นโตโจกของพวกนาซาเร็ธฮั้นนำ

24:6 กับอีกประเด็นหนึ่ง เขาหมายสิเฮ็ดให้พระวิหารเป็นมลทิน ผู้ข้าทั้งหลายจั่งจับเขาไว้ แล้วว่าสิพิพากษาเขาตามกฎหมายของพวกผู้ข้า

24:7 แต่นายพันลีเซียสได้มาใซ้อำนาจแย่งโตเขาออกจากมือของพวกผู้ข้าไปก่อน

24:8 แล้วกะสั่งให้พวกผู้กล่าวหามาฟ้องเขาต่อหน้าท่าน คั่นท่านเองสิไต่สวนเขา ท่านสิฮู้ได้ว่า ข้อกล่าวหาของพวกผู้ข้าแม่นความจริงหรือบ่”

24:9 ฝ่ายพวกยิวกะสนับสนุนคำกล่าวหาโดยยืนยันว่าเป็นจริงเมิ้ด

24:10 บัดผู้ว่าราชการเมืองอนุญาตให้เปาโลเว้า ลาวเลยเว้าว่า “เนื่องจากที่ผู้ข้าได้ฮู้ว่า ท่านเป็นผู้พิพากษาให้ซนซาตินี้หลายปีมาแล้ว ผู้ข้าจั่งขอแก้คดีของผู้ข้าโดยความยินดี

24:11 ท่านอาจสืบฮู้ได้ว่า มันบ่เกินสิบสองมื้อตั้งแต่ผู้ข้าได้ขึ้นไปนมัสการในเมืองเยรูซาเล็มฮั้น

24:12 แล้วคนพวกนี้บ่ได้เห็นผู้ข้าเถียงกันกับผู้หนึ่งผู้ใด หรือยุยงประซาซนให้วุ่นวายเลย บ่ว่าในพระวิหาร ในศาลาธรรม หรือในเมืองกะดี

24:13 แล้วพวกเขาบ่สามารถที่สิพิสูจน์เหตุการณ์ทั้งเมิ้ดแนวหมู่นี้ที่เขากำลังฟ้องใส่ผู้ข้าได้

24:14 แต่ว่าผู้ข้าขอฮับต่อหน้าท่านผู้ว่าอย่างหนึ่ง คือตาม ‘ทางฮั้น’ ที่เขาถือว่าเป็นลัทธินอกรีต ผู้ข้านมัสการพระเจ้าของพวกพ่อตระกูลทั้งหลายของผู้ข้า จั่งได้เซื่อถือคำที่มีเขียนไว้ในกฎบัญญัติ กับในข้อเขียนของผู้เป็นปากเป็นเสียงทั้งเมิ้ด

24:15 ผู้ข้าจั่งมีความหวังในพระเจ้าคือจั่งพวกเขาเอง คือมีความหวังว่าคนเมิ้ดทั้งปวง บ่ว่าสิเป็นผู้ดีหรือผู้บ่ดีกะตาม สิได้เป็นขึ้นมาจากความตายเมิ้ดคู่คน

24:16 ในข้อนี้ผู้ข้าอุตส่าห์อยู่ตลอดที่สิตามจิตใต้สำนึกผิดซอบบริสุทธิ์ โดยบ่มีผิดต่อพระเจ้ากับต่อมนุษย์นำ

24:17 บัดนี้ หลังจากหลายปีมาแล้ว ผู้ข้าได้นำเงินการกุศลมาบริจาคซนซาติของผู้ข้า พร้อมกับเครื่องบูซานำ

24:18 พอผู้ข้าพวมเฮ็ดอยู่ฮั้น พวกยิวผู้ลางคนที่มาจากแคว้นเอเชีย ได้พ้อผู้ข้าในพระวิหารอยู่แต่ผู้เดียวตอนที่ผู้ข้าซำระโตตามพิธี บ่มีใผก่อการอาละวาด หรือการวุ่นวายอีหยังเลย

24:19 คั่นคนหมู่ฮั้นมีเรื่องอีหยังที่สิฟ้องผู้ข้า เขาควรสิมาฟ้องต่อหน้าท่านผู้ว่าอยู่นี่แล้ว

24:20 หรือขอให้คนหมู่นี้เองกล่าวเรื่องความผิดที่พวกเขาหาว่าได้เห็น บัดผู้ข้ายืนอยู่ต่อหน้าสภา

24:21 เว้นไว้แค่ข้อเดียวที่ข้อยได้ฮ้องขึ้นในหว่างกลางพวกเขาว่า ‘มื้อนี้ข้อยถืกพิจารณาต่อหน้าพวกเจ้า ย้อนเหตุเรื่องการเป็นขึ้นมาจากตาย’”

24:22 บัดผู้ว่าเฟลิกส์ได้ยินความแนวหมู่นี้ ท่านกะเลื่อนการพิจารณาไว้ก่อน ย้อนท่านได้เข้าใจเรื่องของ “ทางฮั้น” เป็นอย่างดีแล้ว ท่านจั่งเว้าให้เปาโลฟังว่า “บัดนายพันลีเซียสลงมาแล้ว เฮาสิซำระความของเจ้า”

24:23 แล้วผู้ว่าเฟลิกส์สั่งนายร้อยให้คุมโตเปาโลไว้ โดยให้ลาวมีความอิสระ บ่ให้ห้ามหมู่ลาวที่สิเข้ามาปรนนิบัติหรือเยี่ยมยามลาว

24:24 บัดบ่จักมื้อผ่านมา ผู้ว่าเฟลิกส์ มากับภรรยาซื่อ ดรูสิลลา เป็นซาติยิว แล้วจั่งเอิ้นให้เปาโลมา ได้ฟังลาวเว้าเรื่องความเซื่อในพระคริสต์

24:25 แล้วบัดลาวอ้างเหตุผลเถิงเรื่องความซอบธรรม การประมาณโต กับการพิพากษาอันใหญ่หลวงที่สิมาฮั้น ท่านเฟลิกส์เกิดหย้านจนโตสั่น จั่งเว้าว่า “งวดนี้ให้ไปก่อนเด้อ บัดเฮามีโอกาสดีเฮาสิเอิ้นเจ้ามาอีก”

24:26 อีกอย่างหนึ่ง ท่านผู้ว่าเฟลิกส์ฮั้นหวังว่า เปาโลอาจสิให้เงินสินบน เพื่อท่านสิได้ปล่อยลาวไป จั่งซั้นท่านจั่งเอิ้นเปาโลมาซุมกันดุ

24:27 แต่อยู่มาอีกสองปี นายปอรสิอัส เฟสทัส มาฮับราชการแทนเฟลิกส์ เฟลิกส์หวังอยากให้ผู้นำพวกยิวเห็นดีเห็นซอบกับเขา เลยถิ้มเปาโลไว้ในคุก