23:1 ส่วนเปาโลเลยจ้องเบิ่งพวกสมาชิกสภา แล้วเว้าว่า “ท่านพี่น้องทั้งหลาย ผู้ข้าได้ใซ้ซีวิตต่อหน้าพระเจ้าโดยจิตใต้สำนึกผิดซอบอันบริสุทธิ์จนฮอดมื้อนี้”

23:2 บัดนี้ อานาเนีย ผู้เป็นผู้นำเครื่องถวายผู้สูงสุด เลยสั่งคนที่ยืนอยู่ใกล้เปาโลให้ตบปากลาว

23:3 แล้วเปาโลกะตอบเขาว่า “พระเจ้าสิตบเจ้า เจ้าผู้เป็นฝาผนังที่ฉาบโดยปูนขาว เจ้านั่งพิพากษาข้อยตามกฎบัญญัติ แล้วกะยังสั่งให้เขาตบหน้าข้อย ซึ่งเป็นการผิดกฎบัญญัติคือกัน”

23:4 บัดนี้ คนที่ยืนอยู่ถัดกันฮั้นจั่งเว้าว่า “เจ้าเว้าหยาบคาย ใส่ผู้นำเครื่องถวายผู้สูงสุดของพระเจ้าจั่งซี้ได้บ้อ”

23:5 เปาโลเลยตอบว่า “พี่น้องทั้งหลายเอ้ย ข้อยบ่ฮู้ว่าท่านเป็นผู้นำเครื่องถวายผู้สูงสุด ย้อนมีคำเขียนไว้แล้วว่า ‘อย่าเว้าหยาบซ้าต่อผู้หลักผู้ใหญ่เหนือเจ้าเลย’”

23:6 บัดเปาโลเห็นว่า พวกคนที่อยู่ในประซุมสภาฮั้น ฝ่ายหนึ่งเป็นพวกสะดูสี กับอีกฝ่ายหนึ่งเป็นพวกฟาริสี ลาวจั่งฮ้องขึ้นต่อหน้าที่ประซุมว่า “ท่านพี่น้องทั้งหลาย ข้อยหนิเป็นฟาริสี กับเป็นลูกซายของคนฟาริสีนำ ที่ข้อยถืกการพิจารณานี้ กะย้อนว่าข้อยมีความหวังในการเป็นขึ้นมาจากตาย”

23:7 พอแต่ลาวเว้าจั่งซั้นแล้ว พวกฟาริสีกับพวกสะดูสี ได้เกิดการโต้เถียงกันอย่างใหญ่ ที่ประซุมสภาจั่งแตกเป็นสองฟากสองฝ่าย

23:8 นี้กะย้อนว่าพวกสะดูสีถือกันว่า การที่เป็นขึ้นมาจากตายฮั้นกะบ่มีเลย กับว่าเทวทูตหรือวิญญาณกะบ่มีนำ แต่พวกฟาริสีถือว่ามีเมิ้ดทั้งสองแนว

23:9 แล้วเกิดมีเรื่องอาละวาดกันอย่างใหญ่ พวกธรรมาจารย์ฯที่อยู่ฝ่ายคณะฟาริสีได้ลุกขึ้นอ้างว่า “เฮาบ่เห็นว่าคนนี้มีความผิดอีหยังเลย คือคั่นว่ามีวิญญาณกะดี หรือเทวทูตกะดีที่ได้เว้ากับเขา ขออย่าให้พวกเฮาต่อต้านกับพระเจ้าเลย”

23:10 แล้วบัดการโต้เถียงกันฮั้นได้เกิดรุนแรงแฮงขึ้น นายพันหย้านว่าเขาสิจับโตเปาโลดึงยาดกันจนฉีกเป็นท่อนๆ ลาวเลยสั่งให้พวกทหารลงไปฮับเอาโตเปาโลออกจากพวกคนฮั้น กับลาวเข้าไปไว้ในค่ายทหาร

23:11 แต่ว่าตอนกลางคืนมื้อฮั้นเอง พระผู้เป็นเจ้าได้ยืนอยู่กับเปาโล ได้เว้าว่า “เปาโลเอ้ย ให้มีกำลังใจเด้อ คือเจ้าได้เป็นพยานให้เฮาในเมืองเยรูซาเล็มนี้แนวใด เจ้ากะสิต้องไปเป็นพยานในกรุงโรมแนวฮั้นนำ”

23:12 แล้วฮอดตอนเซ้ามา พวกยิวผู้ลางคนได้ฮ่วมกันสาบานโตไว้ว่า เขาสิบ่กินกับสิบ่ดื่มอีหยังจนกว่าสิได้ฆ่าเปาโลให้ได้

23:13 ฝ่ายคนที่ฮ่วมกันปองร้ายฮั้นมีสี่สิบกว่าคน

23:14 คนหมู่ฮั้นจั่งไปหาคณะหัวหน้าผู้นำเครื่องถวายฯ กับพวกผู้หลักผู้ใหญ่เว้าว่า “พวกข้อยได้สาบานโตไว้ว่า สิบ่กินอีหยังจนกว่าสิได้ฆ่าเปาโลให้ได้

23:15 บัดนี้ ให้พวกเจ้ากับพวกสมาชิกสภาฝากความไปหานายพัน ให้ลาวส่งโตเปาโลลงมาหาพวกเจ้ามื้ออื่น เพื่อสิได้ซักถามความให้ซัดขึ้นกว่าแต่ก่อน ฝ่ายพวกข้อยกะสิเตรียมโตไว้คอยถ้า เพื่อสิฆ่าเปาโลตอนใกล้สิมาฮอด”

23:16 แต่พอลูกซายของน้องสาวเปาโลได้ยินพวกเขาวางแผนการกับดักเพื่อสิฆ่าเปาโล กะได้ขึ้นไปในค่ายทหารเพื่อบอกเปาโลไว้

23:17 พอหลานบอกลาวแล้ว เปาโลจั่งเอิ้นนายร้อยคนหนึ่งมา เว้าว่า “ขอให้นำซายหนุ่มคนนี้ไปหานายพันแหน่ ย้อนเขามีแนวสำคัญแนวหนึ่งที่สิต้องแจ้งให้นายพันฮู้จัก”

23:18 จั่งซั้น นายร้อยเลยนำซายหนุ่มฮั้นไปหานายพันเว้าว่า “เปาโลผู้ถืกขังอยู่ฮั้นเอิ้นข้อย ให้นำซายหนุ่มผู้นี้มาหานาย ย้อนเขามีแนวสำคัญที่สิต้องแจ้งให้นายฮู้จัก”

23:19 นายพันจั่งจูงมือซายหนุ่มฮั้นไปตามลำพังเพื่อเว้าเป็นส่วนโต แล้วถามว่า “หนุ่มสิเว้าอีหยังกับเฮา”

23:20 ซายหนุ่มฮั้นจั่งตอบว่า “พวกยิวตกลงกันสิขอนายให้ส่งลุงเปาโลลงไปสภามื้ออื่น เฮ็ดคือจั่งว่าสิสอบสวนเรื่องลาวให้ซัดขึ้นกว่าแต่ก่อน

23:21 แต่ขออย่าเฮ็ดตามคำขอร้องเขา ย้อนว่าพวกเขามีอยู่สี่สิบคน วางแผนการกับดักไว้ว่า สิคอยถ้าปองร้ายใส่เปาโล กับได้สาบานโตไว้ว่าสิบ่กินหรือดื่มอีหยังจนกว่าสิได้ฆ่าลาวให้ได้ แล้วตอนนี้พวกเขากะพร้อมแล้ว ถ้าแต่นายออกคำสั่งท่อฮั้น”

23:22 พอได้ฮับฟังแล้ว นายพันจั่งปล่อยให้ซายหนุ่มไป สั่งไว้ว่า “อย่าบอกผู้ใดเลย ว่า โตได้แจ้งความเรื่องนี้กับเฮา”

23:23 แล้วนายพันจั่งเอิ้นนายร้อยสองคนมา สั่งว่า “ให้จัดพลทหารสองร้อยคน กับทหารม้าเจ็ดสิบคน กับทหารหอกสองร้อยคนให้พร้อมเด้อ แล้วสิให้ไปเมืองซีซารียาตอนสามทุ่มในคืนนี้

23:24 กับให้จัดม้ามาให้เปาโลขี่ เพื่อสิส่งไปหาเฟลิกส์ผู้ว่าราชการเมือง อย่างปลอดภัย”

23:25 แล้วนายพันจั่งเขียนจดหมายไปยังผู้ว่าแนวนี้

23:26 “เรียน ท่านเฟลิกส์ ผู้ว่าราชการ จาก นายพัน คลาวดิอัส ลีเซียส

23:27 คนผู้นี้ได้ถืกพวกยิวอยู่ทางนี้จับไว้ หมายไว้ว่าสิฆ่าเขา แต่พอได้ข่าวว่าเขาเป็นคนสัญชาติโรม ผู้ข้าได้นำกลุ่มทหารไปซ่อยกอบกู้เขาไว้

23:28 แล้วบัดผู้ข้าอยากฮู้เหตุที่พวกยิวฟ้องเขา ผู้ข้าจั่งพาเขาไปสภาของพวกยิว

23:29 ซึ่งผู้ข้าเห็นว่าเขาถืกฟ้องร้องในเรื่องกฎเกณฑ์ตามประเพณีของพวกเขา แต่บ่มีข้อหาอีหยังที่เขาควรสิตายหรือควรสิต้องขังไว้

23:30 แล้วพอผู้ข้าได้ฮู้ว่า พวกยิวมีแผนการปองร้ายใส่คนนี้ ผู้ข้าจั่งส่งเขามาหาท่านผู้ว่า แล้วได้สั่งให้พวกกล่าวหามาว่าความให้ผู้ฮั้นต่อหน้าท่านผู้ว่า”

23:31 จั่งซั้น บัดฮอดตอนกลางคืน พวกทหารจั่งพาเปาโลไปเมืองอันทิปาตรีส์ตามคำสั่งฮั้น

23:32 บัดฮอดมื้ออื่นเซ้า เขาให้ทหารม้าไปส่งเปาโล แล้วเขากะกลับไปค่ายทหาร

23:33 บัดทหารม้าไปฮอดเมืองซีซารียาแล้ว จั่งส่งจดหมายไปหาผู้ว่าราชการเมือง กับได้มอบเปาโลไว้ให้ท่านนำ

23:34 แล้วบัดผู้ว่าราชการเมืองได้อ่านจดหมายแล้ว จั่งถามเปาโลว่าลาวมาจากแคว้นใด บัดพอท่านผู้ว่าฮู้ว่ามาจากซีลีเซีย

23:35 ท่านผู้ว่าจั่งเว้าว่า “บัดพวกผู้กล่าวหาเจ้ามาพร้อมกันแล้ว เฮาสิฟังคำให้การของเจ้า” แล้วท่านผู้ว่าจั่งสั่งให้คุมโตเปาโลไปไว้ที่ศาลปรีโทเรียมของเฮโรด