21:1 ต่อมา มันเป็นไปที่ว่า หลังจากพวกเฮาลาพวกเขาหมู่ฮั้นแล้วกะแล่นเฮือตรงไปเกาะโขส แล้วอีกมื้อหนึ่งกะมาฮอดเกาะโรดส์ บัดออกจากฮั้นกะมาฮอดเมืองปาทารา

21:2 แล้วพวกเฮาได้พ้อเฮือลำหนึ่งที่พวมสิแล่นไปเมืองฟินิเซีย แล้วพวกเฮาจั่งลงเฮือลำฮั้นแล่นต่อไป

21:3 แล้วพอได้เห็นเกาะไซปรัส พวกเฮาได้ผ่านเกาะฮั้นไปทางขวา แล่นไปแคว้นซีเรีย แล้วจั่งจอดเฮืออยู่ท่าเมืองไทระ ย้อนสิเอาของบรรทุกขึ้นอยู่ท่าฮั่น

21:4 บัดได้พ้อพวกลูกศิษย์อยู่ฮั้นแล้ว เฮาได้พักอยู่กับเขาเจ็ดมื้อ แล้วลูกศิษย์อยู่ฮั่นได้เตือนเปาโลโดยทางพระวิญญาณ ว่า บ่ควรขึ้นไปยังเมืองเยรูซาเล็ม

21:5 แล้วบัดเจ็ดมื้อฮั้นผ่านไปแล้วพวกเฮากะลาจากไป แล้วพวกลูกศิษย์พร้อมทั้งเมียกับลูกๆ ของเขาได้ไปส่งพวกเฮาออกจากเมืองไป แล้วพวกเฮาทั้งหลายกะได้คุกเข่าลงอธิษฐานนำกันอยู่ซายหาด

21:6 บัดลากันและกันแล้ว พวกเฮาได้ลงเฮือ แล้วพวกเขาจั่งลบเมือเฮือน

21:7 บัดพวกเฮาแล่นเฮือมาแต่เมืองไทระไปฮอดเมืองทอเลเมอิสแล้วกะเมิ้ดไปทางทะเล เลยขึ้นไปทางบกต่อ แล้วจั่งทักทายกันกับพวกพี่น้องอยู่เมืองฮั้น จั่งได้พักอยู่กับเขาคืนเดียว

21:8 บัดฮอดมื้ออื่นเซ้ามา พวกเฮาที่เป็นหมู่เดินทางพร้อมกับเปาโลกะลาไป แล้วได้เดินทางมาฮอดเมืองซีซารียา จั่งได้เข้าไปในเฮือนของฟีลิป ผู้เป็นผู้ประกาศข่าวประเสริฐ ที่เป็นคนหนึ่งในพวกเจ็ดคนฮั้น

21:9 ฟีลิปนี้มีลูกสาวพรหมจารีสี่คน เขาทั้งสี่นี้ได้เป็นผู้บรรยายพระคำ

21:10 บัดพวกเฮาพักอยู่ฮั่นหลายมื้อแล้ว ได้มีผู้บรรยายพระคำอีกผู้หนึ่งลงมาจากแคว้นยูเดีย ซื่อ อากาบัส

21:11 บัดมาฮอดแล้วอากาบัสกะได้เอาสายคาดแอวของเปาโล ผูกมัดทั้งมือทั้งตีนของลาวไว้ จั่งบอกว่า “พระวิญญาณได้เว้าว่า ‘พวกยิวอยู่เมืองเยรูซาเล็มสิผูกมัดเจ้าของสายคาดแอวนี้ไว้ กับสิมอบเขาไว้ในมือของคนต่างชาติ’”

21:12 บัดได้ยินจั่งซั้น พวกเฮาพร้อมกับคนทั้งหลายอยู่ฮั่น เลยอ้อนวอนเปาโลบ่ให้ขึ้นไปเมืองเยรูซาเล็ม

21:13 แต่เปาโลตอบว่า “เป็นหยังพวกเจ้าจั่งฮ้องไห้พาข้อยซ้ำใจหลาย คือว่าข้อยหนิพร้อมอยู่แล้ว บ่ว่าแต่ให้เขาผูกมัดโตเองไว้อย่างเดียว แต่ว่าพร้อมที่สิตายอยู่เมืองเยรูซาเล็มนำ ย้อนเห็นแก่พระนามของพระเยซูเจ้า”

21:14 บัดเห็นว่าลาวบ่ยอมฟัง พวกเฮากะเซาขอร้อง แล้วจั่งเว้าว่า “ขอให้เป็นไปตามพระประสงค์ของพระผู้เป็นเจ้าเถอะ”

21:15 หลังจากได้พักอยู่ฮั้นมา พวกเฮากะจัดข้าวของ แล้วจั่งเดินทางขึ้นไปเมืองเยรูซาเล็ม

21:16 แล้วลูกศิษย์ผู้ลางคนจากเมืองซีซารียาได้ไปนำพวกเฮา แล้วจั่งนำพวกเฮาไปหาคนหนึ่งซื่อ มนาสัน เป็นซาวเกาะไซปรัส กับเป็นลูกศิษย์รุ่นเก่า แล้วพวกเฮาได้พักอาศัยอยู่กับคนฮั้น

21:17 แล้วบัดพวกเฮาได้มาฮอดเมืองเยรูซาเล็ม พวกพี่น้องอยู่ฮั่นกะต้อนฮับเอาพวกเฮาไว้ด้วยความยินดี

21:18 แล้วบัดมื้อใหม่มา เปาโลได้ไปกับพวกเฮา เข้าไปหายากอบ แล้วพวกผู้หลักผู้ใหญ่กะอยู่ฮั้นนำ

21:19 บัดเปาโลได้ทักทายกันกับพวกเขาแล้ว จั่งได้เว้าเหตุการณ์ทั้งปวงตามลำดับ ที่พระเจ้าได้เฮ็ดในหมู่คนต่างชาติ ผ่านทางการปรนนิบัติฮับใซ้ของลาว

21:20 บัดคนทั้งหลายได้ยินแล้ว พวกเขาจั่งสรรเสริญยกย่องพระผู้เป็นเจ้า กับได้เว้ากับเปาโลว่า “อ้ายในพระเจ้าเอ้ย เจ้าเคยเห็นแล้วว่ามีพวกยิวเป็นพันๆ คนที่ได้ฮับเซื่อแล้ว แต่ยังมีใจฮ้อนฮนในการถือตามกฎบัญญัติอย่างเคร่งครัด

21:21 แล้วพวกเขาเคยได้ยินเถิงเจ้าว่า เจ้าได้สอนพวกคนยิวที่อยู่กับหมู่พวกคนต่างซาติฮั่น ให้ปะถิ้มโมเสส กับว่าบ่ต้องให้ลูกๆ ของเขาเข้าสุหนัต หรือดำเนินตามฮีตครองประเพณีเก่าฮั้น

21:22 เรื่องฮั้นเป็นจั่งใด คือดีบ่ดีทั้งสภาสิต้องมาตุ้มโฮมตัดสินกัน ย้อนพวกเขาต้องได้ยินว่าเจ้าได้มาฮอดแล้ว

21:23 จั่งซั้น ให้เฮ็ดตามที่เฮาสิบอกเจ้าไว้เด้อ คือว่าพวกเฮามีผู้ซายอยู่สี่คนที่ได้ปฏิญาณโตไว้

21:24 คือให้เจ้าไปซำระโตกับซายสี่คนฮั้น กับซ่อยออกค่าธรรมเนียมในการบูซานำ เพื่อเขาสิได้โกนหัว นี้กะเพื่อแสดงว่า มันบ่แม่นความจริง เรื่องที่พวกเขาได้ยินฮั้น แต่เจ้าได้ดำเนินตามระเบียบการในการฮักษากฎบัญญัติของโมเสส

21:25 แต่ฝ่ายคนต่างชาติที่เซื่อฮั้น พวกเฮาได้เขียนจดหมายสรุป บอกพวกเขาว่าบ่ต้องถืออีหยังจั่งซั้นดอก เว้นแต่ว่าพวกเขาควรสิฮักษาโตเอง เว้นไว้จากการกินของถวายบูซาต่อฮูปเคารพ กับจากการกินเลือด กับจากการกินซี้นของสัตว์ที่ถืกฮัดคอตาย พร้อมจากการเล่นซู้ล่วงประเวณีนำ”

21:26 บัดนี้ พอฮอดมื้ออื่นเซ้ามา เปาโลจั่งไปเฮ็ดพิธีซำระโตนำซายสี่คนฮั้น แล้วจั่งเข้าไปในพระวิหาร บอกผู้นำเครื่องถวายเถิงมื้อครบกำหนดการซำระโตฮั้น ซึ่งเป็นยามถวายเครื่องบูซาสำหรับพวกเขาแต่ละคน

21:27 แล้วบัดพอเกือบครบเจ็ดมื้อฮั้น พอดีพวกยิวที่มาจากแคว้นเอเชีย บัดเห็นเปาโลในพระวิหารกะได้ยุยงประซาซน แล้วลงมือจับโตเปาโลไว้

21:28 แล้วฮ้องกันขึ้นว่า “ซนซาติอิสราเอลเอ้ย ให้ซ่อยกันเด้อ แม่นซายคนนี้ล่ะที่สอนเมิ้ดคู่คนทั่วคู่ตำบลให้ต่อต้านซนซาติเฮา พร้อมกับต่อต้านกฎบัญญัติ กับต่อต้านสถานศักดิ์สิทธิ์นี้นำ กับหลายกว่าฮั้นอีก เขาเคยพาคนซาวกรีกเข้ามาในพระวิหารอันศักดิ์สิทธิ์นี้นำ จั่งได้เฮ็ดให้หม่องบริสุทธิ์นี้เป็นมลทินนำ”

21:29 (คือพวกเขาเว้าจั่งซั้นย้อนแต่ก่อนเคยเห็น โตรฟีมัส ซาวเมืองเอเฟซัส อยู่ในเมืองกับเปาโล พวกเขาจั่งเข้าใจผิดว่าเปาโลได้พาคนฮั้นเข้ามาในพระวิหาร)

21:30 แล้วบัดนี้ คนเมิ้ดทั้งเมืองกะฮือกันขึ้น แล่นเข้าไปจับโตเปาโล ลากลาวออกจากพระวิหาร แล้วฝักตูพระวิหารถืกปิดไว้ ในหว่างฮั้นพอดี

21:31 บัดเขาพวมสิจัดการฆ่าเปาโล ข่าวได้ลือไปซอดหูของนายพันกองทัพว่า เมืองเยรูซาเล็มเกิดการวุ่นวายขึ้นทั้งเมือง

21:32 ในตอนฮั้น นายพันจั่งคุมพวกทหารกับพวกนายร้อย ได้แล่นลงไปหาคนกลุ่มฮั้น บัดพวกเขาเห็นนายพันกับพวกทหารพวมแล่นลงมา เลยถอยออกมาเซาเฆี่ยนตีเปาโล

21:33 นายพันจั่งเข้าไปใกล้แล้วจับโตเปาโลไว้ สั่งให้เอาโซ่สองเส้นล่ามลาวไว้แล้วสอบถามว่า คนนี้เป็นใผแล้วเขาได้เฮ็ดอีหยัง

21:34 บัดนี้ ผู้ลางคนในหมู่คนฮั้นฮ้องว่าจั่งซี้ อีกผู้ลางคนกะฮ้องว่าจั่งซั้น บัดนายพันเอาความแน่นอนบ่ได้ย้อนวุ่นวายหลาย เลยสั่งให้นำเอาเปาโลเข้าไปในค่ายทหาร

21:35 แล้วบัดฮอดขั้นไดของค่ายทหารแล้ว พวกทหารต้องยกโตเปาโลขึ้นไว้ ย้อนพวกม็อบฮั้นอยากเฮ็ดร้ายใส่โตลาว

21:36 คือคู่คนในหมู่ฮั้นตามไปฮ้องว่า “ให้จัดการโลดๆ”

21:37 บัดพวกทหารพวมสิพาเปาโลเข้าไปในค่ายทหาร เปาโลจั่งเว้ากับนายพันว่า “ข้อยขอเว้ากับท่านจักหน่อย” นายพันจั่งถามว่า “เจ้าเว้าภาษากรีกเป็นอยู่บ้อ

21:38 เจ้าเป็นซาวอียิปต์คนฮั้นที่ได้ก่อการกบฏมาก่อน กับพาพวกฆาตกรสี่พันคนเข้าไปในถิ่นแห้งแล้งบ่แม่นบ้อ”

21:39 แต่เปาโลปฏิเสธตอบว่า “ข้อยหนิเป็นคนยิว ได้เกิดในเมืองทาร์ซัส แคว้นซีลีเซีย ซึ่งบ่แม่นเมืองเล็กน้อย ข้อยขอท่านอนุญาตให้เว้ากับคนพวกฮั้นแหน่”

21:40 บัดนายพันอนุญาตแล้ว เปาโลจั่งยืนอยู่ขั้นไดโบกมือให้เมิ้ดคู่คน บัดพอเขามิดลงแล้ว ลาวจั่งเว้ากับเขาเป็นภาษาฮีบรู