20:1 หลังจากการวุ่นวายฮั้นสงบลงแล้ว เปาโลจั่งเอิ้นพวกลูกศิษย์ให้มาหาลาว บัดกอดทักทายกันหนุนน้ำใจพวกเขา ลาวจั่งลาไปยังแคว้นมาซิโดเนีย

20:2 บัดเดินทางผ่านแคว้นฮั้นไปแล้ว กับได้หนุนน้ำใจพี่น้องอยู่ฮั้นอย่างหลายแล้ว ลาวกะมาฮอดประเทศกรีก

20:3 แล้วลาวได้พักอยู่ฮั่นสามเดือน แล้วบัดพอลาวหมายสิลงเฮือออกไปแคว้นซีเรีย พวกยิวกะคึดร้ายถ้าแอบจอบลาว ลาวจั่งลบเมือไปทางแคว้นมาซิโดเนีย

20:4 แล้วคนที่ไปแคว้นเอเชียกับเปาโลฮั้น(มีเจ็ดคน) คือโสปาเทอร์ ซาวเมืองเบโรอา กับอาริสทารคัส กับเสคุนดัส ซาวเมืองเธสะโลนิกา กับกายอัส ซาวเมืองเดอร์บี กับทิโมธี กับทีคิกัส พร้อมทั้งโตรฟีมัส ซาวแคว้นเอเชีย นำ

20:5 คนหมู่ฮั้นได้ออกเดินทางไปก่อน แล้วจั่งคอยถ้าพวกเฮาอยู่เมืองโตรอัส

20:6 แล้วหลังจากมื้อเทศกาลขนมปังไร้เซื้อจบลง พวกเฮาจั่งลงเฮือออกไปจากเมืองฟีลิปปี ต่อมาอีกห้ามื้อกะได้พ้อกับพวกพี่น้องอยู่เมืองโตรอัส แล้วจั่งพักอยู่ฮั้นเจ็ดมื้อ

20:7 แล้วในมื้อต้นสัปดาห์บัดพวกลูกศิษย์ได้มาโฮมกันหักขนมปังฉลองพิธีมหาสนิท เปาโลกะสั่งสอนเขา เป็นมื้อก่อนที่ลาวสิลาจากเขาไป ลาวจั่งเว้ายืดยาวจนกว่าฮอดเที่ยงคืน

20:8 แล้วกะมีตะเกียงไต้ไว้หลายดวงในห้องชั้นเทิงฮั้นที่เขาตุ้มโฮมกันอยู่

20:9 แล้วมีซายหนุ่มคนหนึ่งซื่อ ยุทิกัส นั่งอยู่ขอบหน้าต่าง พวมง่วงนอนหลาย แล้วตอนเปาโลพวมสอนโดนนานฮั่น ซายหนุ่มคนฮั้นกะโหง่ยตกลงมาจากหน้าต่างซั้นที่สาม บัดคนอุ้มขึ้นกะเห็นว่าตายแล้ว

20:10 เปาโลเลยลงไป ก้มลงกอดซายหนุ่มฮั้นไว้ แล้วบอกพี่น้องว่า “อย่าตกใจเลย ย้อนว่ายังมีซีวิตอยู่ในโตเขา”

20:11 บัดเปาโลขึ้นไปห้องซั้นเทิงแล้วหักขนมปังกิน แล้วกะซุมกันต่อไปอีกโดนนานจนซอดแจ้ง ลาวกะเลยลาจากเขาไป

20:12 แล้วพวกพี่น้องจั่งพาซายหนุ่มคนฮั้นที่ยังมีซีวิตอยู่เมือบ้านไป กับฮู้สึกสบายอกสบายใจบ่น้อยเลย

20:13 แล้วฝ่ายพวกเฮากะลงเฮือแล่นไปเมืองอัสโสส ตั้งใจว่าสิถ้าฮับเปาโลอยู่ฮั่น ตามที่ลาวได้สั่งไว้ ย้อนลาวหมายไว้ว่าสิไปทางบก

20:14 บัดลาวได้ไปพ้อกับพวกเฮาอยู่เมืองอัสโสสแล้วฮั้น พวกเฮากะฮับเอาลาว แล้วจั่งแล่นมายังเมืองมิทิเลนี

20:15 บัดแล่นเฮือออกจากหม่องฮั่นไป พอมื้อใหม่มากะผ่านไปตรงข้ามเกาะคิโอส มื้อที่สองมากะได้ฮอดเกาะสามอส แล้วได้พักอยู่ที่แหลมโตรกิเลียม แล้วมาอีกมื้อหนึ่งพวกเฮาได้มาฮอดเมืองมิเลทัส

20:16 คือเปาโลได้ตัดสินว่าสิแล่นเลยเมืองเอเฟซัสไปก่อน เพื่อสิบ่ต้องค้างอยู่โดนนานในแคว้นเอเชีย ย้อนลาวอยากฟ้าวไปเมืองเยรูซาเล็มคั่นเป็นได้ ให้ทันมื้อเทศกาลเพ็นเทคอสต์ฮั่น

20:17 แล้วจากเมืองมิเลทัสฮั้น เปาโลได้ใซ้คนไปเมืองเอเฟซัส เซิญพวกผู้หลักผู้ใหญ่ในกลุ่มผู้เซื่อฮั้นให้มาหาลาว

20:18 พอพวกเขามาหาเปาโลแล้ว ลาวจั่งเว้ากับเขาว่า “พวกเจ้าฮู้ดีอยู่ว่า ข้อยได้ใซ้ซีวิตต่อเจ้าจั่งใดตั้งแต่มื้อตำอิดที่ข้อยเข้ามาในแคว้นเอเชีย

20:19 คือข้อยได้ปรนนิบัติฮับใซ้พระผู้เป็นเจ้าโดยความถ่อมใจ โดยน้ำตาไหล กับโดยการถืกทดลองนำ ที่ได้ตกมาสู่โตข้อยอย่างหลาย โดยทางแผนการของพวกยิวที่ถ้าจอบอยู่

20:20 แล้วข้อยกะบ่ได้อำอีหยังที่เป็นประโยชน์ไว้จากพวกเจ้าจักแนวเลย แต่ได้ชี้แจงให้ฮู้ให้เห็น กับได้สอนพวกเจ้าอย่างเปิดเผยในที่สาธารณะ กับตามบ้านตามเฮือนนำ

20:21 ทั้งเป็นพยานต่อพวกยิวกับต่อพวกกรีกนำ เถิงการเปลี่ยนใจใหม่ต่อพระเจ้า กับการเซื่อวางใจต่อพระเยซูคริสต์เจ้า

20:22 นี่แน่ะ บัดนี้พระวิญญาณผูกพันข้อยไว้ จั่งจำเป็นสิต้องไปเมืองเยรูซาเล็ม โดยบ่ฮู้ว่าสิมีอีหยังเกิดขึ้นกับข้อยแหน่อยู่ฮั่น

20:23 ฮู้แต่ว่า พระวิญญาณได้เป็นพยานในคู่บ้านคู่เมืองว่า เครื่องจองจำกับความยากลำบากพวมคอยถ้าข้อยอยู่ฮั้น

20:24 แต่ว่าแนวหมู่นี้บ่ได้เฮ็ดให้ข้อยสะดุ้งเลย คือข้อยบ่ได้แพงซีวิตไว้ เพื่อสิได้มุ่งเข้าสู่เส้นซัยของข้อยโดยความดีอกดีใจ กับเพื่อสิปรนนิบัติหน้าที่การงานของข้อยฮั้น ที่พระเยซูเจ้าได้มอบหมายไว้ให้ คือการยืนยันเถิงข่าวประเสริฐเรื่องพระกรุณาธิคุณของพระเจ้าฮั้น

20:25 นี่แน่ะ บัดนี้ข้อยฮู้อยู่แล้วว่าพวกเจ้าซึ่งเป็นผู้ที่ข้อยเคยประกาศแผ่นดินของพระเจ้านำ สิบ่ได้เห็นหน้าข้อยอีกเลย

20:26 จั่งซั้น ข้อยสามารถยืนยันในมื้อนี่ได้ว่า ใจของข้อยบริสุทธิ์จากเลือดของเมิ้ดคู่คนเลย

20:27 ย้อนว่า ข้อยบ่เคยอำอีหยังไว้จากพวกเจ้าเลย แต่ได้ประกาศแผนการของพระเจ้าทั้งเมิ้ดให้พวกเจ้าฟัง

20:28 จั่งซั้น ให้พวกเจ้าระวังโตให้ดีเด้อ ฮักษาฝูงแกะที่พระวิญญาณได้ตั้งเจ้าไว้ให้เป็นผู้เบิ่งแยง คือให้เลี้ยงกลุ่มผู้เซื่อของพระเจ้าฮั้นไว้ ที่พระเยซูคริสต์ได้ไถ่โดยพระโลหิตของเพิ่น

20:29 คือข้อยฮู้อยู่แล้วว่า บัดข้อยจากไปแล้ว สิมีหมาป่าอันร้ายกาจเข้ามาในหมู่พวกเจ้า แล้วสิบ่ละเว้นฝูงแกะฮั้นไว้เลย

20:30 แล้วสิมีผู้ลางคนในหมู่พวกเจ้าเองขึ้นมา ที่สิบิดเบือนความจริง เพื่อซักซวนพวกลูกศิษย์ให้หลงตามเขาไป

20:31 จั่งซั้น ให้ตื่นโตไว้เด้อ จื่อไว้ให้ดีว่า ข้อยได้เตือนสติพวกเจ้าคู่คนโดยน้ำตาไหล ทั้งกลางเว็นกลางคืน ตลอดเวลาสามปีเต็มบ่ได้หยุดยั้งเลย

20:32 แล้วบัดนี้ พี่น้องเอ้ย ข้อยขอฝากพวกเจ้าไว้กับพระเจ้า กับพระคำอันประกอบด้วยพระกรุณาธิคุณของเพิ่นนำ ซึ่งสามารถที่สิก่อร่างสร้างพวกเจ้าขึ้นให้แข็งแฮงดี กับโปรดให้มีมรดก ฮ่วมกับผู้บริสุทธิ์ของเพิ่นผู้อื่นๆ นำ

20:33 แล้วให้ฮู้กันว่า ข้อยหนิบ่เคยโลภเงินหรือทองหรือเสื้อผ้าหน้าแพรของผู้ใดเลย

20:34 เอ้อ พวกเจ้าฮู้กันว่า มือของข้อยหนิได้จัดหาแนวเลี้ยงโตเองพร้อมทั้งเลี้ยงคนที่อยู่กับข้อยฮั้นนำ

20:35 คือซีวิตของข้อยหนิเป็นแบบอย่างให้เห็นในคู่อย่าง ว่าในการเฮ็ดงานควรสิซ่อยเลี้ยงคนที่มีกำลังน้อยกว่า คือให้คึดเห็นพระคำของพระเยซูคริสต์เจ้า ที่เพิ่นได้เว้าว่า ‘การให้เป็นเหตุให้ได้พรเป็นสุขหลายกว่าการฮับ’”

20:36 บัดเว้าจั่งซั้นแล้ว เปาโลจั่งคุกเข่าลงอธิษฐานเว้านำพระเจ้าอยู่นำพี่น้องอยู่ฮั้นคู่คน

20:37 แล้วพวกเขาจั่งฮ้องไห้อย่างใหญ่ กับกอดจุบคอของเปาโลนำ

20:38 เป็นทุกข์กว่าอย่างอื่นย้อนถ้อยคำที่ลาวเว้าฮั่น ว่าพวกเขาสิบ่ได้เห็นหน้าลาวอีกเลย แล้วพวกเขากะพาลาวไปส่งที่เฮือ