19:1 บัดนี้ มันเป็นไปที่ว่า ตอนอปอลโลยังอยู่ในเมืองโครินธ์ฮั้น เปาโลพวมเดินทางไปโดยใซ้เส้นทางสายเหนือ เป็นทางลัดไปยังเมืองเอเฟซัส แล้วลาวได้พ้อกับลูกศิษย์ลางคนอยู่ฮั่น

19:2 แล้วลาวจั่งถามเขาว่า “ตั้งแต่พวกเจ้าฮับเซื่อฮั่น พวกเจ้าได้ฮับพระวิญญาณแล้วหรือบ่” เขาตอบเปาโลว่า “พวกเฮายังบ่เคยได้ยินฮอดว่ามีพระวิญญาณ”

19:3 แล้วเปาโลจั่งถามเขาว่า “คั่นจั่งซั้น พวกเจ้าได้ฮับการจุ่มน้ำแนวใด?” เขาตอบว่า “ได้ฮับการจุ่มน้ำของโยฮัน”

19:4 แล้วเปาโลเว้าว่า “โยฮันฮั้นให้ฮับการจุ่มน้ำแสดงเถิงการกลับใจใหม่กะแม่น บอกคนให้เซื่อในเพิ่นผู้ฮั้นที่สิมาตอนหลังลาว ผู้ฮั้นคือพระเยซูคริสต์”

19:5 บัดพอพวกเขาได้ยินจั่งซั้น พวกเขาจั่งพากันฮับการจุ่มน้ำในพระนามของพระเยซูเจ้า

19:6 แล้วบัดเปาโลวางมือของลาวเทิงพวกเขา พระวิญญาณของพระเจ้าจั่งลงมาประทับอยู่นำเขา แล้วเขาได้เว้าภาษาต่างๆ พร้อมทั้งบรรยายพระคำของพระเจ้านำ

19:7 แล้วในคนกลุ่มฮั้นมีผู้ซายประมาณสิบสองคน

19:8 แล้วเปาโลได้เข้าไปในศาลาธรรมอยู่ฮั่น เว้าโดยใจกล้าเป็นเวลาสามเดือน โต้ตอบอ้างเหตุผลซักซวนให้เซื่อถือในเรื่องแผ่นดินของพระเจ้าฮั้น

19:9 แต่ผู้ลางคนเกิดมีใจแข็งกระด้างจั่งบ่ยอมเซื่อ แต่ได้เว้าใส่ร้ายป้ายสีเถิง “ทางฮั้น” ต่อหน้าพวกคนทั้งหลาย เปาโลจั่งแยกออกไปจากพวกเขา พาหมู่พวกลูกศิษย์ไปนำ แยกย้ายออกไปโต้ตอบอ้างเหตุผลกันคู่มื้อในโรงเรียนของทีรันนัส

19:10 ได้เฮ็ดแนวฮั้นเป็นเวลาสองปี จนกว่าเมิ้ดสู่คนในแคว้นเอเชียฮั้น ได้ยินได้ฟังพระคำเถิงเรื่องพระเยซูเจ้า ทั้งพวกซาวยิวกับพวกซาวกรีกนำ

19:11 แล้วพระเจ้าได้สนับสนุนโดยเหตุการณ์มหัศจรรย์เป็นพิเศษ ผ่านทางมือของเปาโล

19:12 จนขนาด แม้นแต่คนได้นำเอาผ้าเช็ดหน้ากับผ้ากันเปื้อนจากโตเปาโล ไปวางใส่คนป่วย โรคภัยไข้เจ็บที่เขาเป็นกะเซาเป็นดี กับผู้ที่มีผีฮ้ายสิงอยู่มันกะออกไปโลด

19:13 แต่พวกยิวผู้ลางคนที่พเนจรเที่ยวไปเป็นหมอผี พยายามออกพระนามของพระเยซูเจ้าลองขับผีฮ้ายออกว่า “เฮาสั่งเจ้าโดยพระเยซูผู้ที่เปาโลได้ประกาศฮั้น”

19:14 แล้วมีเจ็ดคนที่ได้เฮ็ดแนวฮั้น เป็นพวกลูกซายของ เสวา ซึ่งเป็นคณะหัวหน้าผู้นำเครื่องถวายฯ

19:15 ฝ่ายผีฮ้ายฮั้นจั่งตอบเขาว่า “พระเยซู ข้ากะฮู้จัก กับเปาโลข้ากะฮู้จักนำ แต่พวกเจ้าแม่นใผสั่น”

19:16 บัดนี้ คนผู้ฮั้นที่มีผีฮ้ายสิงจั่งลุกขึ้น โดดใส่คนทั้งเจ็ดฮั้น เอาซนะพวกเขาด้วยฤทธิ์กำลังเหนือกว่า พวกเขาเลยแล่นหนีออกจากเฮือน ทั้งเปลือยโตทั้งบาดเจ็บ

19:17 เรื่องฮั้นได้ลือกันไปเถิงหูเมิ้ดคู่คนที่อยู่ในเมืองเอเฟซัส ทั้งพวกคนยิวกับพวกคนกรีกนำ จนเมิ้ดคู่คนกะพากันตกใจหย้าน แล้วพระนามของพระเยซูคริสต์เจ้ากะเป็นที่ยกย่องสรรเสริญ

19:18 แล้วหลายคนที่ฮับเซื่อจั่งได้มาสารภาพ กับเปิดเผยเถิงการบาปแนวบ่ดีของเขาที่เฮ็ดฮั้น

19:19 กับมีหลายคนที่เคยใซ้เวทมนตร์คาถา ได้เอาตำราของโตมาเผาไฟถิ้มต่อหน้าต่อตาเมิ้ดคู่คน ตำราหมู่ฮั้นคึดเป็นราคาตั้งห้าหมื่นเหรียญเงิน

19:20 พระคำของพระเจ้าจั่งเกิดผลเจริญขึ้น มีอำนาจเหนือคู่อย่าง

19:21 หลังจากเรื่องนี้ได้ผ่านไปแล้ว เปาโลได้ตั้งใจโดยการทรงนำของพระวิญญาณว่า หลังจากเฮาไปมาซิโดเนีย กับอาคายาแล้ว เฮาสิได้ไปเมืองเยรูซาเล็ม จั่งเว้าว่า “บัดข้อยไปหม่องฮั้นแล้ว ข้อยสิต้องไปเห็นกรุงโรมนำ”

19:22 จั่งซั้นลาวเลยใซ้สองคนฮั้นที่ได้ซ่อยฮับใซ้ลาว คือทิโมธี กับเอรัสทัส ให้ไปแคว้นมาซิโดเนีย แต่ส่วนลาวฮั่นกะได้พักอยู่ในแคว้นเอเชียหน่อยหนึ่ง

19:23 แล้วในยามฮั้น ได้เกิดมีการวุ่นวายบ่น้อยขึ้นมา ย้อนข่าวดีเรื่องพระเยซูที่คนเอิ้นกันว่า “ทางฮั้น”

19:24 คือมีซายคนหนึ่งซื่อ เดเมตริอัส อยู่ฮั้น มีอาซีพเป็นซ่างตีเงินเฮ็ดเป็นศาลไหว้เจ้าแม่อารเทมิส แล้วอาซีพฮั้นเฮ็ดให้พวกซ่างฮั้นมีรายได้บ่น้อย

19:25 เดเมตริอัสเลยเอิ้นหมู่พวกอาซีพซ่างเงินฮั้น มาฮ่วมซุมกันแล้วเว้าว่า “พวกเจ้าฮู้อยู่แล้วว่า พวกเฮาได้เลี้ยงซีพอยู่ดีกินดีกะย้อนศาลเจ้าแม่อารเทมิสนี้ล่ะ

19:26 บัดนี้ พวกเจ้าได้ยินได้เห็นว่า บ่ว่าแต่อยู่ในเมืองเอเฟซัสนี้เมืองเดียว แต่เกือบทั่วแคว้นเอเชียนำ เปาโลคนนี้ได้ซักซวนคนหลวงหลายให้เซาถือในทางเก่า หาว่าพระที่เฮ็ดโดยมือคนบ่แม่นพระแท้

19:27 จั่งซั้น ดีบ่ดีบ่แม่นแต่อาซีพของเฮาสิเสียหายไปแต่อย่างเดียว แต่พระวิหารของเจ้าแม่อารเทมิสผู้ยิ่งใหญ่ฮั้น สิกลายเป็นที่ลบหลู่หมิ่นประมาท จนศักดิ์ศรีของเจ้าแม่ฯฮั้นที่เป็นที่นับถือของเมิ้ดแคว้นเอเชียพร้อมทั้งโลกนำ สิเสื่อมเสียลงไปให้เมิ้ด”

19:28 บัดคนทั้งหลายได้ยินจั่งซั้น ต่างกะเคียดแค้นฮ้ายอย่างใหญ่ฮ้องกันว่า “พระอารเทมิสของซาวเอเฟซัสเป็นใหญ่ยิ่งๆ”

19:29 แล้วได้เกิดการวุ่นวายยุ่งกันใหญ่ทั่วทั้งเมือง จนพวกคนอยู่ฮั้นได้ลุกฮือเข้าไปในโรงละคร โดยได้จับเอา กายอัส กับอาริสทารคัส ซาวมาซิโดเนีย หมู่เดินทางของเปาโลฮั้น ลากเข้าไปนำ

19:30 แล้วบัดเปาโลว่าสิเข้าไปหาคนพวกฮั้น พวกลูกศิษย์ห้ามไว้บ่ยอมให้ลาวเข้าไป

19:31 แล้วมีเจ้านายผู้ลางคนประจำแคว้นเอเชียที่เป็นหมู่กันกับเปาโล ได้ใซ้คนไปหาเปาโล วิงวอนขอบ่ให้ลาวเข้าไปในโรงฮั้นนำ

19:32 ผู้ลางคนอยู่ในฮั้นได้ฮ้องจั่งซี้ แล้วอีกผู้ลางคนฮ้องจั่งซั้น ย้อนว่าที่ฮั้นกะวุ่นวายหลาย กับดีบ่ดีคนส่วนหลายบ่ฮู้เลยว่าเขาได้เข้าไปตุ้มโฮมกันย้อนเรื่องอีหยัง

19:33 แล้วพวกยิวผู้ลางคนได้ผลักดันนายอเล็กซานเดอร์ ให้ขึ้นไปข้างหน้า อเล็กซานเดอร์จั่งโบกมือหมายว่าสิเว้าแก้ข้อหาต่อหน้าเมิ้ดคู่คน

19:34 แต่บัดคนอยู่ฮั้นฮู้ว่าลาวเป็นคนยิว เขากะแฮงส่งเสียงโห่ฮ้องพร้อมกันเป็นเวลาประมาณสองซั่วโมงเต็ม ว่า “เจ้าแม่อารเทมิสของซาวเอเฟซัสเป็นใหญ่ๆ”

19:35 แล้วบัดเจ้าหน้าที่นายทะเบียน ได้ออยเอาประซาซนให้เงียบสงบลงแล้ว เขาจั่งเว้าว่า “ท่านซาวเมืองเอเฟซัสทั้งหลายเอ้ย มีใผแหน่ที่บ่ฮู้ว่า เมืองเอเฟซัสของเฮาหนิเป็นเมืองที่เซื่อถือเจ้าแม่อารเทมิสผู้ยิ่งใหญ่ฮั้น พร้อมกับฮูปจำลองของเพิ่นที่ตกลงมาจากดาวพฤหัสบดีอยู่เทิงฟ้าฮั้น

19:36 จั่งซั้น ข้อความจริงนี้ บ่มีใผสามารถโต้แย้งหรือปฏิเสธได้ พวกเจ้าควรสินิ่งลงควบคุมอารมณ์ซะ อย่าสู่เฮ็ดหยังวู่วามลุกลามไปเลยเด้อ

19:37 คือพวกเจ้าได้พาคนหมู่นี้มา ที่บ่ได้ปล้นพระวิหารหรือเว้าลบหลู่ดูหมิ่นเจ้าแม่ของพวกเจ้าดอก

19:38 จั่งซั้น คั่นแม่นเดเมตริอัส กับพวกซ่างที่มีอาซีพอย่างเดียวกัน คั่นมีเรื่องอีหยังกับผู้ใด ศาลที่สิเว้าความกะมีเปิดอยู่ ผู้ตรวจการกะมี ผู้พิพากษากะมีนำ ให้เขามาฟ้องฮ้องกันอย่างถืกต้องเถอะ

19:39 แต่คั่นแม้นพวกเจ้ามีข้อหาอีหยังอีก กะให้ซำระกันในสภาอย่างเป็นระเบียบตามกฎหมาย

19:40 คือย้อนเรื่องราวที่เกิดขึ้นมื้อนี้อาจเป็นเหตุที่เฮาสิต้องรายงานโตต่อเจ้าหน้าที่ฝ่ายสูงย้อนการซุลมุนวุ่นวายนี้เอง”

19:41 บัดเว้าจั่งซั้นจบแล้ว นายทะเบียนจั่งสั่งให้คนแยกย้ายกันออกไป