18:1 หลังจากนี้แล้ว เปาโลได้ออกจากกรุงเอเธนส์ ไปยังเมืองโครินธ์

18:2 แล้วลาวได้พ้อคนยิวคนหนึ่งซื่อ อาควิลลา ผู้ที่เกิดในแคว้นปอนทัส แล้วเขาเพิ่งมาฮอดจากประเทศอิตาลีพร้อมกับเมียซื่อ ปริสสิลลา (ย้อนว่าเจ้าเมือง คลาวดิอัส มีฮับสั่งให้พวกคนยิวต้องออกไปจากกรุงโรม) เปาโลกะเลยไปหาสองผัวเมียฮั้น

18:3 แล้วย้อนว่าเปาโลมีอาซีพแนวเดียวกันกับเขา ลาวจั่งพักอาศัยเฮ็ดการงานอยู่นำ คือเขาทั้งสองประกอบอาซีพเป็นซ่างเฮ็ดเต็นท์

18:4 แล้วเปาโลจั่งได้เข้าศาลาธรรมในคู่มื้อหยุดพักวันสะบาโต อ้างเหตุผลโต้ตอบกันจูงใจทั้งพวกซาวยิวกับพวกซาวกรีกอยู่ฮั้น

18:5 แล้วพอแต่สิลาสกับทิโมธีมาจากแคว้นมาซิโดเนีย เปาโลกะได้มีภาระจูงใจ จั่งออกไปเป็นพยานกับพวกยิวว่าพระเยซูเป็นพระคริสต์ พระผู้โปรดที่เขาคอยท่าฮั้น

18:6 แต่บัดพอพวกคนยิวตั้งโตเป็นฝ่ายต่อต้านกับหมิ่นประมาทใส่ลาว เปาโลจั่งสะบัดเสื้อผ้าเจ้าของ เว้าใส่พวกเขาว่า “ให้เลือดของพวกเจ้าตกใส่หัวโตเองเด้อ ข้อยล้างมือแล้ว แต่นี้ไปข้อยสิไปหาคนต่างชาติเด้อ”

18:7 แล้วเปาโลจั่งออกจากฮั้นไป เข้าบ้านของซายคนหนึ่งซื่อ ยุสทัส เป็นคนที่เซื่อถือพระเจ้า ซึ่งเฮือนของเขาติดกับศาลาธรรม

18:8 แล้วส่วนคริสปัส ผู้เป็นเจ้าหน้าที่ระดับสูงของศาลาธรรม ได้เซื่อในพระผู้เป็นเจ้า พรัอมทั้งครัวเฮือนทั้งเมิ้ดของลาว แล้วซาวโครินธ์หลายคน บัดได้ฟังแล้วกะฮับเซื่อนำ แล้วจั่งได้ฮับการจุ่มน้ำ

18:9 แล้วพระเจ้าได้เว้ากับเปาโลทางนิมิตในคืนมื้อหนึ่ง ว่า “อย่าหย้านเลยแต่ให้ป่าวประกาศต่อไป บ่ให้อำไว้เด้อ

18:10 ย้อนว่าเฮาอยู่กับเจ้า บ่มีใผสิเฮ็ดร้ายใส่เจ้าดอก ย้อนว่าเฮามีหลายคนในเมืองนี้”

18:11 เปาโลเลยพักอาศัยอยู่ฮั่นตลอดหนึ่งปีหกเดือน แล้วได้สอนพระคำของพระเจ้าให้กับพวกเขา

18:12 แล้วในตอนฮั้น กัลลิโอ ขึ้นเป็นผู้ตรวจราชการแคว้นอาคายา พวกยิวได้ลุกฮือขึ้นพร้อมกัน ต่อต้านเปาโล จั่งพาลาวไปขึ้นศาล

18:13 ฟ้องร้องกันว่า “คนนี้ซักซวนผู้คนทั้งหลายให้เคารพนับถือพระเจ้าในทางที่ผิดกฎบัญญัติ”

18:14 บัดเปาโลอ้าปากสิเว้า กัลลิโอกะเว้าขึ้นใส่พวกยิวก่อนว่า “โอ พวกยิวเอ้ย คั่นเป็นเรื่องความผิดความซั่ว หรือเป็นเรื่องอาชญากรรม สมควรเฮาสิทนฟังพวกเจ้าอยู่

18:15 แต่เป็นเรื่องถ้อยคำ กับซื่อคน กับกฎบัญญัติของพวกเจ้าเองซื่อๆ จั่งซั้น ให้พวกเจ้าพิจารณาเอาเองโลดเด้อ ฝ่ายเฮาบ่อยากเป็นผู้ตัดสินในข้อความแนวหมู่ฮั้นดอก”

18:16 เว้าแล้ว กัลลิโอจั่งไล่พวกเขาฮั่นออกจากศาลตัดสิน

18:17 แล้วพวกคนกรีกทั้งเมิ้ดจั่งจับเอา โสสเธเนส เจ้าหน้าที่ระดับสูงของศาลาธรรม มาเฆี่ยนตีทางหน้าศาลตัดสินฮั้น แต่ส่วน กัลลิโอ กะบ่ได้หัวซาเลย

18:18 แล้วเปาโลได้พักอยู่ฮั้นอีกโดนเติบ แล้วจั่งขอลาพวกพี่น้อง ลงเฮือแล่นไปแคว้นซีเรีย แล้วปริสสิลลา กับ อาควิลลา ได้ไปนำลาว บัดนี้เปาโลจั่งโกนหัวอยู่เมืองเคนเครีย(ตามประเพณีของซาวยิว) ย้อนว่าลาวได้ปฏิญาณโตต่อพระเจ้า

18:19 แต่บัดมาฮอดเมืองเอเฟซัส เปาโลได้ปะ ปริสสิลลา กับอาควิลลา ไว้อยู่ฮั่น แล้วลาวได้เข้าไปในศาลาธรรม อ้างเหตุผลโต้ตอบกันกับพวกยิวอยู่ฮั่น

18:20 แล้วบัดคนอยู่ฮั่นขอร้องให้ลาวอยู่กับเขาอีกต่อไป ลาวกะบ่ยอม

18:21 แต่ว่าลาวได้ลาเขาไป เว้าว่า “ข้อยจำเป็นต้องฮักษาเทศกาลเลี้ยงที่สิมาฮอดไวๆ นี้ ในเมืองเยรูซาเล็ม แล้วคั่นเป็นที่ซอบของพระเจ้า ข้อยสิหลบมาหาพวกเจ้าอีก” เว้าแล้วเปาโลได้ลงเฮือใบแล่นออกจากเมืองเอเฟซัสไป

18:22 บัดมาฮอดเมืองซีซารียา ลาวได้ขึ้นไปทักทายกันกับกลุ่มผู้เซื่ออยู่ฮั่น แล้วจั่งลงไปเมืองอันทิโอกต่อ

18:23 บัดอยู่ฮั้นได้หน่อยหนึ่ง ลาวจั่งไปตลอดทั่วแคว้นกาลาเทีย กับแคว้นฟรีเจียตามลำดับ ไปหนุนใจส่งเสริมกำลังพวกลูกศิษย์เมิ้ดคู่คน

18:24 แล้วมีคนยิวคนหนึ่งซื่อ อปอลโล เกิดในเมืองอเล็กซานเดรีย เป็นคนมีพรสวรรค์ทางการเว้าการจา กับซำนาญหลายในทางพระคำ ได้มาเมืองเอเฟซัส

18:25 อปอลโลคนนี้ได้ฮับการอบรมในทางของพระเจ้า กับมีใจฮ้อนฮน เอาใจใส่สอนโดยละเอียดในเรื่องพระเจ้า แม้นว่าเขาฮู้จักแต่เรื่องการฮับการจุ่มน้ำของยอห์นท่อฮั้น

18:26 แล้วอปอลโลจั่งตั้งต้นสอนในศาลาธรรมโดยใจกล้า แต่บัดอาควิลลา กับปริสสิลลา ได้ฟังเขาแล้ว จั่งฮับเอาเขามาสอนให้ฮู้จักทางของพระเจ้าให้ถืกต้องหลายขึ้น

18:27 แล้วบัดอปอลโลว่าสิข้ามไปแคว้นอาคายา พวกพี่น้องกะเขียนจดหมายฝากไปฮอดลูกศิษย์อยู่ฮั่น ให้ต้อนฮับเอาลาวไว้บัดลาวไปฮอด แล้วลาวได้ซ่อยคนอยู่ฮั่นอย่างหลาย ที่ได้ฮับเซื่อในทางพระกรุณาธิคุณ

18:28 คือลาวได้โต้ตอบกับพวกยิว เว้าอย่างมีน้ำหนักตามที่สาธารณะ โดยยกข้อในพระคำที่ซี้แจงเถิงพระเยซูว่าเป็นพระคริสต์ พระผู้โปรดฮั้น