3:1 พวกเฮาสิต้องแนะนำโตเองใหม่ให้พวกเจ้าอยู่บ้อ หรือว่าพวกเฮาต้องการหนังสือรับรองแนะนำโตมายื่นให้กับพวกเจ้าบ้อ หรือบ่ซั่นพวกเฮาต้องการหนังสือรับรองจากพวกเจ้า นำไปยื่นหม่องอื่นๆ บ้อ คือจั่งผู้ลางคนฮั่น

3:2 ที่จริงแล้ว แม่นพวกเจ้าฮั้นเองที่เป็นหนังสือรับรองของพวกเฮา ที่จารึกไว้ในใจของพวกเฮา ซึ่งเมิ้ดคู่คนได้อ่านได้ฮู้กันอยู่แล้ว

3:3 ด้วยว่า พวกเจ้าได้เป็นหนังสือของพระคริสต์ที่จารึกไว้แล้ว ซึ่งพวกเฮาได้นำมาฮับเซื่อ บ่แม่นหนังสือแบบที่จารึกไว้โดยน้ำหมึก แต่ได้จารึกไว้โดยพระวิญญาณของพระเจ้าผู้เพิ่นดำรงอยู่ แล้วบ่ได้เป็นหนังสือที่สะกัดไว้ในแผ่นหิน แต่ได้จารึกไว้ในดวงใจ

3:4 แล้วพวกเฮามีความเซื่อมั่นต่อพระเจ้าแนวฮั้น โดยทางพระคริสต์

3:5 ด้วยว่า บ่แม่นพวกเฮามีความพอเพียงในโตเองแต่ประการใดเลย ที่สิถือว่ามีอีหยังได้เกิดมาจากโตเฮาเอง แต่ว่าความพอเพียงของพวกเฮาฮั้นมาจากพระเจ้า

3:6 ผู้เพิ่นได้โปรดให้พวกเฮามีความสามารถที่สิปรนนิบัติฮับใซ้เพิ่นได้ ในเรื่องคำมั่นสัญญาใหม่ฮั้น ซึ่งบ่แม่นด้วยลายลักษณ์อักษรที่มีจารึกไว้ในกฎบัญญัติ แต่ด้วยพระวิญญาณต่างหาก คือข้อต่างๆ ในกฎบัญญัติมีแต่สังหาร แต่พระวิญญาณโปรดให้มีซีวิต

3:7 แต่คั่นพันธกิจของกฎข้อบัญญัติที่มีจารึกไว้ในแผ่นหินฮั้น ที่มีแต่หน้าที่ซี้ผิดเถิงการสังหารยังมีศักดิ์ศรีหลาย จนพวกคนอิสราเอลบ่สามารถเบิ่งหน้าของเฒ่าโมเสสได้เลย ย้อนแสงรัศมีอยู่หน้าลาวฮั้น บ่ว่าแสงฮั้นพวมลี้ลง

3:8 คั่นบ่ซั้น พันธกิจทางพระวิญญาณสิบ่มีศักดิ์ศรีแฮงหลายกว่าฮั้นอีกบ้อ

3:9 คือ คั่นการปรนนิบัติฮับใซ้ตามระบบเก่าที่มีแต่กล่าวโทษฮั้นกะยังมีศักดิ์ศรีอยู่ การปรนนิบัติ ฮับใซ้ตามระบบใหม่นี้ ที่ให้ความซอบธรรมได้ กะต้องมีศักดิ์ศรีแฮงหลายกว่าระบบเก่าฮั้น

3:10 คือ แม้นแต่ระบบเก่าฮั้นเคยมีศักดิ์ศรีมีรัศมีหลายมาก่อน บัดนี้มันจางลงไปแล้ว คั่นเปรียบกับระบบใหม่ที่มีศักดิ์ศรีมีรัศมีแฮงกล้าหลายกว่า

3:11 ย้อนว่า คั่นแนวเก่าซึ่งเคยมีศักดิ์ศรีมีรัศมีที่พวมเมิ้ดไปแล้วฮั้น แนวที่ยังดำรงอยู่ตลอดกาลนี้ กะมีศักดิ์ศรีมีรัศมีแฮงหลายกว่าอีก

3:12 ด้วยว่า บัดพวกเฮามีความหวังอันมั่นคงจั่งซั้นแล้ว เฮาจั่งมีใจกล้า ใซ้คำเว้าที่เด่นซัดในการประกาศ

3:13 บ่คือเฒ่าโมเสสที่เอาผ้าคลุมปิดบังหน้าลาวไว้ เพื่อบ่ให้คนอิสราเอลสังเกต เห็นว่ารัศมีที่หน้าลาวฮั้น พวมเสื่อมลงไป

3:14 แต่จิตใจของพวกคนอิสราเอลฮั้นกะมืดมัวแข็งกระด้างไป จนฮอดคู่มื้อนี้เลย คือบัดยามเขาอ่านคัมภีร์โบราณ ผ้าคลุมฮั้นกะยังปิดบังความจริงไว้อยู่คือเก่า ซึ่งได้ถืกเปิดออกแล้วโดยในพระคริสต์

3:15 คือ ตลอดมาจนฮอดคู่มื้อนี้ ยามใดที่เขาเปิดอ่านหนังสือของเฒ่าโมเสส ผ้าคลุมฮั้นกะยังปิดบังจิตใจของพวกเขาไว้คือเก่า

3:16 จั่งใดกะตาม บัดผู้ใดผู้หนึ่งในพวกเขาหันมาหาเพิ่น ผ้าคลุมฮั้นกะสิถืกยกออกไปสำหรับเขา

3:17 แต่บัดนี้ องค์พระผู้เป็นเจ้าเป็นพระวิญญาณฮั้นเอง แล้วพระวิญญาณของเพิ่นอยู่ไส มีเสรีภาพอยู่ฮั่นนำ

3:18 แต่พวกเฮาคู่คนได้เห็นพระสิริของเพิ่นแล้ว คือจั่งแนมเบิ่งในกระจกโดยบ่มีผ้าคลุมปิดบังใบหน้าของเฮาไว้ คือพวกเฮาพวมสิฮับการเปลี่ยนแปลงให้เป็นภาพลักษณ์อันเดียวกันกับเพิ่น จากพระสิริเข้าสู่พระสิริโดยทางพระวิญญาณขององค์พระผู้เป็นเจ้า