4:1 จั่งซั้น บัดพวกเฮามีภาระหน้าที่ในการปรนนิบัติฮับใซ้แนวนี้ พวกเฮาจั่งบ่ได้เมิ้ดกำลังใจเลย ย้อนได้ฮับความเมตตามาแล้ว

4:2 แต่ว่า เฮาได้ปะถิ้มกิจการต่างๆ คือแนวอับอายที่เป็นตาปิดเซื่องไว้ฮั้น คือบ่ได้ดำเนินในทางเล่ห์เหลี่ยม กับบ่ได้ซอกบิดเบือนพระคำของพระเจ้าในทางคดโกง แต่ว่า ได้ใซ้พระคำของพระเจ้าในทางสัจจะอย่างเปิดเผย จั่งได้แนะนำโตเองต่อจิตสำนึกของคู่คน กับต่อหน้าพระเจ้านำ

4:3 แต่คั่นเรื่องข่าวประเสริฐของเฮาหนิได้ถืกปิดบังไว้จากใผ กะแม่นจากพวกคนหมู่ฮั้นที่พวมสิพินาศไป

4:4 คือฝ่ายคนที่บ่เซื่อฮั้น มารซาตาน ผู้เป็นพระเป็นเจ้าของยุคนี้ ได้เฮ็ดให้ตาใจของเขามืดบอดไป เพื่อบ่ให้แสงสว่างของข่าวประเสริฐ ที่เต็มไปด้วยพระสิริของพระคริสต์ ผู้เป็นภาพลักษณ์ของพระเจ้า ส่องแสงเข้าใส่พวกเขาเลย

4:5 ด้วยว่า พวกเฮาบ่ได้ประกาศโตเฮาเอง แต่ได้ประกาศเถิงพระเยซูคริสต์เจ้า กับได้แนะนำโตเฮาเองว่าเป็นแค่ผู้ฮับใซ้ของพวกเจ้า ย้อนเห็นแก่พระเยซูฮั้นเอง

4:6 คือ แม่นพระเจ้า ผู้ที่บันดาลให้ความสว่างปรากฏออกจากความมืดฮั้น ได้ส่องแสงเข้ามาในจิตใจของพวกเฮาแล้ว เพื่อให้ฮู้แจ้งเห็นจริงเถิงพระสิริของพระเจ้า ซึ่งปรากฏให้เห็นในหน้าของพระเยซูคริสต์

4:7 แต่พวกเฮามีทรัพย์สมบัติอันล้ำค่านี้ไว้อยู่ในไหดิน เพื่อให้เห็นว่าฤทธิ์อำนาจอันเลิศฮั้นมาจากพระเจ้า บ่แม่นมาจากโตเฮาเองเลย

4:8 เฮาถืกการเบียดเบียนอยู่รอบข้าง แต่กะบ่เถิงกับบดขยี้ให้เมิ้ดกำลังใจ เฮามึนงงเป็นตางึด แต่กะบ่เถิงกับเมิ้ดหวัง

4:9 เฮาถืกข่มเหง แต่กะบ่เถิงกับถืกปะถิ้ม เฮาถืกเหวี่ยงลงแล้ว แต่กะยังบ่เถิงกับพินาศไป

4:10 เฮาแบกการตายของพระเยซูเจ้าไว้อยู่ในโตเฮาเองอยู่ตลอด เพื่อซีวิตของพระเยซูฮั้นสิได้ปรากฏอยู่ในโตของเฮานำ

4:11 ย้อนว่า พวกเฮาผู้ที่ยังมีซีวิตอยู่กะได้ถืกมอบไว้ให้ตายอยู่ตลอด ย้อนเห็นแก่พระเยซูเอง เพื่อซีวิตของพระเยซูฮั้นสิได้ปรากฏอยู่ในตนโตอนิจจังของเฮานี้

4:12 จั่งซั้น ฝ่ายพวกเฮาหนิ ความตายกะพวมปั่นป่วนอยู่ แต่ฝ่ายพวกเจ้าฮั้น มีซีวิตอยู่อย่างสบาย

4:13 คือเนื่องจากว่า พวกเฮามีใจเซื่อเป็นน้ำหนึ่งใจเดียวกัน ตามที่มีเขียนไว้ว่า “ข้อยเซื่อแล้ว ข้อยจั่งได้เว้า” พวกเฮาได้เซื่อคือกัน แล้วเฮาจั่งได้เว้า

4:14 โดยฮู้ไว้แล้วว่า พระเจ้าผู้โปรดให้องค์พระเยซูเจ้าเป็นขึ้นมาฮั้น กะสิโปรดให้พวกเฮาเป็นขึ้นมาคือกัน โดยทางพระเยซู แล้วสิมอบถวายพวกเฮาพร้อมทั้งพวกเจ้าให้ยืนอยู่ต่อหน้าเพิ่น

4:15 ด้วยว่าเมิ้ดคู่แนวที่เป็นไปฮั้น กะเป็นไปเพื่อผลประโยชน์ของพวกเจ้า เพื่อเรื่องพระกรุณาธิคุณของพระเจ้าฮั้นสิได้ไปเถิงอีกหลายคนขึ้น แล้วในที่สุดสิมีการขอบพระคุณอีกหลายขึ้นนำ ซึ่งเป็นการถวายเกียรติต่อพระเจ้า

4:16 จั่งซั้น พวกเฮาจั่งบ่ยอมเมิ้ดกำลังใจเลย เถิงแม้นว่าสภาพภายนอกของเฮาฮั้นพวมสิผุพังลง แต่สภาพภายในของพวกเฮา กะมีพลังขึ้นมาใหม่คู่มื้อ

4:17 ด้วยว่า การทุกข์ยากลำบากเล็กๆ น้อยๆ ฮั้น ซึ่งพวกเฮาต้องถืกแค่บึดเดียว สิได้กลายเป็นศักดิ์ศรีอันยิ่งใหญ่กว่า ให้พวกเฮาอยู่ตลอดนิรันดร์กาล

4:18 คือว่า พวกเฮาบ่ได้จดจ่อมุ่งหมายในแนวที่ตาแนมเห็นได้ แต่ได้จดจ่อมุ่งหมายในแนวที่ตาแนมบ่เห็น ย้อนว่าแนวที่ตาแนมเห็นได้ฮั้น กะเป็นของอนิจจังที่บ่ยั่งยืน แต่แนวที่ตาแนมบ่เห็น กะเป็นของอมตะตลอดนิรันดร์กาล