2:1 แต่ข้อยได้มุ่งหมายไว้ในใจว่า สิบ่นำเอาแนวที่สิพาให้เป็นทุกข์จั่งซี้มาหาพวกเจ้าอีก

2:2 ย้อนว่า คั่นข้อยพาพวกเจ้าให้หนักใจเป็นทุกข์ แม่นใผสิเล้าโลมหนุนใจข้อยให้ซื่นบานยินดีได้ นอกจากพวกเจ้าเอง ผู้ที่ข้อยอาจสิต้องพาเป็นทุกข์ฮั้น

2:3 แล้วที่ข้อยเขียนมาหาพวกเจ้าแนวนี้ กะเพื่อว่า บัดข้อยสิมาหาฮั้น ข้อยสิบ่ได้ทุกข์ใจย้อนพวกเจ้า ผู้ที่ควรสิเฮ็ดให้ข้อยมีความซื่นบานยินดี แต่ข้อยมั่นใจในพวกเจ้าว่า ความซื่นบานยินดีที่ข้อยมีอยู่หนิกะสิเป็นความยินดีของพวกเจ้าเมิ้ดคู่คนนำ

2:4 แต่ว่า เหตุที่ข้อยเขียนมาหาพวกเจ้าด้วยความทุกข์ใจนี้ กับได้เสียน้ำตาหลาย บ่แม่นเพื่อให้พวกเจ้าเป็นทุกข์ใจนำ แต่เพื่อพวกเจ้าอาจฮู้เถิงความฮักแบบของพระเจ้าที่ข้อยมีให้พวกเจ้าอย่างเหลือล้น

2:5 แต่คั่นผู้ใดอยู่ฮั้นเป็นเหตุให้เกิดมีความเป็นทุกข์ ผู้ฮั้นบ่ได้เฮ็ดให้ข้อยหนักใจเป็นทุกข์แต่ผู้เดียว แต่ผู้ลางคนในพวกเจ้ากะหนักใจเป็นทุกข์นำ ข้อยกะเลยบ่อยากซ้ำเติมพวกเจ้าอีกดอก

2:6 คือ ที่คนส่วนหลายได้พากันลงโทษคนฮั้นกะเพียงพอแล้ว

2:7 บัดนี้ ในทางตรงกันข้าม พวกเจ้าควรสิยกโทษให้อภัยผู้ฮั้นต่างหาก แล้วกะเล้าโลมหนุนใจเขาซะ หย้านว่าใจของคนฮั้นอาจสิถืกกลืนกินไปด้วยความกลุ้มใจหลายกะได้

2:8 จั่งซั้น ข้อยขอวิงวอนพวกเจ้า ให้ยืนยันความฮักของพวกเจ้าต่อคนฮั้นใหม่อีกแหน่

2:9 เป็นย้อนสาเหตุนี้ล่ะ ที่ข้อยได้เขียนมาตักเตือนพวกเจ้าแต่ตำอิด เป็นการพิสูจน์เบิ่งใจของพวกเจ้า เพื่อสิฮู้ว่าพวกเจ้าสิยอมเซื่อฟังในคู่อย่างหรือบ่

2:10 คือ บัดพวกเจ้าสิยกโทษให้อภัยผู้ใด ข้อยกะยกโทษให้อภัยผู้ฮั้นนำ ย้อนว่าคั่นข้อยเคยยกโทษให้อภัยอีหยัง ข้อยได้ยกโทษให้อภัยผู้ฮั้นต่อหน้าพระคริสต์ ย้อนเห็นแก่พวกเจ้า

2:11 บ่ซั้น เกร็งว่ามารซาตานอาจสิมีซ่องทางเอาเปรียบพวกเฮาได้ โดยว่าเฮาฮู้ดีในลูกเล่นกลอุบายของมันอยู่แล้ว

2:12 นอกจากฮั้นอีก บัดข้อยไปฮอดเมืองโตรอัส เพื่อประกาศข่าวประเสริฐเรื่องพระคริสต์ฮั้น เพิ่นผู้เป็นพระผู้เป็นเจ้าได้เปิดประตูเป็นหนทางไว้ให้ข้อย

2:13 แต่ข้อยบ่ค่อยสบายใจ ย้อนข้อยบ่ได้พ้อ ทิตัส น้องในความเซื่อของข้อยอยู่ฮั่น กะเลยลาพวกเขาเดินทางไปแคว้นมาซิโดเนียต่อ

2:14 แต่บัดนี้ ขอขอบคุณพระเจ้า ผู้เพิ่นที่นำเฮาไปสู่ความมีซัยอยู่ตลอดในพระคริสต์ คือกลิ่นหอมในการฮู้จักเรื่องเพิ่น กะได้ลามไปฮอดทั่วคู่หม่องโดยทางพวกเฮา

2:15 คือสำหรับพระเจ้าฮั่นพวกเฮากะส่งกลิ่นอันหอมหวานของพระคริสต์ ทั้งในพวกคนที่พวมสิรอดพ้นฮั้น พร้อมทั้งในพวกคนที่พวมสิพินาศฮั้นนำ

2:16 คือสำหรับผู้คนที่บ่เซื่อ มันเป็นกลิ่นความตาย นำเขาไปสู่ความตาย แล้วสำหรับผู้คนที่เซื่อฮั้น มันกะเป็นกลิ่นหอมของซีวิต นำเขาไปสู่ซีวิตนิรันดร์ ใผแหน่พอเพียงในถ้อยคำแนวหมู่นี้

2:17 แล้วพวกเฮาบ่คือหลายคนที่บิดเบือนพระคำของพระเจ้า หากินด้วยเล่ห์เหลี่ยม แต่ตรงกันข้าม คือจั่งคนที่มาจากพระเจ้า พวกเฮาประกาศเรื่องพระคริสต์ด้วยใจจริงโดยในสายตาของพระเจ้า