16:1 บัดพอมื้อพักงานของซาวยิวผ่านไปแล้ว มารีย์ชาวมักดาลา มารีย์แม่ของยากอบ กับนางสะโลเม ซื้อเครื่องหอมมาเพื่อสิไปชโลมศพของพระเยซู

16:2 แล้วตอนเซ้ามืดมื้อต้นสัปดาห์ (คือวันอาทิตย์) เขากะมาฮอดอุโมงค์ตอนตะเว็น พวม สิขึ้น

16:3 แล้วเขาเว้ากันว่า “ใผสิซ่อยกลิ้งก้อนหินฮั้นออกจากปากอุโมงค์”

16:4 แล้วบัดเขาเหลียวเบิ่ง ได้เห็นก้อนหินฮั้น ซึ่งเป็นก้อนหินที่ใหญ่ขนาด ได้ถืกกลิ้งออกไปแล้ว

16:5 บัดพอเขาเข้าไปในอุโมงค์แล้ว ได้เห็นหนุ่มผู้หนึ่งนุ่งห่มผ้ายาวเป็นสีขาวจัวะ นั่งอยู่ข้างขวา แม่ญิงพวกฮั้นกะเลยตกใจหลาย

16:6 แล้วฝ่ายหนุ่มฮั้นบอกเขาว่า “อย่าตกใจเลย พวกเจ้ามาหาพระเยซูซาวนาซาเร็ธซึ่งได้ถืกตรึงไว้ที่หลักประหารฮั้น เพิ่นได้เป็นขึ้นมาจากตายแล้ว เพิ่นบ่ได้อยู่นี้ดอก นี่แน่ะ เบิ่งดูหม่องที่เขาได้วางศพของเพิ่นฮั้น

16:7 ให้ไปบอกพวกลูกศิษย์ของพระเยซูทั้งเปโตรเด้อว่า เพิ่นไปยังแคว้นกาลิลีก่อนพวกเจ้าแล้ว พวกเจ้าสิเห็นเพิ่นอยู่ฮั้น คือจั่งเพิ่นได้เว้าไว้กับพวกเจ้ามาแล้ว”

16:8 แล้วแม่ญิงพวกฮั้นกะฟ้าวหนีออกจากอุโมงค์ไป ย้อนตกใจโตสั่น แล้วเขาบ่ได้เว้ากับใผย้อนเขาหย้าน

16:9 คือยามเซ้ามืดมื้อต้นสัปดาห์ฮั้น บัดพระเยซูได้เป็นขึ้นมาจากตายแล้ว เพิ่นได้สำแดงโตเพิ่นเองให้มารีย์ชาวมักดาลาเห็นก่อน คือคนฮั้นที่เพิ่นได้ขับไล่ผีออกเจ็ดโต

16:10 แล้วมารีย์จั่งออกไปบอกพวกคนที่เคยอยู่กับเพิ่นแต่ก่อน หว่างฮั้นพวกเขาพวมฮ้องไห้เป็นทุกข์อยู่

16:11 แล้วบัดพวกเขาได้ยินว่าพระเยซูเป็นขึ้นมาจากตายแล้ว กับว่ามารีย์ได้เห็นเพิ่นแล้ว พวกเขากะบ่เซื่อ

16:12 แล้วหลังจากฮั้น พระเยซูได้แสดงโตเพิ่นในอีกลักษณะหนึ่งต่อลูกศิษย์สองคน บัดสองคนเขาพวมย่างออกไปตามทางในซนบท

16:13 แล้วลูกศิษย์สองคนฮั้นจั่งไปบอกลูกศิษย์คนอื่นๆ แต่เขาฮั้นกะบ่เซื่อคือกัน

16:14 อยู่มา พระเยซูได้สำแดงโตเพิ่นเองต่อลูกศิษย์สิบเอ็ดคนตอนเขาพวมกินข้าวอยู่ แล้วเพิ่นเลยว่าเขาย้อนความบ่เซื่อกับใจแข็งกระด้างของพวกเขา ย้อนเขาบ่ยอมเซื่อคนที่ได้เห็นเพิ่นหลังจากเป็นขึ้นมาจากตายแล้วฮั้น

16:15 แล้วฝ่ายพระเยซูจั่งเว้าสั่งพวกลูกศิษย์ว่า “ให้พวกเจ้าออกไปทั่วโลกเถอะ แล้วประกาศข่าวประเสริฐต่อมนุษย์เมิ้ดคู่คนเด้อ

16:16 ผู้ที่เซื่อวางใจกับฮับพิธีจุ่มน้ำกะสิรอด แต่ฝ่ายผู้ที่บ่ฮับเซื่อสิบ่วิดการลงโทษ

16:17 แล้วเครื่องหมายสำคัญแนวหมู่นี้สิตามคนที่เซื่อ คือเขาสิขับไล่ผีออกโดยในนามของเฮา เขาสิเว้าภาษาอื่นๆ ที่บ่ฮู้จักมาก่อน

16:18 พวกเขาสิจับงูขึ้นมาได้ แล้วคั่นเขาสิกินสิดื่มแนวเป็นพิษเป็นภัย มันสิบ่เป็นอันตรายกับเขา แล้วเขาสิวางมือเทิงคนป่วยไข้ แล้วคนป่วยไข้ฮั้นสิเซาเป็นดีโลด”

16:19 จั่งซั้น บัดองค์พระผู้เป็นเจ้าเว้ากับเขาแล้ว เพิ่นจั่งถืกฮับขึ้นไปในสวรรค์ นั่งอยู่เบื้องขวาของพระเจ้า

16:20 แล้วพวกลูกศิษย์ฮั้นจั่งออกไปประกาศสอนอยู่ทั่วเมิ้ดคู่หม่อง แล้วองค์พระผู้เป็นเจ้าได้ฮ่วมงานนำเขา สนับสนุนคำสอนของเขาโดยเครื่องหมายสำคัญที่ประกอบตามฮั้น อาเมน