14:1 บัดนี้ มันเป็นที่ว่า พระเยซูพวมเข้าเฮือนผู้นำคนหนึ่งในพวกคณะฟาริสี ว่าสิกินข้าว เป็นมื้อพักงานของคนยิว แล้วพวกเขากะพากันซอมเบิ่งถ้าจับผิดเพิ่น

14:2 แล้ว นี่แน่ะ มีซายผู้หนึ่งเป็นโรคบวม อยู่ทางหน้าพระเยซู

14:3 แล้วพระเยซูกะเลยถามพวกครูบาอาจารย์ฯกับพวกนักศาสนาคณะฟาริสีอยู่ฮั่น ลองเบิ่งว่า “คั่นซ่อยปัวคนให้เซาโรคเป็นดีในมื้อพักงานหนิ มันสิผิดกฎบัญญัติอยู่บ้อ”

14:4 แต่พวกเขาบ่ปากเลย พระเยซูเลยปัวโรคบวมให้ซายผู้ฮั้นให้เซาเป็นดี แล้วกะปล่อยเขาไป

14:5 แล้วเพิ่นหันมาถามพวกคนอยู่ฮั้นว่า “ในพวกเจ้าหนิมีใผเคยมีงัวมีลาที่ตกน้ำส้างในมื้อพักงาน แล้วบ่ได้ฟ้าวเอาขึ้นโลดบ้อ”

14:6 บัดนี้ พวกเขาปากบ่ออก ตอบเพิ่นบ่ได้เลยในเรื่องนี้

14:7 จั่งซั้น บัดพอพระเยซูสังเกตุว่าพวกแขกที่มาฮั้น เขามักสิเลือกนั่งในหม่องดีๆ ที่มีเกียรติ เพิ่นกะเลยเว้าเรื่องเปรียบเทียบปันเขาฟังว่า

14:8 “บัดยามเขาเซิญพวกเจ้าไปงานกินดอง อย่าสู่ขึ้นไปนั่งหม่องดีๆ ที่มีเกียรติหลายเด้อ หาลางเทื่อเจ้าภาพเพิ่นได้เซิญแขกที่มีเกียรติหลายกว่าเจ้า

14:9 แล้วเจ้าภาพผู้เซิญมาฮั่น ลาวสิมาบอกเจ้าให้ลุกให้ผู้ฮั้นมานั่งแทน แล้วเจ้าสิต้องไปนั่งหม่องต่ำที่บ่มีเกียรติ ไปอับอายขายหน้าอยู่ฮั่น

14:10 แต่ว่า บัดเขาเซิญเจ้าไปในงาน ให้ไปหานั่งอยู่หม่องบ่ค่อยมีเกียรติ แล้วบัดเจ้าภาพมา เพิ่นอาจสิเว้าว่า ‘หมู่เอ้ย เซิญขึ้นไปนั่งอยู่หม่องมีเกียรติหลายเด้อ’ แล้วเจ้ากะสิมีเกียรติต่อหน้าต่อตาเมิ้ดคู่คนที่ฮ่วมโต๊ะนำกันกับเจ้า

14:11 คือผู้ใดยกโตซอกหาแต่เกียรติให้เจ้าของ สิต้องถืกถ่อมลง แต่ว่าคั่นผู้ใดฮู้จักถ่อมโตลง ผู้ฮั้นสิฮับการยกขึ้นให้มีเกียรติ”

14:12 แล้วพระเยซูเว้ากับฟาริสีผู้ที่เซิญเพิ่นมาฮั่นว่า “บัดยามเจ้าจัดงานเลี้ยงต่างๆ อย่าเซิญแต่หมู่แต่พี่น้อง หรือเพื่อนบ้านผู้ฮั่งมีมาหลาย บ่ซั่นเขาสิเซิญเจ้าไปเป็นการตอบแทนบุญคุณกันซื่อๆ

14:13 แต่ว่า บัดเจ้าจัดงานเลี้ยง ให้เซิญพวกคนจน คนพิการ คนง่อย กับคนตาบอดดีกว่า

14:14 แล้วเจ้าสิได้พรเป็นสุขหลาย ย้อนคนพวกนี้บ่สามารถตอบแทนบุญคุณอีหยังเจ้าได้ แต่เจ้าสิได้การตอบแทนในมื้อที่คนของพระเจ้าคืนมาจากตายพู้น”

14:15 บัดนี้ มีผู้หนึ่งที่ฮ่วมโต๊ะนำกันกับพระเยซู บัดพอได้ยินเว้าแนวนี้กะเลยเว้ากับเพิ่นว่า “คนที่ฮ่วมโต๊ะกินกันในแผ่นดินของพระเจ้าฮั่นกะสิได้พรเป็นสุขหลาย เนาะ”

14:16 แล้วพระเยซูเว้ากับผู้ฮั้นเป็นเรื่องเปรียบเทียบว่า “มีนายคนหนึ่งได้จัดงานกินเลี้ยงใหญ่โต แล้วได้เซิญคนไว้หลายๆ คน

14:17 แล้วบัดใกล้ฮอดยามกินเลี้ยง นายกะใซ้ทาสใซ้ของลาวให้ไปเอิ้นพวกคนที่ได้เซิญไว้ฮั่นว่า ‘เซิญมาเด้อ เมิ้ดคู่แนวได้เตรียมไว้แล้ว’

14:18 แต่พวกคนที่เพิ่นเซิญไว้ฮั่นมีแต่พากันแก้โต ผู้หนึ่งกะเว้าว่า ‘เฮาเพิ่งซื้อที่นามาใหม่ๆ ต้องไปเลาะเบิ่งซะก่อน เฮาสิขอโตแหน่’

14:19 อีกผู้หนึ่งกะเว้าว่า ‘เฮาได้ซื้องัวใหม่ห้าคู่ พวมสิไปลองเบิ่งมันเดียวหนิ เฮาเลยขอโตแหน่’

14:20 แล้วยังอีกผู้หนึ่งกะเว้าว่า ‘เฮาหากะแต่งเมีย เฮาไปบ่ได้ดอก’

14:21 ไปมาแล้ว ทาสใซ้ฮั่นกะรายงานให้นายฟังตามคำปฏิเสธแนวที่คนได้เว้าฮั้น พอนายได้ยินกะบ่พอใจหลาย เลยสั่งทาสใซ้ฮั่นอีกว่า ‘ให้ฟ้าวออกไปไวๆ ตามกอกตามซอยทั่วเมืองเด้อ ไปหาเซิญคนจน คนพิการ คนง่อย พร้อมคนตาบอด ให้มากินนำกันเด้อ’

14:22 แล้วทาสใซ้ฮั่นกะเว้าว่า ‘นายเอ้ย ผู้ข้าได้ไปหาเซิญเขามาเมิ้ดแล้ว แล้วยังมีหม่องว่างอีกหลาย’

14:23 นายเลยบอกอีกว่า ‘จั่งซั่น ให้ออกไปตามถนนหนทางแถวบ้านนอกคอกนา แล้วพ้อใผกะให้เซิญมาโลด เพื่อเฮือนของเฮาหนิสิได้เต็ม’

14:24 คือเฮาสิบอกเจ้าว่า ‘คนพวกฮั่นที่เฮาได้เซิญไว้ เฮาสิบ่ให้มาฮ่วมโต๊ะซิมจักคำเลย’”

14:25 บัดนี้ ได้มีคนหลวงหลายพากันไปนำพระเยซู แล้วเพิ่นได้เหลียวมาเว้ากับพวกเขาว่า

14:26 “คั่นผู้ใดมาหาเฮา ผู้ฮั้นต้องฮักเฮาหลายกว่าฮักพ่อแม่ ทั้งลูกเมีย ทั้งพี่น้องซายญิง เอ้อ แม้นแต่ซีวิตโตเองนำ บ่ซั่นผู้ฮั้นสิเป็นลูกศิษย์ของเฮาบ่ได้เลย

14:27 แล้วผู้ใดบ่สละซีวิตแบกเอาหลักประหารของโตเอง แล้วตามเฮามา ผู้ฮั้นสิเป็นลูกศิษย์ของเฮาบ่ได้

14:28 คือ มีใผในพวกเจ้าที่ตั้งใจสิสร้างหอคอย สิบ่ได้นั่งลงไล่เบิ่งเงินซะก่อน ว่ามีพอที่สิเฮ็ดให้มันแล้วหรือบ่

14:29 บ่ซั่น หาลางเทื่อ บัดลงมือสิสร้าง แล้วบ่สามารถเฮ็ดให้มันเสร็จ คู่คนที่เห็นกะสิหัวขวัญเยาะเย้ยเขา

14:30 ว่า คนนี้มีโครงการสร้างแต่บ่สามารถเฮ็ดให้มันแล้ว

14:31 หรือว่าสิมีพญาเมืองใดที่มีทหารแค่หมื่นเดียว บัดยามพญาเมืองอื่นผู้มีทหารสองหมื่นคนยกทัพสิมาตี พญาผู้มีทหารแค่หมื่นเดียวฮั่นสิบ่ปรึกษาหารือกันซะก่อนบ้อ ว่ากำลังมีพอสิสู้เขาได้

14:32 หรือว่า บัดพญาผู้มีกำลังหลายกว่ายังอยู่แต่ไกลๆ พญาผู้มีกำลังน้อยกว่าสิส่งคณะผู้แทนออกไปเจรจาถามข้อตกลงให้คืนดีกันซะก่อน

14:33 จั่งซั่นล่ะ แม่นใผกะอย่าในพวกเจ้าหนิ คั่นบ่ยอมสละเมิ้ดคู่อันคู่แนวซะก่อน บ่มีทางที่เขาสิเป็นลูกศิษย์ของเฮาได้

14:34 เว้าพื้น เกลือหนิเป็นประโยชน์ได้หลายแนว แต่คั่นความเค็มจืดจางลงไปแล้ว สิเฮ็ดจั่งใดให้มันคืนรสซาติเค็มอีก

14:35 สิใซ้ปรับปรุงดินกะบ่ได้ สิเป็นปุ๋ยคอกกะบ่ได้นำ มีแต่สิโยนถิ้มซื่อๆ ใผมีหูกะให้ฟังเอาเด้อ”