17:1 พอพระเยซูเว้าถ้อยคำนี้แล้ว เพิ่นกะเงยหน้าขึ้นไปเบิ่งเทิงฟ้าแล้วเว้าว่า “โอ้ พระเจ้า พ่อของผู้ข้าเอ้ย มันได้ฮอดยามฮั้นแล้ว ขอพ่อที่สิมอบเกียรติให้กับลูก เพื่อลูกสิได้ตอบสนองถวายพระเกียรติให้กับพ่อเทอญ

17:2 คือจั่งที่พ่อได้มอบสิทธิ์อำนาจให้กับผู้ข้าเหนือมนุษย์เมิ้ดคู่คน เพื่อว่าผู้ข้าสิได้ให้ซีวิตนิรันดร์กับผู้คนทั้งหลายที่พ่อได้ให้ไว้กับลูก

17:3 แล้วซีวิตนิรันดร์กะเป็นแนวนี้ ที่ว่าเขาทั้งหลายได้ฮู้จักพ่อ ผู้เป็นพระเจ้าเที่ยงแท้แต่ผู้เดียว แล้วฮู้จักผู้ข้านำ คือพระเยซูคริสต์พระผู้โปรดที่พ่อได้ใซ้มา

17:4 ผู้ข้าได้ถวายพระเกียรติให้พ่ออยู่ในโลกนี้ กับได้เฮ็ดการงานที่พ่อได้มอบไว้กับลูก

17:5 แล้วบัดนี้ พระเจ้าผู้เป็นพ่อเอ้ย ขอให้เกียรติลูกพร้อมกับพ่อนำ โดยพระเกียรติฮั้นที่ลูกเคยมีฮวมกับพ่อตั้งแต่ก่อนสร้างโลก

17:6 ลูกได้เปิดเผยพระนามของพ่อให้กับพวกซายผู้ที่พ่อได้มอบให้ลูกออกจากโลก ซึ่งพวกเขาเป็นคนของพ่ออยู่แล้วที่พ่อได้ให้ลูก แล้วพวกเขาได้ฮักษาคำของพ่อนำ

17:7 บัดนี้ พวกเขาได้ฮู้จักว่า เมิ้ดคู่แนวที่พ่อได้มอบไว้กับลูกฮั่น ได้มาจากพ่อ

17:8 โดยว่าลูกได้ให้ถ้อยคำที่พ่อได้ฝากไว้กับลูกฮั้น แล้วพวกเขาได้ฮับเอาไว้ กับได้ฮู้จักคักแน่ว่าลูกได้ลงมาจากพ่อ แล้วพวกเขาได้เซื่อมั่นว่า พ่อได้ใซ้ลูกมา

17:9 บัดนี้ ลูกจึงอธิษฐานวอนขอเพื่อพวกเขา คือลูกบ่ได้อธิษฐานวอนขอเพื่อโลก แต่ได้วอนขอเพื่อคนพวกนี้ที่พ่อได้มอบไว้ให้กับลูก ย้อนว่าพวกเขาเป็นคนของพ่อ

17:10 คือเมิ้ดคู่แนวที่ลูกมีอยู่กะเป็นของพ่อ แล้วคู่แนวที่พ่อมีอยู่กะเป็นของลูก แล้วลูกได้ฮับเกียรติในคนพวกนี้นำ

17:11 บัดนี้ ลูกบ่ได้อยู่ในโลกนี้อีกต่อไป แต่ว่าพวกเขากะยังอยู่ในโลก แต่ลูกสิกลับไปหาพ่อ โอพ่อ ผู้ศักดิ์สิทธิ์บริสุทธิ์เอ้ย ขอโปรดเบิ่งแยงฮักษาพวกเขานี้ไว้ในพระนามของพ่อ ผู้ที่พ่อได้มอบไว้ให้กับลูกหนิ เพื่อพวกเขาสิได้เป็นน้ำหนึ่งใจเดียวกัน คือจั่งพ่อกับลูก

17:12 บัดลูกยังอยู่กับพวกเขาตอนอยู่ในโลก ลูกได้ฮักษาพวกเขาไว้อย่างปลอดภัยในพระนามของพ่อ คือลูกได้ป้องกันพวกเขาผู้ที่พ่อได้มอบไว้ให้ฮั้น แล้วบ่มีใผได้หลงทางไปเลย นอกจากผู้ที่สิพินาศฮั้นล่ะ เพื่อให้เป็นไปตามพระคำที่ได้กล่าวไว้ (ดูสดุดี 41:9)

17:13 แล้วบัดนี้ ลูกพวมสิกลับไปหาพ่อ แล้วลูกจึงเว้าจั่งซี้ยามยังอยู่ในโลก เพื่อพวกเขาสิได้มีความซื่นซมยินดีของลูกอย่างเต็มเปี่ยมอยู่ในโตเขา

17:14 ลูกได้มอบถ้อยคำของพ่อไว้ให้กับพวกเขา แล้วซาวโลกได้ซังพวกเขา ย้อนว่าพวกเขาบ่ได้อยู่ฝ่ายโลกนี้ คือจั่งที่ลูกบ่ได้อยู่ฝ่ายโลก

17:15 ลูกบ่ได้ขอให้พ่อเอาพวกเขาออกจากโลกดอก เพียงแต่ขอให้พ่อฮักษาเขาไว้จากเจ้ามารร้าย

17:16 พวกเขาบ่ได้อยู่ฝ่ายโลก คือจั่งที่ลูกบ่ได้อยู่ฝ่ายโลก

17:17 ขอแยกพวกเขาไว้ให้บริสุทธิ์เฉพาะพ่อด้วยหลักความจริงของพ่อ พระคำของพ่อฮั้นคือความจริง

17:18 พ่อได้ใซ้ลูกให้เข้ามาอยู่ในโลกส่ำใด ลูกกะได้ใซ้พวกเขาให้ออกไปในโลกนี้ส่ำฮั้นคือกัน

17:19 แล้วย้อนเห็นแก่พวกเขาเอง ลูกได้อุทิศซีวิตไว้เฉพาะ เพื่อพวกเขาสิได้อุทิศซีวิตไว้เฉพาะหลักความจริงฮั้นล่ะ

17:20 ลูกบ่ได้อธิษฐานวอนขอเพื่อพวกเขาท่อฮั้น แต่เพื่อคู่คนที่สิเซื่อวางใจในลูกนำ โดยคำพยานของพวกเขา

17:21 เพื่อว่าเขาทั้งหลายสิเป็นน้ำหนึ่งใจเดียวต่อกันและกัน คือจั่งที่พ่อเป็นน้ำหนึ่งใจเดียวกันและกันกับลูก เพื่อพวกเขาสิเป็นน้ำหนึ่งใจเดียวกันและกันกับสองพ่อลูกเฮา เพื่อโลกสิได้ฮู้ว่าพ่อได้ใซ้ลูกมาอีหลี

17:22 แล้วเกียรติที่พ่อมอบไว้กับลูกฮั้น ลูกได้มอบไว้กับพวกเขานำ เพื่อเขาสิได้เป็นน้ำหนึ่งใจเดียวกันและกัน คือจั่งที่พ่อกับลูกได้เป็นน้ำหนึ่งใจเดียวกันฮั้น

17:23 คือลูกเป็นน้ำหนึ่งใจเดียวกันกับพวกเขา แล้วพ่อกะเป็นน้ำหนึ่งใจเดียวกันกับลูก เพื่อพวกเขาสิได้เป็นน้ำหนึ่งใจเดียวกันอย่างสมบูรณ์แบบ เพื่อโลกสิได้ฮู้ว่าพ่อได้ใซ้ลูกมา พร้อมได้ฮักแพงพวกเขาคือจั่งที่ได้ฮักแพงลูก

17:24 พ่อเอ้ย ลูกปรารถนาอยากให้พวกเขาที่พ่อได้มอบไว้ให้กับลูกหนิ ให้พวกเขาอยู่หม่องเดียวกันกับลูก เพื่อพวกเขาสิได้เห็นพระสิริอันรุ่งโรจน์ของลูกที่พ่อได้ให้ไว้กับลูก ย้อนว่าพ่อได้ฮักแพงลูกมาตั้งแต่ก่อนสร้างโลก

17:25 โอ้ พ่อผู้ยุติธรรมเอ้ย โลกนี้บ่เคยฮู้จักพ่อเลย แต่ว่าลูกฮู้จักพ่อ แล้วพวกเขาได้ฮู้กันว่าพ่อได้ใซ้ลูกมาอีหลี

17:26 บัดนี้ลูกได้เปิดเผยพระนามของพ่อให้พวกเขาฮู้จักอยู่ แล้วสิเปิดเผยให้ฮู้จักอีกต่อไป เพื่อว่าความฮักแพงที่พ่อมีต่อลูก สิได้สถิตอยู่ในพวกเขา แล้วลูกกะสิได้สถิตอยู่ในพวกเขานำ อาเมน”