28:1 บัดพวกเขาขึ้นเกาะรอดพ้นภัยแล้ว เขาจั่งฮู้ว่าเกาะฮั้นซื่อ มอลตา

28:2 แล้วฝ่ายซาวเกาะฮั้นกะมีความกรุณาต่อพวกเฮาบ่น้อย กะเลยดังไฟต้อนฮับเฮาคู่คน ย้อนฝนพวมตกแล้วอากาศกะหนาว

28:3 แล้วบัดเปาโลได้เก็บฟืนมัดหนึ่งมาวางใส่ไฟ พอดีมีงูพิษโตหนึ่งพอถืกความฮ้อนกะเลื้อยออกมาจากฟืนฮั้น กัดมือของเปาโล คาบงับไว้บ่ปล่อยเลย

28:4 บัดพวกซาวเกาะเห็นงูห้อยติดมือเปาโลฮั้น จั่งเว้ากันว่า “คนนี้น่าสิเป็นฆาตกรคักแน่ เถิงแม้นว่ารอดพ้นจากทะเลแล้ว กรรมเวรของเขาบ่ยอมให้รอดตายไปได้เลย”

28:5 แต่เปาโลกะซิดมือให้งูตกลงไปในไฟ แล้วโตลาวบ่ได้เป็นอันตรายจักหน่อย

28:6 แต่ฝ่ายพวกคนซาวเกาะกะคอยถ้าอยู่ คึดว่ามือลาวสิต้องไข่ขึ้นมา หรือสิต้องล้มลงตายกับหม่อง แต่บัดพวกเขาถ้าเบิ่งโดนเติบกะบ่เห็นลาวเป็นอีหยัง พวกเขาจั่งกลับถือว่าลาวต้องเป็นเทพเจ้าแนวใดแนวหนึ่ง

28:7 แล้วในบริเวณฮั้น เป็นที่ของหัวหน้าเกาะซื่อว่า ปูบลิอัส ผู้นี้มีไฮ่นามีข้าวของเงินทองหลาย แล้วเขาได้ต้อนฮับเลี้ยงพวกเฮาไว้อย่างดีเป็นเวลาสามมื้อเต็ม

28:8 แล้วมันเป็นที่ว่า พ่อของ ปูบลิอัส ฮั้นนอนป่วยอยู่ เป็นไข้กับเป็นโรคท้องบิดอย่างแฮงนำ เปาโลจั่งเข้าไปหาเขาแล้วกะอธิษฐานวอนขอนำพระเจ้า แล้ววางมือเทิงเขา จั่งได้เซาเป็นดีโลด

28:9 บัดเฮ็ดจั่งซั้นแล้ว คนอื่นๆ อยู่เกาะฮั้นที่มีโรคภัยไข้เจ็บต่างๆ กะมาหาเปาโล แล้วกะได้ฮับการปัวเซาเป็นดีคือกัน

28:10 พวกเขาจั่งให้เกียรติพวกเฮาหลายๆ อย่าง บัดเฮาพร้อมสิแล่นเฮืออีกลำหนึ่งออกจากฮั้นไป เขากะเอาสิ่งของออกมาหลายแนวถวายให้ตามที่เฮาต้องการตอนสิออกไป

28:11 หลังจากสามเดือน พวกเฮาจั่งลงเฮือที่แล่นมาจากเมืองอเล็กซานเดรีย เป็นเฮือที่จอดค้างอยู่เกาะฮั้นตอนยามหนาว เฮือลำฮั้นมีฮูปเทพเจ้าแกะสลักไว้ที่หัวเฮือ เป็นฝาแฝดซื่อคาสเตอร์ กับพอลลักซ์

28:12 อยู่มาพวกเฮาได้แวะเมืองไซราคิ้วส์ จอดไว้อยู่ฮั้นสามมื้อ

28:13 แล้วจากฮั้น พวกเฮาได้แล่นอ้อมไปเมืองเรยีอูม แล้วอีกมื้อหนึ่งลมทิศใต้กะพัดมา แล้วมื้อที่สองจั่งมาฮอดเมืองโปทิโอลี

28:14 ในเมืองฮั้นเฮาได้พ้อกันกับพวกพี่น้อง ที่ได้เซิญพวกเฮาให้พักอยู่กับเขาเจ็ดมื้อ หลังจากฮั้นพวกเฮาจั่งมุ่งหน้าแล่นไปทางกรุงโรม

28:15 บัดพวกพี่น้องในกรุงโรมได้ยินข่าวเถิงพวกเฮา พวกเขาจั่งเดินทางออกมาต้อนฮับพวกเฮาอยู่หม่องตลาดอัปปีอัส กับอยู่หม่องสามโรงแรม บัดเปาโลเห็นเขาลาวเลยขอบคุณพระเจ้า มีกำลังใจหลายขึ้น

28:16 บัดพวกเฮามาฮอดกรุงโรมแล้ว นายร้อยได้มอบพวกนักโทษไว้กับผู้บัญชาการอยู่ฮั้น แต่ส่วนเปาโลนายร้อยอนุญาตให้ลาวอยู่คนเดียว กับมีทหารคนหนึ่งเบิ่งแยงลาวไว้

28:17 แล้วมันเป็นไปที่ว่า หลังจากสามมื้อ เปาโลจั่งเซิญพวกผู้หลักผู้ใหญ่ในพวกยิวอยู่ฮั้นให้มาตุ้มโฮมกัน บัดพวกเขามาพร้อมหน้าพร้อมตากันแล้วลาวจั่งบอกเขาว่า “ท่านพี่น้องทั้งหลาย เอ้ย แม้นแต่ข้อยบ่ได้เฮ็ดผิดอีหยังต่อซนซาติเฮา หรือต่อธรรมเนียมอันดีงามของพ่อตระกูลเฮา ข้อยกะยังถืกมอบไว้เป็นนักโทษมาจากเมืองเยรูซาเล็ม ถืกฝากไว้ในมือของพวกโรม

28:18 แล้วบัดพวกเขาได้สอบสวนข้อยแล้ว เขาว่าสิปล่อยข้อยไป ย้อนบ่มีเหตุอีหยังที่ข้อยควรสิต้องถืกประหาร

28:19 แต่ว่าบัดพวกยิวอยู่ฮั่นคัดค้าน ข้อยเลยต้องอุทธรณ์เถิงจักรพรรดิซีซาร์ บ่แม่นว่าข้อยมีแนวสิฟ้องคนฮ่วมซาติของข้อยดอก

28:20 ย้อนเหตุนี้ล่ะ ข้อยจั่งเชิญพวกเจ้ามาเพื่อสิได้เห็นหน้าค่าตากัน กับอยากเว้ากับพวกเจ้านำ คือข้อยได้ถืกล่ามโซ่ไว้แนวนี้ ย้อนข้อยเห็นแก่ความหวังของซนซาติอิสราเอลเฮา”

28:21 พวกเขาจั่งตอบลาวว่า “พวกเฮาบ่ได้ฮับจดหมายจากแคว้นยูเดียเถิงเรื่องเจ้า แล้วกะบ่มีพวกพี่น้องผู้หนึ่งผู้ใดมารายงานหรือเว้าร้ายใส่เจ้าดอก

28:22 แต่ว่าพวกข้อยกะอยากสิฟังเจ้าอธิบายว่ามีความคึดเห็นจั่งใด ย้อนพวกข้อยฮู้แต่ว่า พวกที่ถือนอกฮีตนอกฮอยทางนี้กะถืกติเตียน ต่อต้านอยู่คู่หม่อง”

28:23 แล้วบัดนัดมื้อไว้ มีหลายคนมาฟังเปาโลอยู่ที่พักของลาว ลาวจั่งอธิบายอย่างจริงจังให้เขาฟังตั้งแต่เซ้าไปหาค่ำ เป็นพยานเถิงแผ่นดินของพระเจ้า พยายามซักซวนจูงใจพวกเขาในเรื่องพระเยซู โดยซี้แจงข้อความจากกฎบัญญัติของโมเสส กับจากหนังสือของผู้เป็นปากเป็นเสียงของพระเจ้านำ

28:24 แล้วในคนหมู่ฮั้น ฝ่ายหนึ่งยอมฮับในความเว้าของลาวว่าแม่น แต่อีกฝ่ายหนึ่งว่าบ่แม่น

28:25 แล้วเนื่องจากว่า พวกคนยิวฮั้นบ่สามารถลงรอยตกลงกันได้ในเรื่องนี้กะเลยลากันไป แต่ก่อนลาไปฮั้น เปาโลได้แถมพระคำอีกข้อหนึ่งให้เขาว่า “พระวิญญาณได้เว้าถืกต้องพอแฮงแล้วต่อพวกพ่อตระกูลของพวกเฮา โดยผ่านทางคำพยากรณ์ของอิสยาห์

28:26 ว่า ‘ให้ไปหาซนซาติของเฮานี้กับเว้าว่า “พวกเจ้าสิฟังได้ยินอยู่ แต่สิบ่เข้าใจ สิเบิ่งเห็นอยู่ แต่มันสิบ่ซอดเลย

28:27 ย้อนว่าจิตใจของคนซาตินี้กะแข็งกระด้างไป กับหูของเขากะตันปึก ทั้งตาของเขากะปิดลง บ่ซั่นพวกเขาอาจเห็นกับตา กับอาจได้ยินกับหู เถิงอาจเข้าใจดีด้วยจิตใจของเขาแล้วหันมาหา เพื่อเฮาสิปัวเขาให้เซาเป็นดี”’

28:28 จั่งซั้น ขอให้พวกเจ้าฮู้กันว่า เรื่องความรอดของพระเจ้าฮั้น ได้ส่งไปฮอดคนต่างซาติแล้ว แล้วพวกเขาสิฮับฟังโลด”

28:29 แล้วบัดเปาโลได้เว้าจบแล้ว พวกยิวฮั้นกะจากไป จั่งได้โต้เถียงกันอย่างใหญ่ระหว่างพวกเขาเองในเรื่องนี้

28:30 ส่วนเปาโลจั่งได้อาศัยอยู่ในเฮือนเซ่าของลาวฮั่นครบสองปีเต็ม กับได้ต้อนฮับเมิ้ดคู่คนที่มาหาลาว

28:31 ทั้งประกาศเรื่องแผ่นดินของพระเจ้า กับสอนหลักข้อต่างๆ เกี่ยวกับพระเยซูคริสต์เจ้านำ ซี้แจงโดยความมั่นใจ จั่งบ่มีใผขัดขวางห้ามปรามเลย