4:1 จั่งซั้น ด้วยว่า พระคริสต์ได้ทนทุกข์ทรมานในเนื้อหนังเพื่อพวกเฮาทั้งหลาย จั่งให้พวกเจ้าตั้งความนึกคึดอย่างเดียวกัน เป็นเครื่องอาวุธป้องกันโตไว้เด้อ โดยว่า ผู้คนที่ทนทุกข์ทรมานทางเนื้อหนังได้ยกเลิกการเกี่ยวข้องกับบาปแล้ว

4:2 เพื่อเขาผู้ฮั้นสิบ่ดำเนินซีวิตอยู่ในโลกนี้ต่อไปตามเนื้อหนัง ตามความกระหายฝ่ายสังคม แต่ตามพระประสงค์ของพระเจ้า

4:3 โดยว่า พวกเฮาเคยใซ้ซีวิตเก่า เฮ็ดตามใจมักอย่างคนต่างซาติ ตอนพวกเฮาเคยดำเนินซีวิตตามแนวสกปรกลามก ตามราคะตัณหา กินเหล้าเมายา กินเลี้ยงต่างๆ จัดวงกินเหล้าโวยวายกัน กับการไหว้ฮูปเคารพอันเป็นตาซัง

4:4 ซึ่งคนจำพวกนี้แปลกใจเป็นตางึดที่ว่า พวกเจ้าได้เลิกการดำเนินตามเขา คือบ่ได้เฮ็ดแนวมะลำมะลอยนำพวกเขาอีกต่อไป จั่งเว้าใส่ร้ายพวกเจ้า

4:5 แล้วคนจำพวกนี้สิต้องรายงานโตต่อพระเจ้า ผู้เพิ่นพร้อมแล้วที่พิพากษาทั้งคนเป็นกับคนตาย

4:6 ย้อนเหตุนี้เอง ข่าวประเสริฐได้ฮับการประกาศ แม้แต่ประกาศให้คนตายไปแล้วฮั้น เถิงแม้นว่าเขาสิถืกพิพากษาด้วยมนุษย์ในเนื้อหนัง แต่เขาสิมีซีวิตอยู่ฝ่ายจิตวิญญาณตามพระประสงค์ของพระเจ้า

4:7 แต่ว่า การสิ้นลงของเมิ้ดทั้งปวงใกล้สิมาฮอดแล้ว จั่งซั้น ให้พวกเจ้าอยู่อย่างรอบคอบเด้อ คอยเฝ้าระวังในการอธิษฐานนำเด้อ

4:8 แล้วสำคัญกว่าแนวอื่นทั้งเมิ้ด พวกเจ้าควรสิมีใจฮักแพงต่อกันและกันด้วยใจกระตือรือร้น ด้วยว่า ความฮักแพงสามารถปิดบังความผิดหลายๆ ไว้ได้

4:9 แล้วพวกเจ้าควรสิมีใจต้อนฮับกันและกันโดยบ่มีการจ่มว่ากัน

4:10 ตามที่คู่คนเคยได้ฮับพรสวรรค์พิเศษจากพระเจ้ามาแล้ว ให้ปรนนิบัติซึ่งกันและกัน คือจั่งผู้ฮับใซ้ที่ดี ที่ได้ฮับมอบหน้าที่ในการเบิ่งแยงพระกรุณาธิคุณของพระเจ้า ซึ่งมีหลายอย่างเหลือล้น

4:11 คั่นผู้หนึ่งผู้ใดสิเว้าเป็นคำสั่งสอน กะให้เว้าตามถ้อยคำของพระเจ้า คั่นผู้หนึ่งผู้ใดสิปรนนิบัติฮับใซ้กัน กะให้ปรนนิบัติฮับใซ้ตามความสามารถที่พระเจ้าได้โปรดให้ เพื่อว่าพระเจ้าสิได้ฮับเกียรติโดยทางพระเยซูคริสต์ ซึ่งว่าพระเกียรติกับอำนาจครอบครองฮั้น มีแด่เพิ่นตลอดไปเป็นนิตย์ อาเมน

4:12 บัดนี้ พี่น้องที่ฮักเอ้ย อย่าสู่คึดแปลกใจหลายย้อนการทดลองอันแสนสาหัสคือปานไฟ ที่สิมาพิสูจน์พวกเจ้าเด้อ อย่างเป็นเหตุการณ์อันแปลกประหลาดที่ได้เกิดขึ้นกับพวกเจ้าด้วยบังเอิญ

4:13 แต่ให้ซื่นซมยินดีเด้อ ที่ว่าพวกเจ้าได้มีโอกาสฮ่วมทุกข์กับพระคริสต์ เพื่อว่าบัดเพิ่นมาปรากฏเพิ่นเองด้วยสง่าราศี พวกเจ้ากะสิดีใจมีความซื่นซมยินดีอย่างเหลือล้นนำ

4:14 คือ คั่นพวกเจ้าถืกด่าว่ากล่าวย้อนเห็นแก่พระนามของพระคริสต์ พวกเจ้ากะได้พรเป็นสุข ย้อนว่า พระวิญญาณที่ประกอบด้วยพระสิริของพระเจ้าสถิตอยู่กับพวกเจ้าแล้ว คือ ฝ่ายชาว โลกฮั่น เพิ่นกะถืกการกล่าวร้าย แต่ฝ่ายพวกเจ้าเพิ่นได้ฮับการถวายเกียรติ

4:15 แต่ว่า อย่าให้ผู้ใดในพวกเจ้าเดือดร้อนเป็นโทษย้อนเฮ็ดผิดเด้อ ว่าเป็นฆาตกรรม หรือเป็นขโมย หรือเฮ็ดซั่วร้าย หรือเที่ยวยุ่งกับธุระของคนอื่น

4:16 แต่คั่นผู้ใดเดือดร้อนเป็นโทษย้อนเป็นคริสเตียน อย่าให้ผู้ฮั้นถือว่าเป็นเรื่องละอายเลยเด้อ แต่ให้เขาถวายเกียรติสรรเสริญพระเจ้าในการฮั้นเด้อ

4:17 คือ มันฮอดยามแล้วที่การพิพากษาสิต้องเริ่มต้นอยู่ครัวเฮือนของพระเจ้าก่อน แล้วคั่นมันสิเริ่มต้นกับพวกเฮาก่อน จุดปลายทางของพวกคนที่บ่ยอมเชื่อฟังข่าวประเสริฐของพระเจ้าสิเป็นจั่งใด

4:18 ด้วยว่า “คั่นคนชอบธรรมของพระเจ้าสิได้รอดพ้นไปได้ แต่โดยความยากลำบาก ปรากฏว่า พวกคนที่บ่ถวายเกียรติพระเจ้า กับคนขี้บาปฮั้น สิอยู่ใส”

4:19 จั่งซั้น ขอให้ผู้คนทั้งหลายที่ต้องทนทุกข์ยากตามพระประสงค์ของพระเจ้าฮั้น ฝากจิตวิญญาณของโตเองไว้กับเพิ่นเด้อ ในการเฮ็ดดี คือจั่งฝากไว้กับพระผู้สร้าง ผู้เพิ่นสัตย์ซื่อภักดีเด้อ