5:1 จั่งซั้น บัดเป็นคนซอบธรรมด้วยความเซื่อแล้ว พวกเฮาจั่งมีสันติภาพกับพระเจ้า โดยทางพระเยซูคริสต์เจ้าของเฮา

5:2 ซึ่งโดยทางพระเยซูฮั้น พวกเฮาจั่งมีสิทธิ์ในพระคุณของพระเจ้าที่พวกเฮาพวมยืนอยู่หนิ เฮาจั่งสรรเสริญในความหวังอันมั่นคงว่า พวกเฮาได้มีส่วนฮ่วมในพระสิริของพระเจ้า

5:3 แล้วบ่แม่นแต่ฮั้นอย่างเดียว เฮาจั่งมีความภูมิใจ สรรเสริญในความทุกข์ยากลำบากที่ต้องทนเอา โดยฮู้กันว่าความทุกข์ยากฮั้นได้เฮ็ดให้เกิดความทรหดอดทน

5:4 แล้วความทรหดอดทนฮั้น เป็นการทดสอบเฮ็ดให้เกิดเป็นผู้ใหญ่ แล้วการเป็นผู้ใหญ่ฮั้น เฮ็ดให้เกิดมีความหวังอันมั่นคง

5:5 แล้วความหวังอันมั่นคงฮั้น บ่ได้เฮ็ดให้อับอายขายหน้า ย้อนว่าความฮักของพระเจ้าได้หลั่งไหลเข้าสู่จิตใจของพวกเฮาอยู่เสมอ โดยทางพระวิญญาณบริสุทธิ์ ซึ่งเพิ่นได้ให้ไว้กับพวกเฮาอยู่แล้ว

5:6 คือ บัดยามคนเฮา ผู้เป็นคนบาป ยังขาดเหื่อขาดแฮง พอดีพระคริสต์ได้ลงมาตายแทนในยามเหมาะสม

5:7 คือ บ่ค่อยสิมีใผสิตายเพื่อคนซอบธรรมอันถืกต้อง แต่ห่าลางเทื่อผู้ลางคนอาจสิตายเพื่อคนดีกะได้

5:8 แต่ว่า พระเจ้าได้แสดงความฮักแพงของเพิ่น มาปรากฎให้กับคนเฮาทั้งหลายแล้ว คือในยามที่เฮายังเป็นคนบาปอยู่ พระคริสต์กะยังลงมาตายเพื่อเฮา

5:9 หลายกว่าฮั้นอีก บัดนี้เฮาได้เป็นคนซอบธรรมถืกต้องแล้ว โดยพระโลหิตของพระเยซูคริสต์ ซึ่งพวกเฮาสิได้รอดพ้นจากการโกรธเกรี้ยวของพระเจ้าโดยทางเพิ่นฮั้น

5:10 คือ คั่นว่า ในตอนที่คนเฮายังเป็นศัตรูกันกับพระเจ้า บัดนี้เฮาได้ฮับการคืนดีกันกับเพิ่นแล้ว โดยการตายแทนของพระบุตรของเพิ่น แล้วหลายกว่าฮั้นอีก คนเฮาสิได้รอดพ้นโดยซีวิตของเพิ่น

5:11 แล้วบ่แม่นเพียงแต่ฮั้น คนเฮากะยังสรรเสริญพระเจ้าโดยทางพระเยซูคริสต์เจ้าของเฮา ผู้เพิ่นที่เฮ็ดให้คนเฮาคืนดีกันกับพระเจ้าได้แล้ว

5:12 จั้งซั้น ความบาปได้เข้ามาสู่โลกโดยทางคนๆ เดียว แล้วความตาย** กะได้เข้ามาย้อนบาปฮั้นเป็นเหตุ แล้วความตายฮั้นจั่งได้ลามไปเถิงทั่วเมิ้ดคู่คน ย้อนว่าคู่คนได้เฮ็ดบาป

5:13 (คือ ก่อนมีกฎบัญญัติ ความบาปได้อยู่ในโลกแล้ว แต่ว่าบ่มีการถือโทษบาปก่อนกฎบัญญัติ

5:14 จั่งใดกะตาม ความตายได้ครอบงำตลอดมา ตั้งแต่สมัยพ่อเดิมอาดัม มาฮอดสมัยโมเสส แม้นแต่ฮอดคนที่บ่ได้เฮ็ดบาปแนวเดียวกันกับพ่อเดิมอาดัม ผู้เป็นแบบอย่างเล็งเถิงผู้เพิ่นที่สิมาในภายหน้าฮั้น

5:15 แต่พระคุณที่พระเจ้าประทานให้ กะบ่ได้คือความผิดบาปฮั้นดอก คือคั่นหลายคนต้องตายย้อนความผิดบาปของคนผู้เดียว หลายกว่าฮั้นอีก พระคุณของพระเจ้า กับซีวิตนิรันดร์ที่เพิ่นได้ประทานให้โดยพระคุณฮั้น ได้ผ่านมายังพวกเฮาโดยคนๆ เดียว คือพระเยซูคริสต์ กะมีอย่างเหลือล้นให้แก่คนหลวงหลาย

5:16 แล้วพระคุณที่พระเจ้าประทานให้ฮั้น กะบ่คือบาปที่มาทางพ่อเดิมอาดัม ผู้เฮ็ดบาปฮั้น คือการพิพากษาได้เกิดจากความผิดบาปที่อาดัมได้เฮ็ดเทื่อเดียวฮั้น จั่งเป็นเหตุให้คนหลวงหลายต้องเข้าสู่การพิพากษานำ แต่พระคุณที่พระเจ้าประทานให้ฮั้น ได้เป็นเหตุให้เป็นผู้ซอบธรรม

5:17 ย้อนว่า คั่นบาปของคนๆ เดียวได้เป็นเหตุให้ความตายครอบงำไปทั่ว หลายกว่าฮั้นอีก ส่วนผู้ที่ฮับเอาพระคุณที่มีอยู่ที่พระเจ้าประทานให้อย่างเหลือล้น กับความซอบธรรม ผู้ฮั้นกะสิได้มีซีวิต กับครอบครองโดยอีกผู้หนึ่ง คือพระเยซูคริสต์)

5:18 จั่งซั้น การลงโทษได้เข้าสู่คนเมิ้ดทั้งมวล ย้อนการละเมิดไปเทื่อเดียวของคนๆ หนึ่ง แต่ว่า การเฮ็ดดีอันชอบธรรมของอีกคนหนึ่งเทื่อเดียว ได้เป็นเหตุให้การปลดปล่อยยกโทษได้มาสู่คู่คน เถิงได้ซีวิตนิรันดร์โดยบ่คึดมูลค่า

5:19 คือ ย้อนการบ่เซื่อฟังของคนๆ หนึ่ง คนหลวงหลายได้เข้าสู่สภาพเป็นคนบาป แล้วย้อนการเซื่อฟังของอีกคนหนึ่ง เป็นเหตุให้มีคนหลวงหลายสิได้ฮับสู่สภาพเป็นคนซอบธรรม

5:20 คือว่า กฎบัญญัติมีมาเพื่อการล่วงละเมิดสิได้ปรากฏซัดเจนหลายขึ้น แต่ว่าหม่องใดที่มีบาปหลาย หม่องฮั้นกะมีพระคุณแฮงหลายกว่า

5:21 ด้วยว่า บาปได้ครอบงำเถิงความตายส่ำใด พระคุณได้ครอบครองด้วยความซอบธรรมเถิงซีวิตนิรันดร์ส่ำฮั้น โดยทางพระเยซูคริสต์เจ้าของพวกเฮา