9:1 แล้วบัดเทวทูตองค์ที่ห้าได้เป่าแตรขึ้นมา ผู้ข้าได้เห็นดาวดวงหนึ่ง ตกลงมาจากฟ้าสวรรค์เทิงแผ่นดินโลก แล้วดวงฮั้นได้ฮับมอบลูกกุญแจของเหวลึกอันบ่มีสิ้นสุด

9:2 แล้วบัดพอเทวทูตองค์ฮั้นเปิดเหวลึกอันบ่มีสิ้นสุดฮั้นออก ได้มีควันพลุ่งขึ้นมาคือปานควันเตาใหญ่ จั่งซั้น ดวงตะเว็นกับอากาศกะมืดไป ย้อนควันที่ขึ้นมาจากเหวฮั้น

9:3 แล้วมีฝูงตั๊กแตนได้บินออกจากควันฮั้น มายังแผ่นดินโลก แล้วมันได้ฮับอำนาจ คือปานอำนาจของแมงป่องมีเทิงแผ่นดินโลก

9:4 แล้วพวกมันถืกสั่งไว้ว่า บ่ให้ทำลายพุ่มไม้ใบหญ้าเทิงแผ่นดินโลก กับพืชผลกกไม้ แม้นแต่กอไม้กอตอกแนวเขียวใดๆ มีแต่ให้เฮ็ดใส่ผู้คนทั้งหลายที่บ่มีตราของพระเจ้าประทับอยู่เทิงหน้าผากท่อฮั้น

9:5 แต่บ่ให้มันฆ่าคนพวกฮั้น เพียงแต่ให้ทรมานพวกเขาเป็นเวลาห้าเดือน แล้วการทรมานฮั้น เจ็บทรมานคือปานถืกแมงป่องตอด

9:6 แล้วในยามฮั้น คนทั้งหลายสิซอกหาความตายแต่สิบ่พ้อ เขาอยากสิตาย แต่ความตายสิหนีจากเขาไป

9:7 แล้วโตตั๊กแตนฮั้น มีฮูปฮ่างคือจั่งม้าเตรียมพร้อมที่สิออกศึก แล้วเทิงหัวของมันมีมงกุฎเป็นลักษณะคือทองคำ แล้วหน้าของมันคือปานหน้าคน

9:8 แล้วขนของมันเป็นลักษณะคือปานผมแม่ญิง แล้วฟันของมันเป็นลักษณะคือปานฟันสิงโต

9:9 แล้วมันมีเสื้อเกราะทับเอิก เป็นลักษณะคือปานเสื้อเกราะเหล็ก แล้วเสียงปีกมันเป็นลักษณะคือปานเสียงรถม้าหลายคันแล่นเข้าสนามรบ

9:10 แล้วหางของมันเป็นลักษณะคือปานหางแมงป่องที่มีเหล็กใน แล้วมันมีอำนาจให้คนเจ็บปวดแฮง เป็นเวลาตลอดห้าเดือน

9:11 แล้วมันมีเจ้านายปกครองเหนือมัน เป็นเทวทูตของเหวลึกอันบ่มีสิ้นสุดฮั้น เทวทูตองค์ฮั้นมีซื่อเป็นภาษาฮีบรูว่า อาบัดโดน แต่ในภาษากรีกเอิ้นว่า อปอลลิโยน (แปลว่า ทำลาย)

9:12 แนวฉิบหายแนวที่หนึ่งผ่านไปแล้ว แล้วนี่แน่ะ ยังมีแนวฉิบหายอีกสองแนวที่สิเกิดขึ้นในภายหน้า

9:13 แล้วบัดเทวทูตองค์ที่หกฮั้นได้เป่าแตรขึ้นมา ผู้ข้าได้ยินเสียงเว้าออกมาทั้งสี่แจของแท่นบูซา ทองคำ อยู่ต่อหน้าพระเจ้า

9:14 บอกเทวทูตองค์ที่หกที่ถือแตรฮั้น สั่งว่า “ให้ปล่อยเทวทูตทั้งสี่องค์ฮั้นออก ที่ถืกขังไว้ที่แม่น้ำยูเฟรติสอันใหญ่หลวงฮั้นเด้อ”

9:15 แล้วเทวทูตทั้งสี่ฮั้นได้ถืกปล่อยออกไป ซึ่งมันได้ถืกเตรียมไว้มาแล้วสำหรับ มื้อ เดือน ปี ฮั้น คือยามที่สิให้ฆ่าผู้คนจำนวนหนึ่งในสามของมนุษย์

9:16 แล้วจำนวนทหารม้าที่ผู้ข้าได้ยินมาคือ สองร้อยล้านคน

9:17 แล้วฝ่ายกลุ่มม้าฮั้น ผู้ข้าได้เห็นในนิมิต แล้วฝ่ายผู้ที่นั่งเทิงหลังม้ากะสวมเสื้อเกราะ เป็นลักษณะสีแดงปานไฟ สีฟ้าปานดอกไม้ กับสีเหลืองปานกำมะถัน แล้วหัวของม้าฮั้นมีลักษณะคือปานหัวของสิงโต แล้วกะมีไฟกับควันกับกำมะถันพลุ่งออกจากปากของมัน

9:18 แล้วด้วยภัยพิบัติสามแนวหมู่นี้ผู้คนจำนวนหนึ่งในสามส่วนได้ถืกฆ่า คือด้วย ไฟ กับควัน กับกำมะถัน ที่พลุ่งออกมาจากปากของม้าฮั้น

9:19 ย้อนว่าฤทธิ์เดชของม้าฮั้นได้อยู่ที่ปากกับหาง แล้วหางของมันฮั้นมีลักษณะคือปานหางงูที่มีหัว แล้วมันทำร้ายคนด้วยสองแนวฮั้น

9:20 แล้วฝ่ายมนุษย์ทั้งหลายที่ยังเหลืออยู่ฮั้น คือผู้ที่บ่ได้ตายด้วยภัยพิบัติฮั้น เขายังบ่ยอมกลับใจจากการงานของมือเขา คือบ่ยอมเลิกไหว้พวกผีมาร กับบ่ยอมเลิกไหว้ฮูปเคารพบูซา บ่ว่าสิเป็นทองคำ เงิน ทองเหลือง หิน หรือไม้ ซึ่งฮูปเคารพฮั้นบ่สามารถเบิ่งเห็นได้ หรือฟัง หรือย่างได้ซ้ำ

9:21 กับว่า เขาบ่ยอมกลับใจใหม่จากการฆาตกรรม หรือการเวทมนตร์คาถา หรือการเล่นซู้ล่วงประเวณี หรือการลักขโมยของพวกเขา