2:1 จั่งซั้น คั่นมีการอบอุ่นหนุนใจในพระคริสต์ หรือการปลอบโยนโดยความฮัก หรือความสามัคคีกันโดยในพระวิญญาณ หรือการฮักแพงอีตน เห็นอกเห็นใจกัน

2:2 จั่งขอพวกเจ้าซ่อยเสริมความปิติยินดีของข้อยให้เต็มเปี่ยมเด้อ โดยมีความนึกคึดแบบเดียวกัน มีความฮักแพงอย่างเดียวกัน เป็นน้ำหนึ่งใจเดียวกัน มีความพร้อมเพรียงอย่างเดียวกัน

2:3 แล้วบ่ควรสิเฮ็ดอีหยังโดยการทุ่มเถียงกัน หรืออวดดี หรือหายศหาเกียรติให้เจ้าของ แต่ว่าควรสิน้อมหน้ามีใจถ่อมซึ่งกันและกัน ถือกันว่าคนอื่นดีกว่าโตเอง

2:4 แล้วบ่ให้เห็นแก่ผลประโยชน์ของโตเองฝ่ายเดียวเด้อ แต่ให้เห็นแก่ผลประโยชน์ของผู้อื่นนำ

2:5 คือให้พวกเจ้ามีความนึกคึดในโตเจ้า คือจั่งมีอยู่ในองค์พระเยซูคริสต์เด้อ

2:6 ผู้เพิ่นมีลักษณะภาพเป็นพระเจ้า จั่งบ่ได้ถือว่ามันเป็นการรุกล้ำก้าวก่ายที่สิเท่าเทียมกับพระเจ้า

2:7 แต่ได้วางสภาวะ ของ เพิ่นฮั้นไว้ ฮับเอาสภาพเป็นทาสฮับใซ้ ลงมาในฮูปแบบเป็นโตคน

2:8 แล้วในสภาพเป็นโตคนฮั้น เพิ่นได้ถ่อมโตลง แม้นแต่เซื่อฟังเถิงตายกะยังยอม เอ้อ ตายเทิงหลักประหารฮั้น

2:9 เป็นเหตุที่พระเจ้าได้ยกเพิ่นไว้ในตำแหน่งอย่างสูงสุด คือให้เพิ่นมีพระนามเหนือนามอื่นทั้งปวง

2:10 เพื่อ ในพระนามของพระเยซูฮั้น คู่หัวเข่าในสวรรค์กะดี เทิงแผ่นดินโลกกะดี พร้อมอยู่ใต้พื้นแผ่นดินโลกกะดี สิได้กราบลงต่อเพิ่นทั้งเมิ้ด

2:11 แล้ว เพื่อคู่ลิ้นสิยอมฮับว่าพระเยซูคริสต์ เป็นองค์พระผู้เป็นเจ้า ซึ่งเป็นที่ถวายพระเกียรติแด่พระเจ้าผู้เป็นพ่อ

2:12 จั่งซั้น พี่น้องที่ฮัก เอ้ย ตามที่พวกเจ้าเคยเชื่อฟังข้อยอยู่เสมอฮั้น บ่ว่ายามข้อยอยู่นำหรือบ่ได้อยู่นำ จั่งซั้นอุตส่าห์ให้ผลความรอดของพวกเจ้าปรากฎออก ด้วยการเคารพเกรงกลัวจนโตสั่น บัดข้อยบ่ได้อยู่นำเด้อ

2:13 ย้อนว่า แม่นพระเจ้าเอง ที่เฮ็ดในใจของพวกเจ้า เพื่อมีความปรารถนา ทั้งมีความสามารถ เกิดผลตามพระประสงค์อันพึงพอใจของเพิ่น

2:14 จั่งซั้น ให้เฮ็ดเมิ้ดคู่อันคู่แนวโดยบ่มีเสียงจ่มพึมพำหรือการทุ่มเถียงกันเด้อ

2:15 เผื่อพวกเจ้าสิเป็นผู้บริสุทธิ์บ่มีที่จับผิดได้ บ่มีพิษมีภัยอีหยังเลย คือเป็นลูกๆ ของพระเจ้าที่บ่มีที่ติ อยู่หว่างกลางยุคคดโกงเสื่อมทรามนี้ ซึ่งเขาพวมมองพวกเจ้าว่าเป็นดวงสว่างอยู่ในโลก

2:16 โดยการยึดยกพระคำแห่งซีวิตไว้ให้มั่น เพื่อข้อยสิมีแนวยกย่องในมื้อของพระคริสต์ที่สิมาฮั้น ว่าข้อยบ่ได้แล่นแข่ง หรือฮับใซ้ พระเจ้า อย่างว่างเปล่าซื่อๆ

2:17 เอ่อ คั่นข้อยสิต้องถืกเทซีวิตออกเทิงแท่นบูซา อุทิศเป็นเครื่องถวาย ย้อนการฮับใซ้กับการเสียสละเพื่อความเซื่อของพวกเจ้าฮั้น ข้อยกะยังดีใจ มีความซื่นซมยินดีนำพวกเจ้าโลด

2:18 แล้วในแนวเดียวกัน พวกเจ้ากะควรสิซื่นซมยินดีกับข้อยนำ

2:19 แต่ข้อยยังหวังใจในพระเยซูเจ้าว่า ในเวลาบ่โดน ข้อยว่าสิใซ้ทิโมธีไปหาพวกเจ้า เพื่อข้อยสิมีแฮงใจแหน่ บัดพอข้อยฮู้ข่าวสถานการณ์ของพวกเจ้า

2:20 ย้อนว่า ข้อยบ่มีใผนอกจากทิโมธีที่มีน้ำใจมีความนึกคึดคือจั่งข้อย ที่สิเบิ่งแยงพวกเจ้าอย่างจริงใจ

2:21 ย้อนว่า คู่คนต่างซอกหาผลประโยชน์ของโตเอง บ่แม่นผลประโยชน์ของพระเยซูคริสต์

2:22 แต่ว่า พวกเจ้ากะฮู้ว่าทิโมธีได้พิสูจน์โตเองแล้ว ว่าเขาได้ฮับใซ้ฮ่วมกับข้อยในการประกาศข่าวประเสริฐ คือจั่งลูกซายปรนนิบัติพ่อ

2:23 จั่งซั้น ข้อยหวังว่าสิใซ้ลาวไปหาพวกเจ้าในไวๆ นี้ พอเห็นว่าการงานของข้อยสิเป็นไปแนวใดอยู่ทางนี้

2:24 แต่ข้อยมีความเซื่อในองค์พระผู้เป็นเจ้าว่า ในบ่ซ้าบ่โดนข้อยเองสิได้มาหาพวกเจ้านำ

2:25 จั่งใดกะตาม ข้อยเห็นว่า จำเป็นที่สิใซ้ เอปาโฟรดิทัส มาหาพวกเจ้าก่อน ซึ่งผู้นี้เป็นพี่น้องผู้ฮ่วมในการงานนำข้อย เป็นหมู่ประกาศข่าวให้พวกเจ้า กับได้ปรนนิบัติข้อยในยามที่ข้อยขัดสน

2:26 โดยว่า โตลาวคึดฮอดพวกเจ้าเมิ้ดคู่คน แล้วเป็นห่วงพวกเจ้าหลาย ย้อนพวกเจ้าได้ข่าวว่าโตลาวป่วย

2:27 แท้จริงแล้ว ลาวได้ป่วยเกือบตายอีหลี แต่พระเจ้าได้โปรดเมตตาลาว แล้วบ่แม่นเมตตาแต่โตลาวผู้เดียว แต่ได้เมตตาโตข้อยนำ เพื่อบ่ให้ข้อยเป็นทุกข์ซ้อนทุกข์

2:28 จั่งซั้น ข้อยว่า สมควรที่สิใซ้ลาวไป เพื่อบัดยามพวกเจ้าเห็นลาวอีก พวกเจ้าจั่งสิดีใจหลาย แล้วความทุกข์ใจของข้อยกะสิเบาบางลงนำ

2:29 จั่งซั้น ขอให้พวกเจ้าต้อนฮับลาวไว้ใน พระนามของ องค์พระผู้เป็นเจ้าด้วยความ ยินดีอย่างเต็มเปี่ยมเด้อ แล้วจั่งให้เกียรติคนแนวนี้ไว้อย่างสูงเด้อ

2:30 ย้อนว่า ลาวเกือบตายเพื่อการงานของพระคริสต์ คือลาวได้เสี่ยงซีวิตของโตเองเพื่อสิได้ซ่อยในแนวที่ยังขาดในการปรนนิบัติของพวกเจ้าต่อข้อย