11:1 แล้วบัดพระเยซูกับพวกลูกศิษย์มาใกล้สิฮอดกรุงเยรูซาเล็ม คือได้ฮอดหมู่บ้านเบธฟายี กับหมู่บ้านเบธานีแล้ว ซึ่งอยู่ตีนภูเขาหมากกอกเทศ เพิ่นเลยใซ้ลูกศิษย์สองคน

11:2 บอกเขาว่า “ซ่อยเข้าไปในหมู่บ้านที่อยู่ทางหน้าเจ้าฮั้น บัดเข้าไปแล้ว พวกเจ้าสิพ้อลาน้อยโตหนึ่งผูกไว้อยู่ โตฮั้นยังบ่ทันมีใผเคยขึ้นขี่เลย ให้แก้เซือกจูงมันมาให้เฮาเลย

11:3 แล้วคั่นมีใผถามเจ้าว่า ‘พวกเจ้าเฮ็ดแนวนี้ย้อนหยัง’ ให้บอกว่า นายซีวิตของพวกเฮาต้องการสิใซ้ลาน้อยโตนี้ บัดแล้วเพิ่นสิส่งคืนมาให้เด้อ”

11:4 แล้วลูกศิษย์สองคนฮั้นออกไป กะได้พ้อลาน้อยโตฮั้นผูกไว้อยู่นอกประตูอยู่ทางแยก แล้วเขากะเลยแก้เซือกมัน

11:5 แล้วผู้ลางคนที่ยืนอยู่แถวฮั้นถามว่า “พวกเจ้าแก้เซือกลาน้อยนี้เฮ็ดหยัง”

11:6 ลูกศิษย์กะเลยตอบเขาตามที่พระเยซูสั่งไว้ แล้วคนหมู่ฮั้นกะยอมให้เอาไป

11:7 แล้วลูกศิษย์จูงลาน้อยมาเถิงพระเยซู แล้วกะเอาเสื้อผ้าของโตพาดเทิงหลังลา แล้วเพิ่นขึ้นขี่ลาโตฮั้น

11:8 แล้วมีคนหลายคนเอาเสื้อผ้าหน้าแพรของโตปูลงตามถนนหนทาง แล้วมีคนอื่นๆ ได้ตัดง่าไม้ออกจากพวกกกอยู่แถวฮั้น มาปูลงตามทาง

11:9 แล้วคนที่ย่างนำหน้าเพิ่นไป กับคนที่ตามหลังมา ได้พากันโห่ฮ้องว่า “โฮซันนาๆ ขอทรงพระเจริญ ได้พรแด่ผู้ที่มาในพระนามของพระผู้เป็นเจ้าเทอญ

11:10 ขอความสุขสวัสดิ์มงคลมีแด่แผ่นดินของกษัตริย์ดาวิด พ่อทวดของพวกเฮา แล้วขอพระองค์ท่านผู้มาในพระนามของพระผู้เป็นเจ้าทรงพระเจริญเทอญ โฮซันนาๆ ในที่สูงสุด”

11:11 แล้วพอได้เข้ากรุงเยรูซาเล็ม พระเยซูได้เข้าไปในพระวิหารอยู่ฮั่น แล้วเหลียวเบิ่งอยู่ล้อมรอบ คอยสังเกตเมิ้ดคู่อันคู่แนวว่าเป็นจั่งใด แล้วบัดพอใกล้สิฮอดค่ำ เพิ่นจั่งมุ่งหน้าออกไปยังหมู่บ้านเบธานีฮวมกับพวกลูกศิษย์สิบสองคนฮั้น

11:12 แล้วพอฮอดมื้ออื่นเซ้า บัดพระเยซูกับลูกศิษย์ออกจากหมู่บ้านเบธานีมาแล้ว เพิ่นกะหิว

11:13 แล้วพอเหลียวเบิ่ง เพิ่นเห็นต้นหมากเดื่อกกหนึ่งอยู่แต่ไกลๆ มีใบเต็ม เพิ่นจั่งมุ่งหน้าเข้าไปเบิ่งว่ามีหมากมีหน่วยอยู่บ้อ บัดมาเถิงแล้ว เห็นว่าบ่มีฮอดหมาก มีแต่ใบซื่อๆ คือปานยังบ่ทันฮอดยามออกหมาก

11:14 พระเยซูจั่งสั่งกกหมากเดื่อฮั้นว่า “ตั้งแต่นี้ไป สิบ่มีใผได้กินหมากจากเจ้าเลยเด้อ” แล้วพวกลูกศิษย์กะได้ยินคำสั่งซึ่งเพิ่นเว้าฮั้น

11:15 แล้วบัดพอพระเยซูกับลูกศิษย์มาเถิงกรุงเยรูซาเล็ม พระเยซูกะเข้าไปในพระวิหาร แล้วตั้งต้นเริ่มขับไล่พวกผู้ซื้อขายในพระวิหารฮั้น พร้อมได้คว่ำโต๊ะพวกผู้ฮับแลกเงิน พร้อมทั้งคว่ำม้านั่งของพวกขายนกนกพิราบนำ

11:16 แล้วเพิ่นได้ห้าม บ่ให้ผู้ใดขนของแบกหามแนวใดๆ ย่างลัดพระวิหาร

11:17 เฮ็ดแล้วเพิ่นบอกสอนเขาว่า “มีพระคำของพระเจ้าเขียนไว้บ่แม่นบ้อ ว่า ‘พระนิเวศของเฮา พวกประซาซาติสิเอิ้นกันว่าเป็นหม่องอธิษฐานเว้านำพระเจ้า’ แต่พวกเจ้าเฮ็ดให้เป็นถ้ำของโจร”

11:18 แล้วบัดพอพวกเสมียนฯกับพวกหัวหน้าผู้นำเครื่องถวายได้ยินฮอดแนวที่พระเยซูเฮ็ดอยู่ฮั้น เขาจั่งหาซ่องทางในทางอ้อมที่สิจัดการทำร้ายเพิ่น คือพวกเขาหย้านพระเยซู ย้อนว่าคนทั้งหลายซาบซึ้งประทับใจในคำสอนของเพิ่น

11:19 แล้วพอฮอดยามแลง พระเยซูได้ออกจากกรุงเยรูซาเล็มไป

11:20 แล้วยามมื้ออื่นเซ้ามา พอเพิ่นกับพวกลูกศิษย์ได้ผ่านหม่องกกหมากเดื่ออยู่ฮั้น กะเห็นว่ามันเหี่ยวแห้งเมิ้ดจากฮากขึ้นมา

11:21 เปโตรจั่งคึดซวด เลยเว้ากับพระเยซูว่า “อาจารย์เจ้าข้า นี่แน่ะ กกหมากเดื่อที่ท่านได้สาปแซ่งฮั้นกะเหี่ยวแห้งไปแล้ว”

11:22 พระเยซูจั่งตอบให้พวกลูกศิษย์ว่า “ให้เซื่อวางใจในพระเจ้าเด้อ

11:23 คือ เฮาสิบอกความจริงให้พวกเจ้าเด้อ ผู้ใดกะตามสิสั่งภูเขาลูกนี้ว่า ‘ให้โยกย้ายออกไปลงทะเลเด้อ’ โดยบ่มีการสงสัยในใจ แต่เซื่อวางใจว่าสิเป็นไปตามที่สั่ง มันกะสิเป็นไปตามแนวฮั้นอีหลี

11:24 จั่งซั้น เฮาบอกพวกเจ้าว่า อีหยังกะตามที่เจ้าปรารถนานำพระเจ้า บัดยามเจ้าสิอธิษฐานเว้านำเพิ่น ให้เซื่อว่าได้ฮับแล้ว แล้วเจ้าสิได้แนวฮั้นอีหลี

11:25 แล้วบัดเจ้ายืนอธิษฐานเว้านำพระเจ้า คั่นเจ้ามีแนวขัดข้องอีหยังกับผู้หนึ่งผู้ใด ให้อภัยผู้ฮั้นซะ เพื่อพระเจ้าผู้เป็นพ่อของเจ้า ผู้สถิตในสวรรค์ สิโปรดอภัยการผิดพลาดของเจ้านำ

11:26 แต่คั่นพวกเจ้าบ่ให้อภัยเขา พระเจ้าผู้เป็นพ่อของเจ้า ผู้สถิตในสวรรค์ สิบ่ได้ให้อภัยการผิดพลาดของเจ้าคือกัน”

11:27 แล้วพระเยซูกับพวกลูกศิษย์ได้วนกลับมายังกรุงเยรูซาเล็มอีก แล้วบัดพอเพิ่นพวมสิย่างเข้าในพระวิหาร กะมีพวกหัวหน้าผู้นำเครื่องถวาย ฮวมกับพวกเสมียนฯพร้อมกับพวกผู้หลักผู้ใหญ่ ได้เข้ามาหาเพิ่น

11:28 แล้วจั่งซักถามเพิ่นว่า “เจ้าได้ฮับอนุญาตมาแต่ใสที่สิเฮ็ด อาละวาด แนวฮั้น คือใผเป็นผู้อนุญาตให้เจ้าเฮ็ด”

11:29 พระเยซูจั่งตอบเขาว่า “เฮาสิถามพวกเจ้าแนวหนึ่งก่อน ให้ตอบเฮามาเบิ่งดู แล้วเฮาสิบอกเจ้าว่าเฮาได้เฮ็ดการนี้โดยสิทธิอันใด

11:30 คือว่า สิทธิให้คนจุ่มน้ำของโยฮันฮั้น ได้มาจากสวรรค์ หรือมาจากคนซื่อๆ ให้ตอบมาเบิ่งดู”

11:31 แล้วพวกเขาจั่งปรึกษากันว่า “คั่นพวกเฮาสิว่า ‘มาจากสวรรค์’ เขาสิถามเฮาว่า ‘เป็นหยังพวกเจ้าจั่งบ่ได้เซื่อโยฮันซั่น’

11:32 แต่คั่นพวกเฮาสิว่า ‘มาจากคน’ มันสิบ่ดี ” (พวกเขาเว้าจั่งซี้ ย้อนเขาหย้านพวกประซาซน คือคนทั้งหลายถือกันว่า โยฮันฮั้นเป็นผู้เป็นปากเป็นเสียงของพระเจ้าอีหลี)

11:33 เขาจั่งตอบพระเยซูว่า “พวกเฮาบ่สามารถตอบได้” พระเยซูกะเลยบอกเขาว่า “จั่งซั้น เฮาสิบ่บอกพวกเจ้าคือกันว่า เฮาเฮ็ดการฮั้นโดยสิทธิอันใด”