3:1 เว้าแล้วพระเยซูได้เข้าไปในศาลาธรรมอีก แล้วอยู่ฮั้นมีซายคนหนึ่งมือลีบ

3:2 บัดนี้ คนพวกฮั้นจ้องเบิ่งพระเยซูว่า เพิ่นสิฮักษาคนมือลีบในมื้อพักงานฮั้นหรือบ่ หนิกะเพื่อเขาสิหาแนวฟ้องร้องจับผิดเพิ่นได้

3:3 เพิ่นเลยเว้ากับคนมือลีบว่า “ให้มายืนอยู่ทางหน้าเด้อ”

3:4 แล้วเพิ่นจั่งเว้ากับคนพวกฮั้นว่า “ในมื้อพักงานหนิ ตามกฎบัญญัติฮั้น ควรสิเฮ็ดแนวดีหรือเฮ็ดแนวซั่ว กอบกู้ซีวิตหรือทำลายซีวิต” บัดนี้เมิ้ดคู่คนกะมิดอยู่

3:5 แล้วบัดเพิ่นได้เหลียวเบิ่งอยู่ล้อมรอบแล้ว เพิ่นกะมีความโกรธฮ้ายพร้อมเป็นทุกข์ ย้อนใจของพวกเขาแข็งกระด้างไป พระเยซูเลยสั่งซายคนฮั้นว่า “หนิ ให้เหยียดมือเจ้าออกซะเด้อ” ซายผู้ฮั้นกะเหยียดมือออก แล้วมือของเขาได้เซากับหม่อง ดีคือมืออีกข้างหนึ่ง

3:6 แล้วในยามฮั้นพอดี พวกฟาริสีจั่งออกไปปรึกษากับพรรคพวกเฮโรดเถิงพระเยซูว่า พวกเขาสิเฮ็ดจั่งใดจั่งสิทำร้ายเพิ่นได้

3:7 บัดนี้ ฝ่ายพระเยซูกะถอนโตจากหม่องฮั้น ไปอยู่ทะเลกับพวกลูกศิษย์ของเพิ่น แล้วมีคนหลวงหลายขนาดจากแคว้นกาลิลีกับแคว้นยูเดียได้ตามเพิ่นไป

3:8 แล้วมีคนหลวงหลายขนาดจากกรุงเยรูซาเล็ม เมืองเอโดม ฟากแม่น้ำจอร์แดนทางพู้น ฮวมทั้งแคว้นเมืองไทระกับไซดอน พอบัดเขาได้ยินเถิงแนวใหญ่ยิ่งที่พระเยซูได้เฮ็ดมาฮั้น พวกเขาจั่งได้มาหาเพิ่นนำ

3:9 แล้วเพิ่นได้บอกพวกลูกศิษย์ของเพิ่นว่า หน้าสิมีเฮือลำน้อยคอยถ้าฮับเพิ่นอยู่ หย้านคนหลวงหลายฮั้นอาจมาเบียดเสียดเพิ่นไว้

3:10 คือว่าเพิ่นได้ฮักษาคนมาหลายแล้ว จนว่าพวกคนที่เป็นโรคต่างๆ ฮั้นได้เบียดแออัดกันเข้ามาเพื่อสิได้แปะมือใส่เพิ่น

3:11 แล้ว คนที่มี ผีโสมม บัดได้เห็นพระเยซูกะได้หมอบลงกราบเพิ่น แล้วฮ้องเสียงดังว่า “ท่านเป็นพระบุตรของพระเจ้า”

3:12 แล้วฝ่ายพระเยซู เพิ่นจั่งสั่งห้ามมันไว้ บ่ให้เผยว่าเพิ่นเป็นใผ

3:13 แล้วพระเยซูได้ขึ้นภูเขา แล้วได้เอิ้นคนมานำเพิ่นตามที่เพิ่นต้องการ แล้วเขาจั่งมาหาเพิ่นโลด

3:14 แล้วในคนหมู่ฮั้นเพิ่นได้เลือกสิบสองคนไว้ ตั้งให้เป็นทูตพิเศษของเพิ่น คือเพิ่นสิใซ้คนพวกนี้ให้ออกไปประกาศ เรื่องของเพิ่น

3:15 แล้วเพิ่นสิมอบให้เขามีอำนาจที่สิฮักษาโรคต่างๆ กับที่สิขับไล่ผีออกได้นำ

3:16 แล้วฝ่ายซีโมนฮั้น เพิ่นได้เอิ้นชื่ออีกว่า เปโตร

3:17 แล้วฝ่ายยากอบ(ลูกซายเศเบดี) กับยอห์น(น้องซายของยากอบฮั้น) ทั้งสองคนนี้พระเยซูได้เอิ้นชื่อเขา ตามนิสัย ว่า “โบอาเนอเย” แปลว่า ลูกฟ้าฮ้อง

3:18 แล้วฝ่ายอันดรูว์ ฟีลิป บารโธโลมิว มัทธิว โธมัส ยากอบ (ลูกซายอัลเฟอัส) ธัดเดอัส ซีโมน (ชาวคานาอัน)

3:19 แล้วกะยูดาส (ซาวอิสคาริโอท ผู้ที่ได้ทรยศพระเยซูฮั้น) พระเยซูกับพวกสิบสองคนนี้จั่งเข้าไปในเฮือน

3:20 แล้วมีคนหลวงหลายได้เข้ามาจับกลุ่มโฮมกันอยู่ในฮั้นอีก อัดแน่นจนว่าพระเยซูกับหมู่พวกที่ไปนำเพิ่น แม้นแต่สิกินข้าวกะบ่ได้

3:21 แล้วบัดญาติเพิ่นได้ยินเถิงเรื่องนี้ พวกเขากะออกไปตามหาเพื่อสิจับเพิ่นไว้ หย้านเพิ่นได้เสียสติเป็นบ้าไปแล้ว

3:22 แล้วพวกเสมียนฯซึ่งได้ลงมาจากกรุงเยรูซาเล็มได้เว้าว่า “ผู้นี้ได้ถืกเบเอลเซบูลสิงอยู่” กับว่า “ที่เขาขับไล่ผีออกได้กะย้อนใซ้อำนาจของเจ้าผีใหญ่ฮั้น”

3:23 แล้วฝ่ายพระเยซูจั่งเอิ้นคนพวกฮั้นมาฟัง แล้วจั่งเว้ากับเขาเป็นคำเปรียบเทียบว่า “ผีมารซาตานสิขับไล่โตเองให้ออกได้จั่งใด

3:24 แล้วคั่นแผ่นดินใดๆ ได้เกิดการแตกแยกกันภายใน แผ่นดินฮั้นสิอยู่อย่างมั่นคงกะเป็นไปบ่ได้ (ต้องเสื่อมสลายจมลงคักๆ)

3:25 แล้วคั่นครัวเฮือนใดๆ ได้เกิดแตกแยกกันภายใน ครัวเฮือนฮั้นสิตั้งอยู่กะบ่ได้คือกัน

3:26 แล้วคั่นผีมารซาตานสิเกิดการต่อสู้กันกับโตเองเถิงแตกแยกกันภายใน แผ่นดินของมันฮั้นสิตั้งอยู่กะบ่ได้ มีแต่สิเมิ้ดไป

3:27 แล้วบ่มีใผสิสามารถเข้าไปในเฮือนของคนผู้ที่มีกำลัง แล้วปล้นจี้เอาทรัพย์ของเขาได้เลย นอกจากสิจับเอาคนผู้ฮั้นแล้วมัดไว้ซะก่อน จั่งสิปล้นจี้เอาทรัพย์ในเฮือนของเขาได้

3:28 เฮาสิบอกความจริงให้พวกเจ้าเด้อ แนวผิดบาปเมิ้ดคู่แนวฮวมทั้งคำหมิ่นประมาทที่ผู้คนเคยเว้ากันอยู่ สิให้อภัยกันได้

3:29 แต่ว่า สำหรับผู้ที่เว้าหมิ่นประมาทพระวิญญาณ ผู้ฮั้นสิบ่ได้ฮับการอภัยโทษจักเทื่อเลย แต่ได้ตกอยู่ในขั้นอันตรายฮอดฉิบหายวายวอดตลอดเป็นนิตย์”

3:30 ที่พระเยซูเว้าจั่งซั้น กะย้อนว่าพวกเขาหาว่าเพิ่นมีผีโสมมเข้าสิง

3:31 ในยามฮั้น แม่กับพวกน้องซายของพระเยซูมายืนอยู่ทางนอก แล้วจั่งใซ้คนเข้าไปเอิ้นเพิ่น

3:32 แล้วคนหลวงหลายที่นั่งอยู่ฮ้อมล้อมเพิ่น ได้บอกเพิ่นว่า “นี่แน่ะ แม่กับพวกน้องซายของท่านได้มาหา แล้วคอยถ้าอยู่ทางนอก”

3:33 แล้วพระเยซูตอบเขาว่า “ใผแหน่เป็นแม่ของเฮา กับเป็นพี่น้องของเฮา”

3:34 แล้วเพิ่นเหลียวเบิ่งคนที่นั่งฮ้อมล้อมเพิ่นฮั้น จั่งเว้าว่า “นี่แน่ะ นี่กะเป็นแม่กับพี่น้องของเฮา

3:35 คือผู้ใดกะตามที่เฮ็ดตามพระประสงค์ของพระเจ้า ผู้ฮั้นล่ะได้เป็นพี่น้องซายญิงกับแม่ของเฮาโลด”