3:1 อยู่มาหลายปี เป็นปีที่สิบห้าในการปกครองของจักรพรรดิทิเบริอัสซีซาร์ ซึ่งตอนฮั้นปอนทิอัสปีลาตเป็นเจ้าเมืองใหญ่เหนือแขวงยูเดีย เฮโรดเป็นรองเหนือเขตกาลิลี ฟีลิปน้องชายของเฮโรดเป็นรองเหนือเขตอิทูเรียกับเขตตราโคนิติส แล้วลีซาเนียสเป็นรองเหนือเขตอาบีเลน

3:2 ในยามฮั้น อันนาสกับกายาฟาสเป็นผู้นำเครื่องถวายผู้สูงสุด ตอนฮั้นพระคำของพระเจ้ามายังโยฮัน (ลูกซายของเศคาริยาห์) ผู้อาศัยอยู่ในถิ่นแห้งแล้ง

3:3 โยฮันกะเลยออกไปป่าวประกาศทั่วแถวแม่น้ำจอร์แดน บอกให้คนฮับจุ่มน้ำแสดงการกลับใจใหม่ เพื่อพระเจ้าสิได้ยกโทษความผิดบาปให้เขา

3:4 อันนี้กะเป็นไปตามคำทำนายของอิสยาห์ ผู้เป็นปากเป็นเสียงของพระเจ้า ที่ลาวกล่าวไว้ว่า “ให้เตรียมทางไว้ให้พระเจ้า แปลงทางของเพิ่นให้มันซื่อตรงเด้อ

3:5 หม่องหุบเหวกะสิถมให้มันเรียบ ภูเขากับเนินกะสิต่ำลง ทางคดโค้งกะสิซื่อตรง กับทางที่เป็นหลุมเป็นบ่อกะสิราบเพียง

3:6 แล้วคนทั้งปวงกะสิเห็นพระผู้โปรดของพระเจ้า”

3:7 บัดนี้ โยฮันฮั่นได้เว้าใส่ผู้คนที่ออกมาฮับจุ่มน้ำ ว่า “ไอ้พวกซาติซั่วลูกงูฮ้าย แม่นใผเตือนให้หนีพ้นจากการลงโทษของพระเจ้าที่สิมาฮั้น

3:8 จั่งซั้น ให้พวกเจ้าแสดงผลสมกับการกลับใจใจใหม่อีหลีเด้อ แล้วบ่ต้องอ้างกันว่าเป็นลูกหลานของอับราฮัม ดีบ่ดีเฮาว่าพระเจ้าสามารถบันดาลเอาพวกก้อนหินนำหมู่นี้ขึ้นมาเป็นลูกหลานของอับราฮัมกะได้

3:9 ดีบ่ดี ขวานของพระเจ้าได้วางใส่ฮากกกไม้แล้ว คู่กกที่บ่เป็นหมากเป็นผลอันดี กกฮั้นสิถืกบักถิ้ม โยนใส่ไฟกองฮ้าโลด”

3:10 บัดนี้ พวกคนที่ออกมากะถามลาวว่า “จั่งซั้น สิให้พวกข้อยเฮ็ดแนวใดซั่น”

3:11 แล้วโยฮันกะบอกพวกเขาว่า “คั่นผู้ใดมีเสื้อสองโต กะปันให้ผู้บ่มี กับคั่นผู้ใดมีข้าวปลาอาหาร กะปันให้ผู้บ่มีคือกัน”

3:12 แล้วมีพวกเก็บภาษีกะยังออกมาว่าสิฮับจุ่มน้ำจั่งถามลาวว่า “อาจารย์เอ้ย สิให้พวกผู้ข้าเฮ็ดแนวใดดี”

3:13 โยฮันเลยตอบว่า “ให้พวกเจ้าเก็บภาษีตามคำสั่งท่อฮั้น อย่าเก็บเกินเด้อ”

3:14 แล้วมีพวกทหารได้ถามโยฮันคือกันว่า “พวกข้อยเดซั่น สิให้เฮ็ดแนวใดดี” โยฮันตอบว่า “อย่าไปขู่บังคับหาความใส่เพื่อสิกินเงินเขา ให้พอใจกับเงินเดือนของโตเด้อ”

3:15 บัดนี้ พอพวกคนอยู่ฮั่นตื่นโต คาดคึดในใจว่า โยฮันหนิสิแม่นพระผู้โปรดฮั่นอีหลีซั่นบ้อ

3:16 พอดีโยฮันกะบอกพวกเขาว่า “เฮาหนิเป็นผู้ให้จุ่มน้ำให้แสดงการกลับใจใหม่ แต่ว่าเพิ่นผู้ฮั้นที่สิมานำหลังเฮา เพิ่นมีอำนาจแฮงหลายกว่าเฮา คนส่ำเฮาหนิกะยังบ่สมควรสิแก้สายเกิบให้เพิ่นซ้ำ ผู้ฮั้นล่ะ สิมีหลายคนที่เพิ่นสิจุ่มด้วยพระวิญญาณ แต่ว่าอีกหลายคนเพิ่นสิจุ่มลงในไฟ

3:17 คือเพิ่นพวมถือกระด้งของเพิ่น แล้วสิมาวีสะสางลานข้าวของเพิ่นให้เรียบร้อย แล้วเก็บเอาแต่เม็ดดีๆ ไว้ในเล้าของเพิ่น แต่ว่าแกลบฮั่นเพิ่นกะสิเอาไปเผาถิ้มในไฟที่บ่ฮู้จักมอด”

3:18 แล้วโยฮันกะได้เว้าตักเตือนพวกผู้คน เป็นหลายอันหลายแนว

3:19 แต่ว่าเจ้าเมืองเฮโรดกะบ่พอใจกับโยฮัน ย้อนว่าได้ถืกโยฮันตักเตือนเปิดเผยเรื่องเป็นซู้กันกับเฮโรเดียส น้องใภ้ของโต กับโยฮันได้เผยความซั่วแนวบ่ดีของเพิ่นออกมาเมิ้ด

3:20 แต่หลายกว่าฮั้น เฮโรดแฮงเฮ็ดซั่วซ้ำตื่มเข้าไปอีก คือได้จับเอาโยฮันหนิเข้าไปขังไว้ในคุก

3:21 แต่ก่อนหน้าฮั้น หลังจากประซาซนไปฮับจุ่มน้ำเมิ้ดแล้ว พระเยซูกะได้ไปฮับคือกัน ฮับแล้วเพิ่นได้อธิษฐานเว้านำพระเจ้า พวมเว้าอยู่ฮั่น ท้องฟ้ากะถืกแหวกออก

3:22 แล้วพระวิญญาณของพระเจ้ากะเสด็จลงมาคือปานฮูปนกพิราบ แล้วกะมีเสียงเว้ามาแต่เทิงฟ้าว่า “เจ้าเป็นลูกโทนที่พ่อฮักแพง พ่อถืกใจในเจ้าหลาย”

3:23 แล้วตอนพระเยซูอายุได้ประมาณสามสิบปี เพิ่นได้เริ่มออกไปปรนนิบัติงานของเพิ่น ในฐานะว่าเป็นพระบุตร แต่คนเข้าใจผิดว่าพระเยซูหนิเป็นลูกของโยเซฟหลานของเฮลีซื่อๆ

3:24 เฮลีเป็นลูกซายของ มัทธัตๆ เป็นลูกซายของ เลวีๆ เป็นลูกซายของ เมลคีๆ เป็นลูกซายของ ยันนายๆ เป็นลูกซายของ โยเซฟ

3:25 โยเซฟเป็นลูกซายของ มัทธาธีอัสๆ เป็นลูกซายของ อาโมสๆ เป็นลูกซายของ นาฮูมๆ เป็นลูกซายของ เอสลีๆ เป็นลูกซายของ นักกาย

3:26 นักกายเป็นลูกซายของ มาอาทๆ เป็นลูกซายของ มัทธาธีอัสๆ เป็นลูกซายของ เสเมอินๆ เป็นลูกซายของ โยเสคๆ เป็นลูกซายของ โยดา

3:27 โยดาเป็นลูกซายของ โยอานันๆ เป็นลูกซายของ เรซาๆ เป็นลูกซายของ เศรุบบาเบล

3:28 เศรุบบาเบลเป็นลูกซายของ เซอัลทิเอลๆ เป็นลูกซายของ เนรีๆ เป็นลูกซายของ เมลคีๆ เป็นลูกซายของ อัดดีๆ เป็นลูกซายของ โคสัมๆ เป็นลูกซายของ เอลมาดัมๆ เป็นลูกซายของ เอร์

3:29 เอร์เป็นลูกซายของ โยซูอาๆ เป็นลูกซายของ เอลีเยเซอร์ๆ เป็นลูกซายของ โยริมๆ เป็นลูกซายของ มัทธัตๆ เป็นลูกซายของ เลวี

3:30 เลวีเป็นลูกซายของ สิเมโอนๆ เป็นลูกซายของ ยูดาห์ๆ เป็นลูกซายของ โยเซฟๆ เป็นลูกซายของ โยนามๆ เป็นลูกซายของ เอลียาคิม

3:31 เอลียาคิมเป็นลูกซายของ เมเลอาๆ เป็นลูกซายของ เมนนาๆ เป็นลูกซายของ มัทตะธาๆ เป็นลูกซายของ นาธันๆ เป็นลูกซายของ กษัตริย์ดาวิด

3:32 กษัตริย์ดาวิดเป็นลูกซายของ เจสซีๆ เป็นลูกซายของ โอเบดๆ เป็นลูกซายของ โบอาสๆ เป็นลูกซายของ สัลโมนๆ เป็นลูกซายของ นาโซน

3:33 นาโซนเป็นลูกซายของ อัมมีนาดับๆ เป็นลูกซายของ อัดมินๆ เป็นลูกซายของ อารนีๆ เป็นลูกซายของ เฮสโรนๆ เป็นลูกซายของ เปเรศๆ เป็นลูกซายของ ยูดาห์

3:34 ยูดาห์เป็นลูกซายของ ยาโคบๆ เป็นลูกซายของ อิสอัคๆ เป็นลูกซายของ อับราฮัมๆ (พ่อตระกูลอิสราเอล)เป็นลูกซายของ เทราห์ๆ เป็นลูกซายของ นาโฮร์

3:35 นาโฮร์เป็นลูกซายของ เสรุกๆ เป็นลูกซายของ เรอูๆ เป็นลูกซายของ เปเลกๆ เป็นลูกซายของ เอเบอร์ๆ เป็นลูกซายของ เซลาห์

3:36 เซลาห์เป็นลูกซายของ ไคนานๆ เป็นลูกซายของ อารฟาซัดๆ เป็นลูกซายของ เซมๆ เป็นลูกซายของ โนอาห์ๆ (ผู้เฮ็ดเฮือใหญ่)เป็นลูกซายของ ลาเมค

3:37 ลาเมคเป็นลูกซายของ เมธูเสลาห์ๆ เป็นลูกซายของ เอโนคๆ เป็นลูกซายของ ยาเรดๆ เป็นลูกซายของ มาหะลาเลเอลๆ เป็นลูกซายของ ไคนาน

3:38 ไคนานเป็นลูกซายของ เอโนสๆ เป็นลูกซายของ เสทๆ เป็นลูกซายของ อาดัม (บรรพบุรุษของคนเฮา) อาดัมเป็นลูกซายของพระเจ้าผู้สร้างโลกฮั่น