21:1 หลังจากฮั้น พระเยซูได้แสดงโตให้ลูกศิษย์ของเพิ่นอยู่ตะฝั่งทะเลสาปทิเบเรียส (คือ ทะเลสาปกาลิลี) แล้วเพิ่นกะได้แสดงโตจั่งซี้คือ

21:2 มื้อหนึ่งซีโมนเปโตร กับโธมัส (ที่คนเอิ้นกันว่า แฝด) กับนาธานาเอล(ไทบ้านคานาในแคว้นกาลิลี) กับพวกลูกซายของเศเบดี แล้วลูกศิษย์ของพระเยซูอีกสองคนกะอยู่นำกันอยู่ฮั่น

21:3 ซีโมนเปโตรเลยเว้ากับพวกเขาว่า “เฮาสิออกไปหาปลาเด้อ” พวกหมู่อยู่ฮั่นบอกว่า “ขอพวกเฮาไปนำแหน่” พวกเขากะเลยพากันลงเฮือออกไปหาปลา แล้วหาปลาเมิ้ดคืนแต่บ่ได้ปลาจักโต

21:4 บัดฮอดตอนเซ้ามา พระเยซูมายืนอยู่ตะฝั่งทะเลสาปฮั้น แต่ว่าพวกลูกศิษย์บ่ได้ฮู้จักว่าเป็นโตพระเยซู

21:5 แล้วพระเยซูได้เอิ้นถามพวกเขาว่า “หมู่พวกเอ้ย พวกเจ้ามีแนวกินบ้อ” พวกเขากะตอบว่า “บ่มีเลย”

21:6 พระเยซูเลยบอกพวกเขาว่า “ให้หย่อนอวนลงไปทางขวาของเฮือเด้อ” แล้วพวกเขากะเลยหย่อนอวนลงตามที่เพิ่นบอก แล้วบัดนี้ พวกเขาได้ปลาหลายขนาดจนดึงอวนบ่ขึ้นเลย

21:7 บัดนี้ลูกศิษย์ผู้ที่พระเยซูฮักแพงฮั้น ได้บอกเปโตรว่า “นี้ล่ะ นายซีวิตเฮา” บัดพอซีโมนเปโตรได้ยินว่าเป็นนายซีวิต เขากะเอาเสื้อคลุมใส่ (ย้อนได้ถอดไว้เฮ็ดเวียก) แล้วกะโตนลงน้ำ ลอยเข้าหาตะฝั่ง

21:8 แต่ส่วนศิษย์ผู้อื่นๆ ฮั้น กะพากันพายเฮือเข้าหาตะฝั่ง ลากอวนที่ติดปลาไปนำ คือพวกเขาบ่ได้ห่างไกลจากตะฝั่งปานใด ประมาณหนึ่งร้อยเมตรเอง

21:9 บัดพอพวกเขาเถิงตะฝั่งแล้ว กะเห็นมีกองถ่านไฟ แล้วกะมีปลากับขนมปังวางปิ้งอยู่ฮั่น

21:10 พระเยซูเลยเว้ากับพวกเขาว่า “ให้เอาปลาที่ได้มาเมื่อกี้นี้ขึ้นมาบ้าง”

21:11 ซีโมนเปโตรกะเลยไปลากอวนขึ้นตะฝั่ง มีแต่ปลาโตใหญ่ๆ เต็มล้นอยู่ฮั่น นับเบิ่งแล้วกะได้หนึ่งร้อยห้าสิบสามโต หลายปานฮั้นอวนกะบ่ได้ขาดเลย

21:12 พระเยซูเอิ้นพวกเขาว่า “เซิญมากินเถอะ” แล้วในพวกลูกศิษย์ฮั่น ยังบ่มีใผกล้าถามเพิ่นว่า “นายแม่นใผ” ย้อนเขาฮู้กันว่า ต้องเป็นนายซีวิตของเขา

21:13 แล้วพระเยซูได้มาเอาขนมปัง พร้อมกับปลาปิ้งให้พวกเขา

21:14 นี้กะเป็นเทื่อที่สามที่พระเยซูแสดงโตให้พวกลูกศิษย์เห็น หลังจากเพิ่นได้เป็นขึ้นมาจากตาย

21:15 พอพวกเขากินอิ่มแล้ว พระเยซูเว้ากับซีโมนเปโตรว่า “ซีโมนเปโตรลูกโยนาห์ เอ้ย เจ้าฮักเฮาอีหลีหลายกว่าพวกนี้ฮักเฮาบ้อ” เปโตรตอบเพิ่นว่า “เอ้อ นายผู้ข้าฮู้จักว่า ผู้ข้าฮักนายคือเป็นอ้าย” พระเยซูเลยบอกเขาว่า “ให้เลี้ยงแกะน้อยของเฮาเด้อ” (ให้ดู ยอห์น 13:36-37)

21:16 แล้วพระเยซูถามอีกเป็นเทื่อที่สองว่า “ซีโมนลูกโยนาห์ เอ้ย เจ้าฮักเฮาอีหลีบ้อ” เขากะตอบว่า “เอ้อ นายผู้ข้าฮู้จักว่าผู้ข้าฮักนายคือเป็นอ้าย” เพิ่นเว้าว่า “ให้เบิ่งแยงหมู่แกะของเฮาเด้อ”

21:17 เพิ่นเลยถามอีกเป็นเทื่อที่สามว่า “ซีโมนลูกโยนาห์ เอ้ย เจ้าฮักเฮาคือแค่เป็นอ้ายบ้อ” บัดนี้ เปโตรกะอุกอั่งใจที่พระเยซูถามว่า “เจ้าฮักเฮาบ้อ” เถิงสามเทื่อ กะเลยตอบเพิ่นว่า “นายผู้ข้าเอ้ย นายฮู้จักเมิ้ดคู่อันคู่แนวอยู่แล้ว กับฮู้จักว่าผู้ข้าฮักนายคือเป็นอ้ายหลายส่ำใด” พระเยซูเว้ากับเขาว่า “ให้เลี้ยงหมู่แกะของเฮา เด้อ”

21:18 “เฮาสิบอกเจ้าตามซื่อนี้ล่ะ ว่า ตอนเจ้ายังหนุ่ม เจ้าเคยแต่งโตไปใสมาใสตามใจมัก แต่ว่าบัดเฒ่าแล้วเจ้ากะสิเหยียดมือของเจ้าออก แล้วผู้อื่นกะสิมัดเจ้าไว้ ลากไปหม่องที่เจ้าบ่อยากไป”

21:19 เหตุที่พระเยซูได้เว้าจั่งซี้ เป็นการบ่งบอกเถิงการตายของเปโตรว่า เขาสิถวายเกียรติพระเจ้าในการตายของเขาฮั้น พอเว้าแล้วพระเยซูกะเว้าต่ออีกว่า “ให้ตามเฮามาเด้อ”

21:20 แต่เปโตรเหลียวคืนหลังเห็นลูกศิษย์ผู้ฮั้นที่พระเยซูฮักแพง พวมมานำหลัง แม่นลูกศิษย์ผู้ที่ได้นั่งกินอยู่ทัดกันกับพระเยซู ตอนงานเลี้ยงฉลองฮั่น ที่ได้ถามพระเยซูว่า “นายผู้ข้าเอ้ย แม่นผู้ใดแหน่ที่สิทรยศใส่นาย” (ให้ดู ยอห์น 13:23-25)

21:21 บัดพอเปโตรเห็นลูกศิษย์ผู้ฮั้น กะเลยถามพระเยซูว่า “นายผู้ข้าเอ้ย แล้วผู้นี้เด้”

21:22 พระเยซูได้บอกเปโตรว่า “คั่นใจเฮาอยากสิให้เขาอยู่จนฮอดยามที่เฮาสิกลับมาฮั้น มันสิเป็นหยังกับเจ้าล่ะ ส่วนเจ้ากะให้ตามเฮามาเด้อ”

21:23 บัดนี้ ถ้อยคำของพระเยซู ได้ส่ลือกันในกลุ่มพี่น้องในพระเจ้า ว่าลูกศิษย์เพิ่นผู้นี้สิบ่ตายเลย แต่ว่าพระเยซูบ่ได้บอกเปโตรว่าผู้ฮั้นสิบ่ตาย เพิ่นเพียงแต่เว้าว่า “คั่นใจเฮาอยากสิให้เขาอยู่จนฮอดยามที่เฮาสิกลับมาฮั้น มันสิเป็นหยังกับเจ้าล่ะ”

21:24 แม่นลูกศิษย์ผู้ฮั้น ที่เป็นหลักฐานพยาน จั่งได้บันทึกเอาไว้ แล้วพวกเฮามั่นใจว่าคำพยานของเขาฮั้นเป็นจริง

21:25 แล้วกะยังมีอีกหลายอันหลายแนวที่พระเยซูได้เฮ็ด ซึ่งว่าคั่นสิได้บันทึกไว้ให้เมิ้ดคู่แนวเป็นเรื่องต่อๆ กัน ข้อยว่าเมิ้ดโลกนี้กะยังกว้างใหญ่บ่พอ ที่สิเก็บเมี้ยนไว้ได้ อาเมน