10:1 แต่ว่า ฝ่ายระบบกฎบัญญัติ เดิม ฮั้น มันเป็นเพียงเงาของระบบแนวอันดีงามที่สิมาในภายหน้า จั่งซั่น ระบบเดิมที่เป็นแต่เงาโตจริง มีการถวายบูซาคู่ปีๆ แต่ยังบ่สามารถเฮ็ดให้คนเฮาผู้ที่เขาถวายฮั้น เถิงความดีพร้อมสมบูรณ์แบบได้

10:2 คั่นมันเป็นจั่งซั้น บ่แม่นเขาสิเซาเฮ็ดการถวายเครื่องบูซาแต่โดนแล้วบ้อ ย้อนว่า คั่นพวกผู้นมัสการฮั้นได้ฮับการลบล้างบาปให้บริสุทธิ์แล้ว เขากะสิบ่ได้คำนึงเถิงเรื่องบาปอีกต่อไป

10:3 แต่ว่า ในการถวายเครื่องบูซาคู่ปีๆ ในระบบเดิมฮั้น มีการเตือนสติให้โตเองในเรื่องบาปไว้อยู่เสมอ

10:4 ย้อนว่าเลือดของงัวโตผู้กับเลือดของแพะฮั่น กะบ่สามารถลบล้างบาปให้ออกไปได้

10:5 จั่งซั้น บัดพระคริสต์ได้เข้ามาในโลกแล้ว เพิ่นได้เว้าว่า “การถวายเครื่องบูซากับการถวายแนวอื่นๆ ซ้ำแล้วซ้ำอีก พระองค์บ่ต้องการเลย แต่พระองค์ได้จัดเตรียมร่างกายนี้ไว้สำหรับผู้ข้า

10:6  คือเครื่องเผาบูซากับเครื่องบูซาลบล้างบาปฮั้น พระองค์บ่มีความพึงพอใจนำ

10:7 แล้วเพิ่นได้เว้าว่า ‘นี่แน่ะ ผู้ข้าได้มาเพื่อสิเฮ็ดตามพระประสงค์อันเป็นที่พึงพอใจของพระองค์เจ้า ตามที่พระคำเขียนไว้ ซึ่งเว้าเถิงผู้ข้าฮั้น’”

10:8 ตามที่เพิ่นได้เว้าไว้ก่อนว่า “เครื่องถวายบูซากับเครื่องถวายอื่นๆ พร้อมทั้งเครื่องเผาบูซา กับเครื่องบูซาลบล้างบาปแนวหมู่ฮั้น พระองค์บ่ต้องการ แล้วบ่มีความพึงพอใจนำ” (ซึ่งแนวหมู่นี้ได้บูซาตามระเบียบการของกฎบัญญัติฮั้น)

10:9  แล้วเพิ่นเว้าต่ออีกว่า “นี่แน่ะ พระเจ้า เอ้ย ผู้ข้ามาแล้วพระองค์เจ้าข้า เพื่อสิเฮ็ดตามพระประสงค์อันเป็นที่พึงพอใจของพระองค์” คือพระเจ้ายกเลิกระบบเดิมฮั้น เพื่อสิตั้งระบบใหม่ขึ้นแทน

10:10 แล้วโดยระบบใหม่ฮั้นเอง เฮาทั้งหลายจั่งได้ฮับการลบล้างบาปให้เป็นผู้บริสุทธิ์ในสายตาของพระเจ้าได้แล้ว โดยการถวายพระกายของพระเยซูคริสต์เพียงเทื่อเดียว เพื่อผู้คนทั้งหลาย

10:11 ฝ่ายพวกปุโรหิตคู่คนฮั้น เขาได้ยืนปฏิบัติหน้าที่อยู่คู่มื้อๆ นำเอาเครื่องบูซาอย่างเดียวกันฮั่นมาถวายแล้วถวายอีก ซึ่งเครื่องบูซาฮั้นบ่สามารถยกความผิดบาปให้ได้เลย

10:12 แต่ฝ่ายผู้นี้ บัดเพิ่นถวายเครื่องบูซาลบล้างความบาปเพียงเทื่อเดียวเพื่อตลอดนิรันดร์กาลได้แล้ว เพิ่นจั่งขึ้นไปประทับอยู่ทางขวาของพระเจ้า

10:13 ตั้งแต่ฮั้นมา เพิ่นคอยถ้าอยู่จนกว่าพวกศัตรูของเพิ่นสิถืกปราบลงเป็นม้าพักเท้าของเพิ่น

10:14 ย้อนว่า โดยการถวายบูซาเทื่อเดียวฮั่น เพิ่นได้เฮ็ดให้คนทั้งหลายที่ฮับการลบล้างบาปฮั้น ให้เป็นผู้บริสุทธิ์ดีพร้อมตลอดนิรันดร์กาล

10:15 แล้วพระวิญญาณเป็นพยานให้คนเฮา คือจั่งที่เพิ่นเคยเว้ามาก่อนว่า

10:16  “นี่คือพันธสัญญาซึ่งเฮาสิเฮ็ดกับเขาทั้งหลายหลังจากสมัยฮั้น เฮาสิใส่กฎบัญญัติของเฮาไว้ในความคึดของเขา กับสิจารึกไว้ในจิตใจของเขานำ”

10:17 แล้วเพิ่นกะเว้าเติมอีกว่า “เฮาสิบ่จดจำความผิดบาปของเขากับการฝ่าฝืนกฎบัญญัติของเขาไว้อีกเลย”

10:18 บัดมีการลบล้างบาปอภัยโทษเรียบร้อยแล้ว บ่ต้องมีการถวายเครื่องบูซาย้อนบาปอีกต่อไป

10:19 จั่งซั้น พี่น้องทั้งหลายเอ้ย บัดนี้เฮามีสิทธิ์ที่สิเข้าไปในสถานศักดิ์สิทธิ์บริสุทธิ์ที่สุด ได้ด้วยความกล้าหาร โดยทางพระโลหิตของพระเยซู

10:20 อันนี้กะเป็นทางใหม่ของเพิ่น เป็นทางที่ให้มีซีวิตซึ่งเพิ่นได้เฮ็ดไว้ให้ไทเฮาผ่านม่านเข้าไปได้ แล้วม่านฮั้นกะคือร่างกายของเพิ่น

10:21 คือบัดเฮามีมหาปุโรหิตผู้สูงสุดฯอันใหญ่หลวงที่ปกครองครัวเฮือนของพระเจ้าแล้ว

10:22 กะให้คนเฮาทั้งหลายเข้ามาใกล้ซิดกับเพิ่นด้วยใจจริง ด้วยความเซื่อมั่นอย่างเต็มเปี่ยม โดยมีใจที่ได้ฮับการโปรดให้บริสุทธิ์ จากจิตใต้สำนึกผิดซอบอันเลวทราม กับมีกายที่ได้ฮับการซำระล้างให้สะอาดงามด้วยน้ำบริสุทธิ์นำ

10:23 จั่งขอให้เฮายึดมั่นในความหวังอันมั่นคง ที่เฮาได้ฮับปากไว้ฮั้นโดยบ่หวั่นไหว โดยว่าเพิ่นผู้ที่สัญญาฮั้นซื่อสัตย์วางใจได้เลย

10:24 แล้วขอให้พวกเฮาพิจารณาต่อกันและกัน เพื่อซักซวนให้เกิดมีความฮักแพงกับความดีต่อกันและกัน

10:25 แล้วอย่าละเลยต่อการตุ้มโฮมกันของพวกเฮาคือจั่งผู้ลางคน แต่ควรสิเตือนสติให้กำลังใจต่อกันและกัน เป็นหลายขึ้นๆ บัดเห็นว่า มื้อฮั้นแฮงใกล้สิเข้ามาฮอดแล้ว

10:26 คือ คั่นพวกเฮายังขืนไปเฮ็ดผิดบาปอีกหลังจากที่เฮาได้ฮับฮู้เรื่องความจริงแล้ว มันกะสิบ่มีเครื่องถวายบูซาอื่นๆ อีกต่อไปให้ลบล้างบาปได้

10:27 มีแต่การพิพากษาลงโทษเป็นตาหย้านอันใหญ่หลวงคอยถ้าอยู่ กับมีไฟอันฮ้ายแฮงที่สิกลืนกินพวกฝ่ายปฏิปักษ์ฮั้น

10:28 คือ ผู้ใดกะตามที่ฝ่าฝืนดูหมิ่นกฎบัญญัติของเฒ่าโมเสสฮั้น ผู้ฮั้นกะต้องตายโดยบ่มีความเมตตาเลย ตามคำพยานจากสองหรือสามปาก

10:29 แต่แฮงหลายกว่าฮั้นอีก สำหรับผู้ที่เหยียบย่ำพระบุตรของพระเจ้า กับดูหมิ่นพระโลหิตแห่งพันธสัญญาใหม่ฮั้น สมควรสิเป็นโทษอีกหลายส่ำใด ซึ่งการมีโอกาสเป็นผู้บริสุทธิ์ได้ฮั้น เขาว่าเป็นของธรรมดาสามัญ กับได้ดูถูกเว้าสบประมาทวิญญาณแห่งพระกรุณาธิคุณนำ

10:30 คือ คนเฮาฮู้จักกับเพิ่นผู้ที่ได้เว้าว่า “การแก้แค้นลงโทษเป็นสิทธิ์ของเฮา เฮาสิตอบสนองเอาเองเด้อ” คือองค์พระผู้เป็นเจ้าได้เว้าแนวฮั่น แล้วได้เว้าอีกว่า “องค์พระผู้เป็นเจ้าสิตัดสินตีสอนคนของเพิ่น”

10:31 คือ มันเป็นตาหย้านอีหลีที่สิตกอยู่ในอุ้งมือของพระเจ้า ผู้ดำรงอยู่ฮั้น

10:32 แต่ให้พวกเจ้าคึดเห็นบัดคราวก่อนฮั้นเด้อ คือหลังจากพวกเจ้าได้ฮับความสว่างแล้ว พวกเจ้าได้อดทนต่อสู้ความยากลำบากกับความทุกข์ทรมานอย่างใหญ่หลวง

10:33 ลางเทื่อพวกเจ้าเคยถืกประจานให้อับอายขายหน้ากับถืกข่มเหง แล้วอีกลางเทื่อพวกเจ้ากะได้มีหุ้นส่วนฮ่วมทุกข์กับคนที่ถืกข่มเหงฮั้น

10:34 แล้วพวกเจ้าเคยมีใจเมตตาสงสารตอนข้อยถืกล่ามโซ่ขังไว้ฮั้น กับได้ยอมด้วยความยินดีบัดถืกปล้นเอาทรัพย์สินของโตออกไป โดยฮู้กันว่า พวกเจ้ามีทรัพย์สมบัติอันถาวรที่ประเสริฐกว่าอยู่เทิงสวรรค์

10:35 จั่งซั้น อย่าปะถิ้มความมั่นใจของพวกเจ้า ที่สิได้ฮับบำเหน็จรางวัลอันใหญ่ยิ่ง

10:36 คือ พวกเจ้าต้องเพิ่มความพากเพียรอดทน เพื่อบัดพวกเจ้าได้เฮ็ดตามพระประสงค์ของพระเจ้าแล้ว กะสิได้ฮับตามคำมั่นสัญญาที่ว่า

10:37  “อีกบ่โดนนาน เพิ่นผู้ที่สิมาฮั้นกะสิได้มาอีหลีแล้ว โดยสิบ่ล่าซ้า

10:38  คือ คนซอบธรรมสิดำเนินซีวิตอยู่ด้วยความเซื่อ แล้วคั่นผู้ใดเสื่อมถอย ใจของเฮาสิบ่พึงพอใจในผู้ฮั้นเลย”

10:39 แต่ว่า พวกเฮาบ่ได้อยู่ฝ่ายคนหมู่ฮั้น ที่เสื่อมถอยไปสู่ความพินาศ แต่อยู่ฝ่ายหมู่คนที่ฮับเซื่อ เถิงวิญญาณจิตเขาสิได้รอดพ้น