3:1 จั่งซั้น พี่น้องผู้บริสุทธิ์ทั้งหลายเอ้ย ผู้มีส่วนฮ่วมในการเอิ้นการเซิญจากสวรรค์ ให้พิจารณาเพิ่น ผู้ที่เป็นอัครทูตใหญ่ กับเป็นมหาปุโรหิตผู้สูงสุด ที่พวกเฮาฮับปากไว้ว่าได้เซื่อในเพิ่น คือองค์พระเยซูคริสต์ฮั้นล่ะ

3:2 แม่นผู้ที่ซื่อสัตย์ภักดีต่อพระเจ้า ผู้ที่แต่งตั้งเพิ่นไว้ คือจั่งเฒ่าโมเสสได้ซื่อสัตย์ภักดีในการเบิ่งแยงคนทั้งหลายในครัวเฮือนของพระเจ้า

3:3 แล้วส่วนพระเยซูฮั้น เพิ่นสมควรมีเกียรติหลายกว่าเฒ่าโมเสสเป็นอย่างยิ่ง คือจั่งที่ผู้สร้างเฮือนมีเกียรติหลายกว่าเฮือนที่เพิ่นได้สร้างฮั่น

3:4 คือ เฮือนคู่หลังกะต้องมีผู้ออกแบบสร้าง แต่ว่าผู้ที่สร้างเมิ้ดคู่อันคู่แนวฮั่นกะคือพระเจ้า

3:5 ฝ่ายเฒ่าโมเสสฮั้น ลาวจงรักภักดีต่อหน้าที่เป็นผู้ฮับใซ้เบิ่งแยงครัวเฮือนของพระเจ้า ซึ่งนี้กะเป็นหลักฐานยืนยันเถิงลาวในเหตุการณ์แนวต่างๆ ที่สิมีการเล่าต่อกันมาในภายหลัง

3:6 แต่สำหรับพระคริสต์ฮั้น ในฐานะว่าเป็นพระบุตรเหนือครัวเฮือนของเพิ่น ซึ่งแม่นพวกไทเฮา คั่นมีการยึดมั่น มีความซื่นซมยินดีในความหวังฮั้น อย่างมั่นคงจนฮอดบั้นปลาย

3:7 จั่งซั้น ตามที่พระวิญญาณได้เว้าไว้แล้วว่า “มื้อนี้ คั่นพวกเจ้าสิเปิดใจฟังพระสุรเสียงของเพิ่น

3:8  กะอย่าให้จิตใจของพวกเจ้าแข็งกระด้างไป คือจั่งพวกคนในสมัยเฒ่าโมเสส ที่กบฏในคราวที่เขาถืกทดลองในถิ่นแห้งแล้งฮั่น

3:9  ซึ่งปู่ย่าตาทวดของพวกเจ้า เถิงแม้นว่าเขาได้เห็นการเบิ่งแยงของเฮาตลอดสี่สิบปี เขากะยังลองใจเฮาอย่างบ่อยู่บ่เซา

3:10  ย้อนเหตุฮั้นล่ะ เฮาจั่งโกรธเกรี้ยวพวกคนยุคฮั้น จั่งได้เว้าไว้ว่า ‘พวกเขาหลงผิดอยู่บ่เซา เขาบ่ฮู้จักทางของเฮาเลย’

3:11  จั่งซั้น เฮาจั่งปฏิญาณด้วยความโกรธเกรี้ยวว่า ‘คนพวกนี้สิบ่เข้าสู่การพักผ่อนหย่อนใจของเฮาเลย’”

3:12 พี่น้องทั้งหลาย เอ้ย ให้ระวังโตให้ดีเด้อ เพื่อสิบ่มีผู้หนึ่งผู้ใดในพวกเจ้ามีใจซั่วที่เต็มไปด้วยความบ่เซื่อ ได้หลงจากพระเจ้าไป ผู้เพิ่นที่ดำรงอยู่

3:13 แต่ให้เตือนสติซึ่งกันและกันอยู่ซู่มื้อซู่เว็น ที่เอิ้นกันว่า “มื้อนี้” เพื่อสิบ่มีผู้หนึ่งผู้ใดในพวกเจ้ามีใจแข็งกระด้างไป ย้อนการหลอกลวงของบาป

3:14 คือพวกเฮาสิมีส่วนฮ่วมในพระคริสต์ได้ คั่นเฮาสิยึดไว้ในความมั่นใจที่เฮามีแต่เริ่มแรก จนฮอดบั้นปลาย

3:15 คือมีถ้อยคำไว้ว่า “มื้อนี้ ในเวลานี้ คั่นพวกเจ้าทั้งหลายสิฟังพระสุรเสียงของเพิ่น อย่าให้จิตใจของพวกเจ้าแข็งกระด้างไปเด้อ คือจั่งตอนการกบฏฮั่น”

3:16 คือมีใผแหน่ ที่บัดได้ยินพระสุรเสียงฮั้น แล้วกะยังกบฏอยู่ แม่นคู่คนที่เฒ่าโมเสสได้นำออกจากประเทศอียิปต์ในสมัยแต่กี้ฮั่น บ่แม่นบ้อ

3:17 บัดนี้ แม่นใผที่พระเจ้าโกรธเกรี้ยวตลอดสี่สิบปีฮั่น บ่แม่นคนหมู่ฮั่นบ้อที่เฮ็ดบาป แล้วซากศพของพวกเขาล้มลงอยู่ในถิ่นแห้งแล้งฮั้น

3:18 แล้วแม่นใผ ที่เพิ่นได้ปฏิญาณว่า เขาสิบ่ได้เข้าสู่การพักผ่อนหย่อนใจของเพิ่น นอกจากคนหมู่ฮั้นที่บ่เซื่อฟัง

3:19 จั่งซั้น สรุปแล้ว เฮาจั่งเห็นได้ว่า พวกเขาบ่มีสิทธิ์ที่สิเข้าไปได้ ย้อนความบ่เซื่อ