3:1 บัดนี้ เปโตรกับยอห์นได้พร้อมกันขึ้นไปเข้าพระวิหาร ในเวลาฮ่วมกลุ่มอธิษฐาน เป็นซั่วโมงที่เก้า (บ่ายสามโมง)

3:2 แล้วได้มีซายคนหนึ่งเป็นง่อยมาแต่ท้องแม่ จั่งต้องมีคนซ่อยหามเขาอยู่คู่มื้อ ขึ้นไปวางลงไว้อยู่ข้างประตูที่เอิ้นกันว่าประตูงาม เพื่อเขาสิได้ขอทานนำคนผู้ที่ขึ้นไปเข้าพระวิหาร

3:3 คนฮั้นพอเห็นเปโตรกับยอห์นพวมสิเข้าไปในพระวิหาร กะได้ขอทานนำลาว

3:4 ส่วนเปโตรกับยอห์นกะจ้องตาเบิ่งเขาแล้วบอกว่า “ให้เบิ่งพวกเฮาเด้อ”

3:5 คนขอทานฮั้นกะเลยเฮ็ดตาม คึดว่าสิได้อีหยังจากพวกลาว

3:6 แต่เปโตรเว้าว่า “เงินกับทองข้อยกะบ่มีดอก แต่แนวที่ข้อยมีอยู่ข้อยสิให้เจ้า คือในพระนามของพระเยซูคริสต์ซาวนาซาเร็ธ ให้ลุกขึ้นย่างเด้อ”

3:7 เว้าแล้วเปโตรกะจับมือขวาของเขาซ่อยซูขึ้น แล้วในหว่างฮั้นพอดี ตีนพร้อมทั้งข้อตีนของเขาแข็งแฮงขึ้นกับหม่อง

3:8 แล้วเขาจั่งโดดขึ้นยืนกับย่างเข้าไปในพระวิหารพร้อมเปโตรกับยอห์น ทั้งย่างทั้งเต้นทั้งสรรเสริญพระเจ้าอยู่ฮั้น

3:9 บัดนี้ เมิ้ดคู่คนได้เห็นเขาย่างกับสรรเสริญพระเจ้า

3:10 แล้วพวกคนอยู่ฮั่นจั่งนึกออกได้ว่า เป็นคนง่อยที่เคยนั่งขอทานอยู่ประตูงามของพระวิหาร เขาจั่งพากันทึ่งใจเป็นตางึดในเหตุการณ์ที่เกิดขึ้นกับคนผู้ฮั้น

3:11 บัดพอคนง่อยที่ได้ฮับการปัวฮั้น กอดเปโตรกับยอห์นไว้ พวกคนอยู่ฮั่นกะแล่นไปหาพวกเขาตอนอยู่ใต้ดาดฟ้าระเบียงของพระวิหารที่เอิ้นกันว่า ระเบียงของซาโลมอน ย้อนพวกเขาสงสัยเป็นตางึดหลาย

3:12 บัดเปโตรเหลียวเห็นคนพวกฮั้นกะเลยบอกเขาว่า “ซนซาติอิสราเอลเอ้ย เป็นหยังพวกเจ้าพากันแปลกใจเป็นตางึดในเรื่องคนผู้นี้ แล้วจั่งจ้องเบิ่งพวกเฮาย้อนหยัง ปานกับว่าพวกเฮาสามารถปัวคนนี้เซาง่อยเป็นดีได้ โดยฤทธิ์กำลังหรือความดีของพวกเฮาเอง

3:13 พระเจ้าของอับราฮัม อิสอัค กับยาโคบ คือพระเจ้าของพวกพ่อตระกูลของเฮา เพิ่นได้โปรดให้เกียรติพระเยซูผู้เป็นพระบุตรของเพิ่น ซึ่งพวกเจ้าได้มอบไว้ให้ถืกขึงประหาร กับได้ปฏิเสธคัดค้านเพิ่นต่อหน้าปีลาต บัดลาวตั้งใจสิปล่อยเพิ่นอยู่แล้ว

3:14 คือแม่นพวกเจ้าฮั้นแล้ว ได้ปฏิเสธเพิ่นผู้บริสุทธิ์ซึ่งเป็นผู้เที่ยงธรรมแท้ แล้วจั่งได้ขอร้องให้ปีลาตปล่อยฆาตกรผู้หนึ่งออกไปแทน

3:15 จั่งได้ฆ่าพระองค์ผู้เป็นจอมราซาแห่งซีวิต ผู้ที่พระเจ้าได้โปรดให้เป็นขึ้นมาจากตายแล้ว ซึ่งพวกเฮาได้เป็นหลังฐานพยานในเรื่องนี้

3:16 แล้วโดยความเซื่อวางใจในพระนามของเพิ่นฮั้น คนนี้ที่พวกเจ้าเห็นฮู้กันอยู่ เอ้อ โดยความเซื่อในพระองค์ฮั้นเองเป็นเหตุให้คนนี้เซาง่อยเป็นดีได้แล้วอยู่ต่อหน้าพวกเจ้าคู่คน

3:17 แล้วบัดนี้ พี่น้องทั้งหลายเอ้ย ข้อยฮู้ว่าพวกเจ้าได้เฮ็ดแนวฮั้นด้วยบ่ฮู้เรื่องฮู้ราวอีหยัง พร้อมทั้งคณะผู้ครอบครองของพวกเจ้ากะคือกัน

3:18 แต่ว่าเหตุการณ์แนวหมู่ฮั้น ที่พระเจ้าได้ประกาศไว้ล่วงหน้าก่อน ผ่านทางปากของผู้เป็นปากเป็นเสียงของเพิ่น ว่าพระคริสต์ต้องทนทุกข์ทรมานแทนปวงซน ซึ่งเพิ่นได้เฮ็ดให้สำเร็จแล้ว

3:19 จั่งซั้น ให้พวกเจ้าหันมากลับใจใหม่เด้อ เพื่อสิได้ฮับการลบล้างความผิดบาปให้เมิ้ดไป จั่งสิได้มียามอันซื่นบานอยู่เย็นเป็นสุขต่อหน้าพระผู้เป็นเจ้าในภายหน้า

3:20 เพื่อเพิ่นสิได้ใซ้พระเยซูคริสต์มา คือผู้ฮั้นที่เคยได้ประกาศไว้ให้พวกเจ้าฮู้มาก่อนแล้ว

3:21 แม่นผู้ฮั้นที่เมืองสวรรค์สิต้องฮับไว้ก่อน จนฮอดยามที่พระเจ้าสิให้เมิ้ดคู่อันคู่แนวกลับเป็นดีคือเก่า ตามที่พระเจ้าได้กล่าวไว้ฮั่น ผ่านทางปากของผู้เป็นปากเป็นเสียงของเพิ่น ตั้งแต่เริ่มสร้างโลกมา

3:22 คือ ท่านโมเสสได้กล่าวไว้อีหลีให้พวกพ่อตระกูลฮั้นว่า ‘พระผู้เป็นเจ้า พระเจ้าของพวกเจ้าฮั้น สิโปรดให้มีผู้เป็นปากเป็นเสียงผู้หนึ่งคือจั่งเฮาหนิ ออกมาจากพวกพี่น้องของเจ้า แล้วให้พวกเจ้าฟังเพิ่นในเมิ้ดคู่แนวที่เพิ่นสิเว้าฮั้น

3:23 แล้วมันสิเป็นไปที่ว่า ผู้หนึ่งผู้ใดที่บ่ได้ฮับฟังผู้เป็นปากเป็นเสียงผู้ฮั้น เขาสิต้องถืกตัดขาดให้พินาศไปออกจากหมู่ประซาซน’

3:24 เอ้อแม่น แล้วผู้เป็นปากเป็นเสียงคู่คน ตั้งแต่ซามูเอลเป็นลำดับมา กะได้เว้าเป็นเสียงเดียวกันเป็นคำทำนายเถิงยามฮั้นที่สิมาฮอด

3:25 แล้วพวกเจ้าได้เป็นลูกหลานของผู้เป็นปากเป็นเสียงหมู่ฮั้น กับของคำมั่นสัญญาที่พระเจ้าได้ให้ไว้กับพวกพ่อตระกูลของเฮานำ ตามที่ได้เว้ากับพ่ออับราฮัมว่า ‘แล้วหมู่ซนทั้งหลายทั่วแผ่นดินโลกสิได้ฮับพรเป็นสุขย้อนเซื้อสายของเจ้า’

3:26 โดยว่า หลังจากพระเจ้าได้โปรดให้พระเยซูเป็นขึ้นมาจากตายฮั้น พระเจ้าได้ใซ้พระบุตรให้มาหาพวกเจ้าก่อน อวยพรพวกเจ้าโดยให้คู่คนในพวกเจ้ากลับใจหันออกมาจากทางซั่วของโต”