2:1 แต่ว่า ได้มีผู้ทำนายเท็จเกิดขึ้นอยู่หว่างกลางพวกประซาซนตอนฮั้น ตามที่สิมีผู้สอนเท็จเกิดขึ้นอยู่หว่างกลางพวกเจ้า แม่นผู้ที่สิแอบแฝงนำเอาคำสอนเท็จของลัทธิต่างๆ ฮอดปฏิเสธองค์พระผู้เป็นเจ้า ผู้ที่ไถ่เขาฮั้น แล้วเขาจั่งสินำความพินาศอย่างกะทันหันมาสู่หัวโตเอง

2:2 แล้วสิมีหลายคนติดตามเขาไปในทางอบายมุขของเขา นำไปสู่ความพินาศ แม่นย้อนคนพวกฮั้นล่ะ ทางแห่งความจริงสิถืกลบหลู่กล่าวร้าย

2:3 แล้วย้อนใจขี้โลภของเขา เขาสิค้าเอากำไรจากพวกเจ้า ด้วยลูกเล่นตลบตะแลงตามผลประโยชน์ส่วนโตของเขา แต่การพิพากษาของพวกเขาฮั้น แม่นแต่คองถ้าโดนนานแล้ว ความฉิบหายของเขาสิบ่เนินซ้าอีก

2:4 คือ คั่นพระเจ้าบ่ได้ยกเว้นพวกเทวทูตที่ได้เฮ็ดบาปฮั้น แต่ได้ผลักมันลงไปสู่นรก ล่ามไว้ด้วยโซ่ตรวนแห่งความมืด จองจำคุมขังไว้จนฮอดมื้อพิพากษา

2:5 กับบ่ได้ยกเว้นซาวโลกในสมัยโบราณ แต่ได้โปรดซ่อยโนอาห์ ผู้หนึ่งในแปดคนให้รอดพ้น แม่นผู้ประกาศความซอบธรรม ตอนที่พระเจ้าได้บันดาลให้น้ำท่วมโลก ของคนชั่วในยามฮั้น

2:6 กับได้ลงโทษเมืองโสโดมกับเมืองโกโมราห์ฮั่นให้พินาศไปเป็นขี้เถ้า เพื่อเป็น ตัวอย่างให้คนทั้งหลายต่อๆ มา ผู้ที่สิประกอบการซีวิตในทางที่บ่ให้เกียรติพระเจ้า

2:7 แต่ได้ซ่อยท้าวโลทให้รอดพ้น แม่นผู้ซอบธรรมที่ทุกข์หลาย ย้อนพฤติกรรมสกปรกลามกของคนเลวทรามอยู่ฮั่น

2:8 (ด้วยว่า ท้าวโลทผู้ซอบธรรมฮั่น ซึ่งมีที่อาศัยอยู่ในหว่างกลางพวกฮั้น คือจิตใจอันซอบธรรมของลาวกะเป็นทุกข์เป็นฮ้อนมื้อแล้วมื้อเล่า โดยต้องได้ยินได้เห็นการประพฤติชั่ว ที่ผิดกฎของพระเจ้า ของพวกเขา)

2:9 จั่งซั้น องค์พระผู้เป็นเจ้าสามารถกู้คนที่ถวายเกียรติเพิ่น ให้รอดพ้นจากการทดลองได้ กับจองจำคนบ่เป็นธรรม กักไว้เถิงมื้อพิพากษาลงโทษฮั้น

2:10 คือ แม่นเฉพาะ ผู้คนที่ดำเนินซีวิตไปตามเนื้อหนัง ตามราคะตัณหาอันโสโครก ลบหลู่ดูหมิ่นการปกครอง พวกนี้เย่อหยิ่งจองหอง ดื้อดึงตามใจโตเอง บ่ยำเกรงที่สิกล่าวประจานผู้มีบรรดาศักดิ์

2:11 ซึ่ง แม้นแต่พวกเทวทูต ผู้มีฤทธิ์กำลัง ทั้งมีอำนาจหลายกว่า กะยังบ่ได้กล่าวหาใส่พวกนี้ต่อหน้าองค์พระผู้เป็นเจ้าเลย

2:12 แต่ว่า คนจำพวกฮั้น คือปานสัตว์ป่าที่บ่จักทีป เกิดมาเพื่อถืกล่า จับไปฆ่าถิ้มซื่อๆ คนพวกฮั้นฮู้เท่าบ่เถิงการณ์ กล่าวประจานแนวเขาบ่เข้าใจ จั่งสิต้องสู่ความพินาศตามทางเสียหายของเขาเอง

2:13 แล้วเขาสิต้องฮับค่าตอบแทนสมกับความบ่เป็นธรรมของโต อย่างคนที่มักเฮฮาเพลิดเพลินกันในยามกลางเว็น พวกเขาเป็นแป้วเป็นมลทินซื่อๆ เฮฮามึนเมาด้วยการหลอกลวงโตเอง ในขณะที่เขากินเลี้ยงฮ่วมสามัคคีกับพวกเจ้า

2:14 นัยตาของพวกเขาเต็มไปด้วยความเล่นชู้ล่วงประเวณี จั่งบ่สามารถเซาเฮ็ดบาปได้เลย เขาวางกับดักไว้ให้คนที่มีจิตใจอ่อน ซึ่งใจของพวกเขาเก่งในทางขี้โลภ เป็นพวกอัปรีย์อยู่ใต้ความแช่งสาปแล้ว

2:15 เขาปะถิ้มทางมันถืกมันแม่น หลงไปนอกลู่นอกทาง คือเขาติดตามทางของ บาลาอัม แล้ว ลูกซายของเบโอร์ แม่นผู้มักผลงานของแนวบ่เป็นธรรม

2:16 แต่ส่วน บาลาอัม เขาถืกต่อว่าย้อนการละเมิดของเขา คือมีโตลาจั่งได้เว้าเป็นเสียงปากคน ได้ห้ามผู้ทำนายฮั้นในการผีบ้าหน้าด้านของเขา

2:17 คือคนจำพวกนี้เป็นคือน้ำส้างแห้ง ปานเมฆที่ถืกลมพายุพัดไหลไปมา ซึ่งมีหม่องมืดทึบเตรียมไว้เฉพาะพวกนี้แล้ว ตลอดกาลเป็นนิตย์

2:18 คือ บัดพวกเขาเว้า มันเป็นคำอ่อนหวานอันว่างเปล่า ซึ่งด้วยคำฮั้นเขาล่อเอาคนด้วยตัณหาอันโสมมทางเนื้อหนัง แม่นผู้ที่เคยพ้นจากความผิดทางซีวิตเก่าของคนพวกฮั้นมาแล้ว

2:19 ขนาดเขาฮับปากสัญญาว่า สิซ่อยให้พ้นการเป็นทาสมาสู่เสรีภาพ โตเขากะยังเป็นทาสอยู่ โดยว่าผู้ใดพ่ายแพ้ต่อสิ่งใด เขากะเป็นทาสของสิ่งฮั้น

2:20 คือ คั่นว่า หลังจากพวกเขาได้พ้นจากมลทินทางโลกนี้ได้ ด้วยการฮู้พระเยซูคริสต์เจ้า พระผู้โปรดฮั้น แล้วจั่งหันกลับไปเกี่ยวข้อง พ่ายแพ้ต่อแนวเก่าอีก บั้นปลายซีวิตเขากะแฮงแย่กว่าเดิม

2:21 คือคนพวกนี้ มันสิเป็นการดีกว่าสำหรับเขา คั่นเขาบ่เคยได้ยินเถิงเรื่องทางซอบธรรมมาก่อน แทนที่สิฮู้จัก แล้วจั่งหันหลังใส่คำสั่งอันบริสุทธิ์ เถิงข่าวประเสริฐฮั้น ที่ได้นำไปให้พวกเขาแล้ว

2:22 แต่ว่า มันเป็นไปกับพวกนี้แล้ว ตามที่มีสุภาษิตอันจริงว่า “หมาหันไปกินฮากของมันอีก” กับว่า “หมูพออาบน้ำให้แล้ว กะหลบไปลุยหนองของมันอีก”