9:1 แล้วมันบ่จำเป็นที่ข้อยสิต้องมาเขียนเพิ่มเติมให้พวกเจ้าในเรื่องการถวายซ่อยพี่น้องคนของพระเจ้าฮั้นดอก

9:2 คือข้อยฮู้จักจิตใจของพวกเจ้าว่าพร้อมอยู่แล้วที่สิซ่อย ข้อยจั่งยกย่องพวกเจ้าปันพวกมาซิโดเนียฟังว่า พี่น้องอยู่อาคายาได้จัดเตรียมไว้พร้อมแล้วตั้งแต่ปีกลายนี้ แล้วบัดนี้ความกระตือรือร้นของพวกเจ้ากะได้กระตุ้นใจคนส่วนหลาย

9:3 แต่จั่งใดกะตาม ข้อยได้ให้พี่น้องหมู่ฮั้นมาหาไว้ก่อน เพื่อซ่อยพวกเจ้าในการจัดเตรียมในเรื่องถวายไว้ให้พร้อม แล้วกะเพื่อการที่พวกเฮาได้ยกย่องพวกเจ้าฮั้นสิบ่ได้สูญเปล่า

9:4 บ่ซั้น คั่นซาวมาซิโดเนียลางคนมากับข้อย แล้วเห็นว่าพวกเจ้ายังบ่ทันเตรียมพร้อม พวกเฮากะสิอับอายขายหน้าเลยในการยกย่องพวกเจ้าฮั้น (บ่ต้องเว้าฮอดพวกเจ้าดอก)

9:5 จั่งซั้น ข้อยจั่งเห็นสมควรที่สิซักซวนพี่น้องหมู่ฮั้น ให้ไปหาพวกเจ้าก่อน เพื่อซ่อยเตรียมของถวายฮั้นไว้ให้พร้อม ตามที่พวกเจ้าได้ฮับปากไว้ก่อนแล้วฮั้น เพื่อสิเห็นกันว่า พวกเจ้าถวายด้วยใจกว้างบ่แม่นด้วยใจแคบ

9:6 แต่ข้อยว่าจั่งซี้ ฝ่ายผู้ที่หว่านเพียงแค่เล็กน้อย กะสิเก็บเกี่ยวเพียงเล็กน้อย แล้วฝ่ายผู้ที่หว่านหลาย กะสิเก็บเกี่ยวได้หลาย

9:7 จั่งซั้น ให้ถวายแต่ละคนตามที่มุ่งหมายไว้ในใจ บ่แม่นคึดเสียดาย หรือฝืนใจถวายโดยความจำเป็น ย้อนว่าพระเจ้าฮักผู้ที่ถวายด้วยความยินดี

9:8 ด้วยว่า พระเจ้าสามารถโปรดให้พระกรุณาธิคุณของเพิ่นมีอยู่ต่อพวกเจ้าอย่างอุดมสมบูรณ์ เพื่อว่าพวกเจ้าสิมีคู่แนวอย่างครบถ้วนอยู่เสมอ เพื่อสิประกอบการดีในคู่แนวอย่างเหลือล้น

9:9 ตามที่มีคำเขียนไว้ว่า “เขาได้ถวายแจกจ่ายออกไป เขาได้ซ่อยเหลือคนยากจน ความซอบธรรมต่อพระเจ้าของเขาฮั้น กะคงอยู่เป็นนิตย์”

9:10 บัดนี้พระเจ้าผู้เพิ่นโปรดให้พืชต่อผู้ที่หว่าน กับโปรดให้คนมีแนวอยู่แนวกิน จั่งซั้น เพิ่นกะสิโปรดให้พืชที่พวกเจ้าหว่านเกิดผลทวีหลายขึ้น กับสิโปรดให้ผลลัพธ์จากการดีที่พวกเจ้าเฮ็ดฮั้นเกิดผลทวีหลายขึ้นนำ

9:11 เพื่อพวกเจ้าสิได้ฮับการบำรุงให้เจริญขึ้นในเมิ้ดคู่แนวอยู่เสมอ เพื่อประกอบการดีอย่างเหลือล้นในคู่อย่าง ซึ่งผ่านทางพวกเฮา จั่งเป็นเหตุที่พี่น้องอยู่ฮั้น เกิดการขอบคุณพระเจ้า

9:12 ด้วยว่า การดำเนินงานฮับใซ้ในเรื่องนี้ กะบ่ได้ซ่อยพี่น้องคนของพระเจ้าผู้ขัดสนแต่แนวเดียว แต่ยังเป็นเหตุให้เกิดมีการขอบคุณพระเจ้าอย่างเต็มล้นนำ

9:13 ด้วยว่า การพิสูจน์ในงานฮับใซ้นี้ คือพวกเขาที่เป็นฝ่ายฮับกะยกย่องให้เกียรติพระเจ้า ย้อนการเซื่อฟังของพวกเจ้าในข่าวประเสริฐของพระคริสต์ ตามที่ได้ฮับปากไว้ว่าสิได้เฮ็ด กับย้อนใจเอื้อเฟื้อเผื่อแผ่ของพวกเจ้าในการถวายซ่อยพวกเขากับคนอื่นนำ

9:14 แล้วเขาได้อธิษฐานเว้านำพระเจ้าขอให้เพิ่นอวยพรให้พวกเจ้านำ พร้อมทั้งคึดฮอดพวกเจ้าหลาย ย้อนพระกรุณาธิคุณของพระเจ้าอันเหลือล้นฮั้น ที่สถิตอยู่ในพวกเจ้า

9:15 ขอบคุณพระเจ้าสำหรับของขวัญอันยอดเยี่ยมฮั้นที่เพิ่นประทานให้ ซึ่งดีเลิศกว่าคำใดๆสามารถบรรยายได้