5:1 แต่ว่า พี่น้องทั้งหลายเอ้ย ส่วนเรื่องกาลเวลาที่มีกำหนดไว้แล้วฮั้น มันบ่จำเป็นที่เฮาสิต้องเขียนบอกให้พวกเจ้าฮู้

5:2 ย้อนว่า พวกเจ้าเองกะฮู้ดีอยู่แล้ว ว่ามื้อขององค์พระผู้เป็นเจ้าฮั้นสิแอบเข้ามาคือปานขี้ขโมยลักเข้ามาในยามกลางคืน

5:3 คือ บัดยามที่คนสิเว้ากันว่า “สงบสุขปลอดภัยแล้ว” ในยามฮั้นล่ะ ความพินาศสิลงมาสู่พวกเขาโลด แล้วพวกเขาสิหนีบ่พ้น คือปานแม่หญิงเจ็บท้องสิออกลูก

5:4 แต่ว่า พี่น้องทั้งหลายเอ้ย พวกเจ้าบ่ได้อยู่ในความมืดอีกแล้ว ที่ว่ามื้อฮั้นสิแอบเข้ามาหาพวกเจ้า คือจั่งขี้ขโมย

5:5 พวกเจ้าได้เป็นลูกของความสว่างแล้ว กับเป็นลูกของกลางเว็น คือพวกเฮาทั้งหลายบ่มีส่วนเกี่ยวข้องกับกลางคืน หรือเกี่ยวข้องกับความมืด

5:6 จั่งซั้น อย่าให้พวกเฮามัวเมาหลับไหลไปเด้อ คือปานคนอื่นๆ แต่ให้พวกเฮาคอยเฝ้าระวัง มีสติรอบคอบดี

5:7 คือพวกคนที่มัวเมาหลับไหลไปฮั้น กะหลับในความมืดยามกลางคืน กับคนที่มึนเมากะเมาในความมืดยามกลางคืน

5:8 แต่ว่าสำหรับพวกเฮาผู้ที่อยู่ฝ่ายความสว่าง กะให้วางโตอย่างมีสติรอบคอบ อาศัยความเซื่อกับความฮักเป็นเสื้อเกราะป้องกันหน้าเอิก กับอาศัยความหวังอันมั่นคงในความรอดเป็นหมวกเหล็ก

5:9 ย้อนว่าพระเจ้าบ่ได้หมายพวกเฮาไว้เพื่อการลงโทษ แต่เพื่อมีความรอดพ้นโดยทางองค์พระเยซูคริสต์เจ้า นายซีวิตของพวกเฮา

5:10 ผู้เพิ่นที่ได้ตายเพื่อพวกเฮาทั้งหลาย จั่งซั้น บ่ว่าเฮาสิตื่นหรือสิหลับไป พวกเฮากะสิมีซีวิตฮ่วมกันกับพระองค์อยู่แล้ว

5:11 จั่งซั้น ให้พวกเจ้าหนุนใจกันและกัน ต่างคนต่างส่งเสริมความเซื่อซึ่งกันและกัน ตามอย่างที่พวกเจ้าพวมเฮ็ดอยู่แล้ว

5:12 แล้ว พี่น้องทั้งหลายเอ้ย พวกเฮาขอแนะนำพวกเจ้า ให้คอยสังเกตผู้คนที่ฮับใซ้ในเวียกงานของพระเจ้าในหมู่พวกเจ้า กับคนที่เบิ่งแยงเตือนสติพวกเจ้าในองค์พระผู้เป็นเจ้านำ

5:13 แล้วจั่งให้เกียรติเขาอย่างสูงด้วยความฮักแพง ย้อนการงานที่เขาได้ปรนนิบัติฮั้น แล้วให้อยู่นำกันอย่างสงบสุขเด้อ

5:14 พี่น้องทั้งหลายเอ้ย บัดนี้พวกเฮาขอบอกพวกเจ้าว่า ให้ตักเตือนคนที่บ่มีระเบียบวินัยเด้อ หนุนน้ำใจผู้ที่ท้อแท้ใจเด้อ ซูกำลังคนที่อ่อนแอเด้อ กับให้มีใจอดทนโดนนานต่อคนทั้งปวงนำเด้อ

5:15 ให้ค่อยระวังเบิ่งกันไว้เด้อ อย่าให้ผู้ใดเฮ็ดซั่วตอบแทนความซั่วใส่กันเลย แต่ให้ติดตามแต่แนวดีงามต่อหมู่พวก พร้อมต่อคนทั้งปวงเด้อ

5:16 ให้มีใจซื่นซมยินดีอยู่เสมอเด้อ

5:17 ให้อธิษฐานต่อพระเจ้าเป็นประจำเด้อ

5:18 ให้มีใจขอบคุณในเมิ้ดคู่แนวเด้อ ย้อนว่าการเฮ็ดแนวนี้กะเป็นตามพระประสงค์ของพระเจ้าสำหรับพวกเจ้าในพระเยซูคริสต์

5:19 อย่าระงับการทรงนำของพระวิญญาณเด้อ

5:20 อย่าดูถูกดูหมิ่นคำพยากรณ์จากพระเจ้าเด้อ

5:21 ให้พิสูจน์คู่อย่างเด้อ แล้วยึดมั่นแต่ในแนวที่ดีงามเด้อ

5:22 ให้เว้นไว้จากความซั่วเมิ้ดคู่แนวเด้อ

5:23 แล้วขอให้พระเจ้าแห่งความสงบสุข โปรดให้พวกเจ้าเป็นคนดีพร้อมบริสุทธิ์เฉพาะเพิ่น แล้วขอให้ดวงวิญญาณ กับจิตใจ พร้อมทั้งตนโตของพวกเจ้าได้ฮับการปกป้องไว้ บ่มีที่ติว่ากล่าวได้ ในมื้อที่พระเยซูคริสต์เจ้าของพวกเฮาเสด็จกลับมาฮั้น

5:24 คือผู้เพิ่นที่ได้เอิ้นได้เซิญพวกเจ้ามาฮั้น เป็นผู้สัตย์ซื่อภักดี สามารถสิเฮ็ดให้เถิงความสำเร็จได้เลย

5:25 พี่น้องทั้งหลายเอ้ย ซ่อยอธิษฐานเผื่อพวกเฮาเด้อ

5:26 ให้ต้อนฮับพี่น้องคู่คน ตามประเพณีอันดีงามบริสุทธิ์เด้อ

5:27 ข้อยขอสั่งพวกเจ้าไว้โดยองค์พระผู้เป็นเจ้า ว่าให้อ่านจดหมายฉบับนี้ให้พี่น้องคนบริสุทธิ์ทั้งหลายของพระเจ้าฟังเด้อ

5:28 ขอให้พระกรุณาธิคุณของพระเยซูคริสต์เจ้า นายซีวิตของคนเฮา ดำรงอยู่นำพวกเจ้าเทอญ อาเมน [ จดหมายฉบับแรกถึงชาวเธสะโลนิกา เขียนจากกรุงเอเธนส์ ]