3:1 จั่งซั้น บัดพวกเฮาสิทนอีกบ่ได้ เลยเห็นดีกันว่า สิอยู่เมืองเอเธนส์ซะก่อน

3:2 แล้วจั่งใซ้ทิโมธี ซึ่งลาวเป็นพี่น้องในการฮับใซ้พระเจ้า กับเป็นหมู่ฮ่วมงานในข่าวประเสริฐของพระคริสต์ ให้ไปซ่อยเสริมสร้างพวกเจ้าให้มั่นคง กับปลอบใจพวกเจ้าในทางความเซื่อนำ

3:3 เพื่อบ่ให้มีใผในพวกเจ้าตกใจย้อนความทุกข์ยากลำบากของเฮาอยู่ทางนี้ คือพวกเจ้าเองฮู้ดีว่า การแนวฮั้นกะมีไว้สำหรับพวกเฮาอยู่แล้ว

3:4 แท้จริงแล้ว ตอนที่พวกเฮายังอยู่กับพวกเจ้าฮั่น พวกเฮากะได้บอกไว้ก่อนแล้ว ว่าพวกเฮาสิต้องถืกความทุกข์ยากลำบากตามที่เป็นมาอยู่แล้วฮั้น ซึ่งพวกเจ้าได้ฮู้กันดีอยู่แล้ว

3:5 เป็นย้อนเหตุนี้ล่ะ ที่ว่าตอนข้อยสิทนอีกบ่ได้ ข้อยจั่งส่งคนไปถามข่าวเถิงความเซื่อของพวกเจ้า หย้านว่าเจ้ามารซาตานผู้เป็นเจ้าทดลองฮั้น อาจสิได้ทดลองพวกเจ้าให้หลงโดยแนวใดแนวหนึ่ง แล้วการงานของพวกเฮาอยู่ฮั่นอาจสิเมิ้ดความหมายไปซื่อๆ

3:6 แต่ว่าบัดนี้ ทิโมธี ได้หลบคืนมาจากไปหาพวกเจ้าแล้ว จั่งได้นำข่าวดีมาบอกเถิงความเซื่อมั่นกับความฮักแพงของพวกเจ้า กับอีกว่า พวกเจ้าได้คึดฮอดพวกเฮาอยู่เสมอด้วยความหวังดี กับใฝ่ฝันคึดอยากเห็นพวกเฮาหลาย คือจั่งที่พวกเฮาคึดอยากสิเห็นพวกเจ้าคือกัน

3:7 จั่งซั้น พี่น้องทั้งหลายเอ้ย พวกเฮากะได้ฮับการเล้าโลมหนุนใจ ความทุกข์ยากในใจจั่งได้เบาบางลง ได้ย้อนความเซื่อของพวกเจ้าเป็นเหตุ

3:8 ซึ่งบัดนี้ พวกเฮาหายใจได้ม่อน คั่นพวกเจ้ายั่งยืนอย่างมั่นคงอยู่ในองค์พระผู้เป็นเจ้า

3:9 จั่งซั้น พวกเฮาสิขอบคุณพระเจ้าหลายส่ำใดเพื่อพวกเจ้า เป็นการตอบสนองเพื่อความซื่นซมยินดีที่พวกเฮามีต่อพระเจ้าของเฮาย้อนพวกเจ้า

3:10 พวกเฮาจั่งอธิษฐานเมิ้ดมื้อเมิ้ดคืนด้วยความจริงจัง ว่าอยากเห็นหน้าพวกเจ้าอีก แล้วอยากส่งเสริมเพิ่มความเซื่อของพวกเจ้าส่วนที่ยังขาดอยู่ให้ครบบริบูรณ์

3:11 จั่งขอให้พระเจ้าผู้เป็นพ่อ กับพระเยซูคริสต์ผู้เป็นนายซีวิตของพวกเฮา นำพาให้กลับไปหาพวกเจ้าอีก

3:12 จั่งขอให้เพิ่นโปรดให้ซีวิตของพวกเจ้า เจริญบริบูรณ์ไปด้วยความฮักแพงต่อกันและกัน ให้ทั้งคนภายในกับคนภายนอกนำ คือจั่งที่พวกเฮามีต่อพวกเจ้า

3:13 เพื่อว่า พระเยซูเจ้าสิโปรดให้ซีวิตจิตใจของพวกเจ้าตั้งมั่นอยู่ในความบริสุทธิ์ บ่มีที่ติว่ากล่าวได้ ต่อพระเจ้าผู้เป็นพ่อของพวกเฮา บัดยามพระเยซูคริสต์เจ้าผู้เป็นนายซีวิตของพวกเฮา เสด็จมาพร้อมกันกับคนบริสุทธิ์ทั้งปวงของเพิ่น