5:1 ผู้ใดที่เซื่อว่าพระเยซูเป็นพระคริสต์ ผู้ฮั้นกะได้เกิดใหม่จากพระเจ้า กับว่า คู่คนที่ฮักพระเจ้าผู้ที่ให้การเกิดใหม่ฮั้น กะฮักพี่น้องผู้ที่ได้ฮับการเกิดใหม่จากเพิ่นนำ

5:2 โดยนี้เอง พวกเฮาจั่งฮู้กันว่า เฮาฮักพี่น้องผู้เป็นลูกของพระเจ้า เหตุว่าพวกเฮาฮักพระเจ้า กับฮักษาคำสั่งของเพิ่น

5:3 อันนี้คือความฮักของพวกเฮาต่อพระเจ้า ที่ว่าพวกเฮาฮักษาคำสั่งของเพิ่น ซึ่งการฮักษาคำสั่งของเพิ่นฮั้น กะบ่ได้เป็นแนวยากอีหยัง

5:4 ด้วยว่า ผู้ใดที่เกิดจากพระเจ้า ได้มีซัยต่อโลกแล้ว กับนี่ล่ะเป็นเคล็ดลับแห่งการพิชิตซึ่งให้มีชัยต่อโลก คือความเซื่อของพวกเฮา

5:5 แม่นใผเป็นผู้มีซัยต่อโลก นอกจากผู้ที่เซื่อวางใจว่าพระเยซูเป็นพระบุตรของพระเจ้าฮั้นเอง

5:6 นี้ล่ะ แม่นผู้ที่ได้มาด้วยน้ำกับด้วยพระโลหิต คือพระเยซูคริสต์ บ่แม่นด้วยน้ำอย่างเดียว แต่ด้วยน้ำกับพระโลหิต แล้วพระวิญญาณได้เป็นพยาน ซึ่งเป็นพระวิญญาณแห่งความจริง

5:7 ย้อนมีพยานอยู่สามพยานในสวรรค์ คือองค์พระเจ้าผู้เป็นพ่อ องค์พระคำ กับองค์พระวิญญาณ แล้วพยานทั้งสามนี้เป็นอันหนึ่งอันเดียวกัน

5:8 แล้วกะมีพยานอยู่สามพยานในโลกนี้ คือพระวิญญาณ กับน้ำ กับพระโลหิต กับพยานทั้งสามนี้สอดคล้องกัน

5:9 คั่นพวกเฮายอมฮับคำพยานหลักฐานของคน พยานหลักฐานของพระเจ้ากะยิ่งใหญ่กว่า แล้วนี่คือพยานหลักฐานของพระเจ้า ซึ่งเพิ่นได้เป็นพยานเถิงพระบุตรของเพิ่น

5:10 ผู้ที่เซื่อในพระบุตรของพระเจ้ากะมีคำพยานอยู่ในโตเอง ผู้ที่บ่ยอมเซื่อพระเจ้ากะหาว่าเพิ่นเป็นผู้เว้าตัวะ ย้อนเขาบ่ได้เซื่อพยานหลักฐานที่พระเจ้าให้เถิงพระบุตรของเพิ่น

5:11 กับพยานหลักฐานฮั้นคือเป็นว่า พระเจ้าได้โปรดประทานซีวิตนิรันดร์ให้พวกเฮาทั้งหลาย ซึ่งซีวิตนิรันดร์นี้ มีอยู่ในพระบุตรของเพิ่น

5:12 ผู้ที่มีพระบุตรได้มีซีวิต แต่ผู้ที่บ่มีพระบุตรของพระเจ้ากะบ่มีซีวิต

5:13 ข้อความแนวหมู่นี้ ข้อยได้เขียนมายังพวกเจ้า ผู้ที่เซื่อในพระนามของพระบุตรของพระเจ้า เพื่อพวกเจ้าสิฮู้ว่ามีซีวิตนิรันดร์ แล้วเพื่อพวกเจ้าสิดำรงในความเซื่อต่อไป ซึ่งมีอยู่ในพระนามของพระบุตรของพระเจ้า

5:14 อันนี่คือความมั่นใจที่พวกเฮามีต่อเพิ่น คือคั่นเฮาขอแนวหนึ่งแนวใดตามพระประสงค์ของเพิ่น เพิ่นกะสิฟังเฮา

5:15 กับคั่นพวกเฮาฮู้ว่าเพิ่นได้ฮับฟังเฮา แนวใดที่เฮาขอฮั้น เฮาฮู้ได้ว่า เฮาสิฮับตามที่เฮาขอนำเพิ่น

5:16 คั่นผู้ใดเห็นพี่น้องของโตเฮ็ดบาปแนวใดแนวหนึ่ง ซึ่งเป็นบาปแนวที่บ่เถิงแก่ตาย เขาสิขอกับพระเจ้า แล้วเพิ่นสิให้ซีวิต เพื่อผู้คนที่เฮ็ดบาปแนวที่บ่เถิงแก่ตาย แต่ว่า มีบาปแนวที่เถิงแก่ตายได้ ซึ่งข้อยบ่แนะนำให้อธิษฐานเผื่อเรื่องฮั้น

5:17 คู่แนวที่บ่เป็นความซอบธรรมกะเป็นบาป แล้วบาปแนวที่บ่เถิงแก่ตายกะมี

5:18 พวกเฮาฮู้ว่า ผู้ที่เกิดจากพระเจ้าบ่ได้เฮ็ดบาป โดยว่าคนที่เกิดจากพระเจ้าคอยฮักษาโตเอง แล้วมารร้ายบ่แตะต้องเขาเลย

5:19 พวกเฮากะฮู้กันว่า เป็นคนของพระเจ้า แต่โลกทั้งเมิ้ดตกอยู่ใต้อำนาจของมารร้ายฮั้น

5:20 แล้วพวกเฮาฮู้กันว่า พระบุตรของพระเจ้ามาแล้ว แล้วได้ประทานความเข้าใจให้พวกเฮา เพื่อพวกเฮาสิได้ฮู้จักเพิ่นผู้เที่ยงแท้ กับว่าพวกเฮาอยู่ในเพิ่นผู้เที่ยงแท้ฮั้นแล้ว คืออยู่ในพระเยซูคริสต์พระบุตรของเพิ่น นี่ล่ะ เป็นพระเจ้าผู้เที่ยงแท้ กับเป็นแหล่งซีวิตนิรันดร์

5:21 ลูกเล็กๆ เอ้ย ให้ฮักษาโตเองไว้จากฮูปเคารพเด้อ อาเมน